Bakıda Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin təşkilatçılığı ilə İnsan Resursları Zirvəsi keçirilib. Agentliyin İdarə Heyətinin sədri Mustafa Abbasbəyli müzakirələrin əsas mövzusu olmuş insan resurslarından səmərəli istifadə ilə bağlı suallarımızı cavablandırıb.
– Mustafa müəllim, “İnsan Resusrları Zirvəsi” adlı ümumrespublika müzakirəsinin keçirilməsində məqsəd nə idi?
– Dövlət Məşğulluq Agentliyi rəsmi insan resursları qurumu olduğuna görə belə bir toplantının keçirilməsinə bir az fərqli formatda yanaşdı. Biz il ərzində karyera inkişaf forumu keçiririk, digər korporativ məsuliyyət tədbirləri təşkil edirik. Amma bunların arasında ən önəmlisi insan kapitalına kompleks yanaşmanı hədəfləyən bu zirvənin gerçəkləşməsi oldu. Düşünürük ki, bu format ənənəvi xarakter alacaq. Bu mühüm tədbirdə cəmiyyətə, dövlətə və fərdlərə verəcəyimiz mesaj məhz istənilən strukturun inkişafında, hər bir qurumun fəaliyyətində insan kapitalının önəmini qabarıq nəzərə çatdırmaqdır. İnanıram ki, bu mesajı verə bildik.
Bir məsələni qeyd edim ki, hər tədbirdə hansısa problemin həllini axıradək tapmaq mümkün olmaya bilər. Əsas odur ki, cəmiyyətin diqqətini onun həllinə cəlb edə, ən azından, bu istiqamətdə insanlarımızı düşündürə bilək.
– Zirvə həm də kifayət qədər fərqli formatda təşkil olunmuşdu...
– Doğrudur, “İnsan Resursları Zirvəsi” gözlədiyimizdən də artıq maraqla qarşılandı. Tədbirin təşkili kifayət qədər məsuliyyətli, ağır bir proses idi. Mərkəzi icra hakimiyyəti orqanları rəhbərlərinin iştirakı həyata keçirildi. Xüsusilə birinci, ikinci və üçüncü panellərdə səmərəli müzakirə aparıldı.
Dövlət orqanları nümayəndələrinin iştirakı və proseslərə yanaşması çox fərqli oldu. Ona görə də zirvə adi tədbirlərdən seçildi. İstəyirdik ki, yeni yanaşma ortaya qoyaq. Adətən, dövlət orqanlarında müzakirələrin formatları bir qədər fərqli olur. Çalışdıq ki, burada daha çox interaktivliyi təmin edək, polemikaya üstünlük verək. Düşünürəm ki, dövlət tədbirlərinin təşkili məsələsində yeni formatın başlanğıcını qoya bildik.
– Qeyd etdiyiniz fərqli formatın perspektivini necə görürsünüz?
– Birinci növbədə, onu deməliyəm ki, tədbirdən hər kəs müxtəlif düşüncələrlə ayrıldı. Təşkilati məsələlərə, eləcə də insanlarla ünsiyyət məsələsinə fərqli yanaşmalar oldu. İnanıram ki, növbəti dövrdə bu yanaşmalar nəyisə dəyişəcək. O ki qaldı, dövlət qurumları rəhbərlərinin performansına, görüşlərdən sonra ictimai ekspertlərin bəzilərinin fikirləri mənim üçün də maraqlı oldu. Belə ki, onlar bir məsələnin üzərində xüsusi dayanaraq bildirdilər ki, bu gün ölkəmizdə məmurluq keyfiyyətcə dəyişir, yeni məzmun daşımağa başlayır. Fikirlərlə razıyam. Son bir neçə ildə məmurların siması səmimiyyətə doğru, interaktivliyə istiqamət alaraq dəyişir, daha çox ictimai ünsiyyət forması alır. Bu, indiki dövrdə çox vacib və önəmlidir.
Məlum olduğu kimi, Prezident İlham Əliyev mövcud istiqamətdə xüsusi yanaşma sərgiləyir. Ölkə rəhbərinin tövsiyə və tapşırıqlarına uyğun olaraq, bütün dövlət orqanlarının əməkdaşları vətəndaşlarla daha açıq, əlçatan, polemika müstəvisində münasibətlər qurmalıdırlar. Bu format dəyişikliyi son nəticədə dövlətimizə, idarəçiliyə də çox mühüm töhfə verəcək.
– Ümumiyyətlə, insan resursları ilə işin düzgün qurulması üçün vacib olan nələrdir?
– Hesab edirəm ki, insan resursları mütəxəssisinin, qurumunun birinci vəzifəsi bu işin vacibliyini hər kəsə çatdırmaqdır. Xüsusilə, fəaliyyət göstərdiyi qurumların rəhbər heyətinə. Bu, çox önəmlidir. Əgər insan resursları əməkdaşları buna nail olsalar, qurum rəhbərləri insan kapitalının rolunu doğru-düzgün anlasalar, qurumlarımızın, təşkilatlarımızın işi daha uğurlu alınır.
İnsan resurslarının ənənəvi fəaliyyəti çox önəmlidir. Qurumda fəaliyyət göstərən əməkdaşların vahid dəyər ətrafında toplaşmaları, eyni korporativ mədəniyyətə söykənmələri, onların qurum daxilində məmnun, xoşbəxt olmaları, əsasən, insan resursları departamentinin işini düzgün, səmərəli qurmasından çox asılıdır. Əməkdaşların məhz vahid ideya ətrafında birləşmələri son nəticədə həmin qurumların, təşkilatların uğuru deməkdir.
Anar TURAN, “Xalq qəzeti”