Qırğızıstanda keçirilən Azərbaycan Mədəniyyət Günləri çərçivəsində bu ölkənin  mədəniyyət, informasiya, idman və gənclər siyasəti naziri Mirbek Mambetəliyev və Azərbaycanın mədəniyyət naziri Adil  Kərimli arasında ikitərəfli görüş olub.

Tərəflər 2025-2026-cı illər üçün mədəni əməkdaşlığın inkişafına dair rəsmi idarələrarası Praktiki Tədbirlər Planı (yol xəritəsi) imzalayıblar.

Sənəd yeni birgə təşəbbüslərin həyata keçirilməsinə və iki dövlət arasında çoxillik tərəfdaşlığın möhkəmləndirilməsinə yönəlib.

Danışıqlar zamanı nazirlər mədəni-humanitar dialoqun inkişafı üçün möhkəm bazaya çevrilmiş Qırğızıstan və Azərbaycanın ümumi tarixi və mənəvi dəyərlərini vurğuladılar. Mirbek Mambetaliev 2024-cü ildə Azərbaycanda keçirilən Qırğızıstan Mədəniyyəti Günləri zamanı səmimi qəbula görə Azərbaycan tərəfinə minnətdarlığını bildirib.

Tərəflər ikitərəfli mədəniyyət mübadiləsi üçün mühüm layihələri müzakirə ediblər. Tamaşaçılardan yüksək qiymət alan “Anaların ayaqları altında cənnət” adlı qırğız bədii filminin Bakıda uğurlu premyerasına xüsusi diqqət yetirilib. Hazırda filmin davamı üzərində iş gedir. 2024-cü ilin dekabrında Azərbaycan Dövlət Pantomima Teatrının Bişkekdə qastrol səfərləri də xatırlanıb. Çingiz Aytmatovun pyesi əsasında hazırlanmış “Manqurt” və Hüseyn Cavidin pyesi əsasında hazırlanmış “İblis” tamaşaları yaddaş, şəxsiyyət və mənəvi seçim mövzularına mühüm bədii cavab olub.

Qırğızıstan dramaturqu Kayrat İmanəliyevin əsəri əsasında 2025-ci il aprelin əvvəlində Bakıda nümayiş etdirilən “Qorkut Ata” tamaşasının hazırlanması da ayrıca qeyd olunub. Toktoqul Abdumomunov adına Qırğızıstan Milli Akademik Dram Teatrı tamaşanı aprelin 1-dən aprelin 5-dək təqdim edib.

Qulu Kəngərli

XQ-nin Türküstan üzrə xüsusi müxbiri

Bişkek