Ana özü isə ölümsaçan xəstəliyə tuş gəlir
Oktyabrın 27–29-da “Süd vəzi xərçənginə qarşı mübarizə aylığı” çərçivəsində Azərbaycan Tibb Universiteti, Milli Onkologiya Mərkəzi, ATU-nun Onkoloji Klinikası və Azərbaycan Süd Vəzi Xəstəlikləri Mütəxəssisləri Assosiasiyasının birgə təşkilatçılığı ilə II Beynəlxalq Bakı Süd Vəzi Xərçəngi Konqresi keçirildi. Konqresin təşkilində məqsəd onkologiyanın mühüm sahələrindən olan süd vəzi xəstəlikləri, o cümlədən süd vəzi xərçəngi, ümumiyyətlə, qadın sağlamlığı məsələlərini müzakirə etmək və müxtəlif ölkələrin onkoloq, mammoloq və ginekoloqları arasında məhsuldar dialoq yaratmaq idi.
Qeyd edək ki, oktyabr ayında “Süd vəzi xərçənginə qarşı mübarizə aylığı” keçilməsini ilk dəfə 1993-cü ildə Ümumdünya Səhiyyə Təşkilatı elan edib. Onkoloji qadın xəstəlikləri sırasında süd vəzi xərçəngi birinci yeri tutur və xəstələnənlərin sayı ildən-ilə artır. Bəzən xəstəliyə kişilər arasında da təsadüf edilsə də, onların əksəriyyəti xəstəliyin inkişafından şübhələnmədiklərinə görə həkimə tez müraciət etmirlər. Gecikmiş diaqnostika və vaxtında aparılmayan müalicə mənfi terapevtik nəticələrə aparıb çıxarır. Süd vəzi xərçəngi son illər ən çox narahatlıq doğuran onkoloji xəstəliklərdən birinə çevrilib. ÜST-nın məlumatına görə, hər il dünyada 10 milyondan çox qadın həmin xəstəliyə tutulur və 6 milyondan çoxu həyatını itirir.
Xəstəliyin simptomları, müayinəsi, gedişi, fəsadları ilə bağlı konqres iştirakçısı, ATU-nun onkologiya kaferdrasının dosenti, Süd Vəzi Xəstəlikləri Mütəxəssisləri Assosiasiyasının sədr müavini, tibb üzrə fəlsəfə doktoru, onkoloq-mammoloq Həqiqət Vəliyeva ilə söhbətləşdik. Bir az da biganəliyimizdən ölümə yol açan “dərd”lə bağlı qadınlarımızı məlumatlandırmaq istədik. Həqiqət xanım söhbətə “Xərçəng necə yaranır?”– sualımıza cavabla başladı:
– Həkim-şair Abbas Səhhətin təbirincə, ana südü damarlarımızda qana çevrilir, bizə həyat verir. Lakin bir sıra hallarda qadınlar süd vəzi xərçənginə tutulurlar. Bədəndə hər hüceyrənin öz ömrü var. Bu ömür nüvələrindəki genetik materialda yazılır. Yaşlanan hüceyrənin toxumadakı işi başa çatandan sonra ölür. Bu prosesin son hissəsinə “planlı hüceyrə ölümü” deyilir. Xərçəng hüceyrələri isə fərqlidir. Onlar “planlı hüceyrə ölümü”nə tabe olmur, idarəedilməz şəkildə çoxalır. Sağlam hüceyrə neçə dəfə bölünəcəyini və nə vaxt öləcəyini bilir. Amma xərçəng hüceyrələri bu məlumatı itirir, idarə olunmayan şəkildə bölünməyə başlayır və şişlər əmələ gəlir. Xərçəng hüceyrələri yarandıqları şişdən qopub ayrıldıqdan sonra, qan ya da limfa dövranı vasitəsilə ilə bədənin digər bölgələrinə gedir. Həmin yerlərdə çoxsaylı şişlər əmələ gətirir və böyüməyə davam edirlər. Xərçəngin bu formada bədənin digər bölgələrinə yayılması metastaz adlanır.
Süd vəzi xərçəngi digər orqanların şişlərinə nisbətən çox yavaş inkişaf edir. Bir hüceyrənin bölünərək 1 kubsantimetr böyüklüyündə bir kütlə yaratmasına 7–10 il vaxt lazımdır. Əgər hər il müayinə aparılsa müalicənin də səmərəsi olar.
– Xəstəliyin əlamətləri nədir? Həkimə nə vaxt müraciət edilməlidir?
– Süd vəzi xərçənginin müalicəsində müsbət nəticə almağın və sağalmanın əsas şərti erkən diaqnozdur. Şiş bir neçə millimetr böyüklüyündə olanda mammoqrafiyada görünür. Həmin vaxt aparılan müalicənin nəticələri uğurlu olur. Buna görə də süd vəzi müayinələrinə tez-tez gələn xəstələr daha şanslı olurlar. Xərçəng simptomları ortaya çıxdığı zaman şiş ən az 1 santimetr və ya daha böyük ölçülərə çatmış olur. Buna baxmayaraq, xəstəliyin tamamən sağalma ehtimalı hələ də qalır.
Buna görə də, mammoqrafiya, ultrasəs və həkim müayinəsindən başqa, hər qadın öz süd vəzi haqqında məlumatlı olmalı, bəzi nüanslara diqqət etməlidir. Süd vəzi xərçəngində ən çox müşahidə edilən əlamət ələ gələn kütlədir. Bir xəstə əllə hiss edilən kütlə simptomu ilə həkimə müraciət edəndə, öncə bu kütlənin kista, yoxsa şiş olduğu öyrənilir.
Bundan başqa, süd vəzi giləsi axıntısı xərçəngin erkən simptomu ola bilər. Amma süd vəzinin sıxılması nəticəsində axıntı gəlməsi xəstəlik simptomu sayılmır. Çünki süd vəzi giləsi axıntısına hormonal xəstəliklərdə, əmizdirmədən sonrakı vaxtlarda və süd kanallarının xəstəliklərində də təsadüf edilir.
Süd vəzi ucunun içəri çəkilməsi və simmetriyanın pozulması da xəstəlik əlamətlərdəndir. Bəzi qadınlarda süd vəziləri arasında anadangəlmə kiçik fərqlər ola bilər: birinin digərindən daha böyük olması və ya süd vəzi gilələrində simmetriya fərqi kimi. Bunlar hər hansı bir xəstəliyin əlaməti deyil. Amma əvvəllər hər iki süd vəzi giləsi simmetrik və normal olduğu halda sonra dəyişərək içəri çəkilməsi süd vəzi xərçəngi baxımından çox vacib simptom sayılır.
Süd vəzi üzərində uzun müddət qalan qızartı, yara, portağal qabığına bənzər bir görüntü alması, dərinin bir nöqtədə içəriyə doğru çəkilməsi həkimə müraciət etmək üçün səbəbdir. Xəstəliklə mübarizədə ideal variant simptomlar ortaya çıxmazdan əvvəl diaqnozun qoyulması və müalicənin başlanmasıdır.
– Xəstəliyin diaqnozu hansı üsullarla təyin edilir?
– Süd vəzi xərçənginin erkən diaqnostikası üçün istifadə olunan əsas üsullar ultrasəs müayinəsi və mammoqrafiyadır. Amma xərçəngin diaqnostikası üçün radioloji metodlara, biopsiyalara əlavə olaraq, özünü müayinə və periodik olaraq həkim müayinəsindən keçmək də vacibdir. Bu üsullardan yalnız biopsiya vasitəsilə dəqiq diaqnoz qoymaq olur. Digər müayinə metodları biopsiya aparılması qərarını verməyə kömək edir.
Mammoqrafiya süd vəzi xərçənginin erkən diaqnostikası üçün vacib üsuldur. Bu müayinə xəstənin heç bir şikayəti olmadığı halda profilaktik məqsədlə də aparıla bilər. Amma süd vəzində kütlə, giləsində axıntı və ya başqa bir şikayəti olanlara diaqnostik məqsədlə tətbiq edilir. Mammoqrafiya hər qadında fərqli olur və heç bir nəticə digərinə oxşamır. Buna görə də müayinə zamanı daha əvvəl çəkilən mammoqrafiyanın nəticələrinə də baxırıq. Əvvəl çəkilmiş mammoqrafiya ilə yenisi arasındakı fərq daha dəqiq diaqnoz qoyulmasına kömək edir. Mammoqrafiya uyğun zamanda və formada həyata keçirildiyi zaman ağrısız bir üsuldur. Menstrual sikldən sonrakı dövrdə süd vəzilərindəki ödem, gərginlik və həssaslıq daha az olur. Buna görə, pasientlərə sikldən sonrakı həftə müayinə olunmalarını tövsiyə edirik.
Mammoqrafiya müayinəsi, süd vəzisi xərçəngi baxımından heç bir risk faktoru və şikayəti olmayan, hər il müayinə nəticəsi normal olan qadınlara da nizamlı olaraq aparılmalıdır. Belə müayinələr xəstənin həyatını qurtarır və cəmiyyətdəki süd vəzi xərçəngi səbəbilə yaranan ölüm səviyyəsini aşağı salır. Qeyd etməliyəm ki, mammoqrafiya müayinəsi zamanı alınan radiasiya şüası ağciyərin rentgenoloji müayinəsindəkindən daha az dozada olur.
Digər dəqiq müayinə üsulu biopsiya – süd vəzi toxumasından alınan nümunənin uyğun şəraitdə dondurulub, kəsilib, boyanıb, mikroskop altında incələnməsidir. Bu yolla əldə edilən diaqnoz histopatoloji diaqnozdur və süd vəzi xərçənginin dəqiq təyininin tək yoludur. Diaqnoz üçün iynə biopsiyası və cərrahi biopsiya aparılır. İynə biopsiyası zamanı şübhəli sahə və ya kütlədən iynə köməkliyi ilə toxuma nümunəsi alınıb laboratoriyaya göndərilir. Cərrahi biopsiyada isə xəstə əməliyyata alınır, şübhəli sahə və ya kütlə tamamilə çıxarılır və diaqnozun təsdiqi üçün histaloji müayinəyə göndərilir.
– Bəzən qadınlarda əlavə süd vəzi payı aşkarlanır. Aydınlıq gətirərdiniz, bu, xərçəngin bir növüdürmü?
– Əlavə süd vəzinin müşahidə olunması şiş xəstəliyi deyil. Qoltuq altında, süd vəzinin altında, üstündə, kürək nahiyəsində aşkarlanır. Süd vəzi giləsi və qoltuqaltı xətlə bərabər həmin istiqamətdə paralel yerləşə bilir. Anadangəlmə olur. Kiçik olduğundan kimsə hiss etmir. Yetkinlik çağında, bəzən ilk hamiləlikdə, süd verən zaman, bəzən də daha gec, klimaks dövründə aşkarlanır. Sadəcə normal süd vəzində şiş yarandığı kimi əlavə payda da yarana bilər.
– Siz II Beynəlxalq Bakı Süd Vəzi Xərçəngi Konqresində iştirak edirdiniz. Konqresin işi ilə bağlı fikirləriniz...
– Konqresin elmi proqramı Azərbaycan Tibb Universitetinin Onkoloji Klinikası, Milli Onkologiya Mərkəzi və Azərbaycan Süd Vəzi Xəstəlikləri Mütəxəssisləri Assosiasiyası tərəfindən, süd vəzi xəstəliklərinin müalicəsi üzrə Türkiyənin aparıcı mütəxəssisləri ilə sıx əməkdaşlıq çərçivəsində ərsəyə gəlib və ən aktual mövzuları əhatə edirdi. Dünyaca tanınmış Türkiyə, ABŞ, Almaniya, Avstriya, Qətər, Macarıstan, Hindistan və digər ölkələrdən gəlmiş 40-a yaxın ekspertin məruzələri böyük marağa səbəb oldu. Konqres çərçivəsində süd vəzi xəstəliklərinin radioloji görüntüləməsi və onkoplastik cərrahi məsələlərin daha dərindən araşdırılmasına imkan yaradacaq iki təlim keçirildi.
Bu konqresin təşkili nəinki səmərəli fikir mübadiləsinə və faydalı fəaliyyət proqramının hazırlanmasına, həm də dünyanın bu sahədəki aparıcı mütəxəssislərinin bizim tibb sahəsindəki nailiyyətlərimizlə, imkanlarımız və resurslarımızla tanış olmalarına imkan verəcək.
– Qadınlarımıza bu bəlaya düçar olmamaq, yaxud erkən müalicə olunmaq üçün nə tövsiyə edərdiniz?
– Bədənlərinə qarşı həssas olmalarını tövsiyə edərdim. Qadınlarımız nə qədər özlərinə diqqət etsələr, hər hansı dəyişiklik hiss edən kimi həkimə müraciət etsələr, şübhəsiz ki, hətta xərçəng diaqnozu təsdiqlənsə belə, müalicə çox uğurla nəticələnər. Bunu illərdir, xəstələrlə işləyən onkoloq-mammoloq kimi əldə etdiyimiz nəticələrə əsaslanıb deyirəm.
Zərifə BƏŞİRQIZI
XQ