Qardaş ölkədə Azərbaycan Mədəniyyəti Günləri münasibətilə ölkə­mizin incəsənət ustaları, bədii kollektivləri, yazıçıları və media nümayən­dələri Astanada səfərdədirlər. 

İlk olaraq Qazaxıstanın Milli Akade­mik Kitabxanasında Azərbaycan Respubli­kası Mədəniyyət Nazirliyinin təşkilatçılığı ilə bu il 530 yaşı tamam olan mütəfəkkir şair Məhəmməd Füzulinin qazax dilində “Füzuli – 530 misra” kitabının təqdimatı və “Füzuli – 530” mövzusunda ədəbi-po­etik məclis təşkil edilib. Mərasimlərdə hər iki ölkənin Mədəniyyət nazirliklərinin nü­mayəndələri, elm və mədəniyyət xadimlə­ri, digər qonaqlar iştirak ediblər.

Qeyd edək ki, həmin layihənin rəhbəri və müəllifi Türk Mədəniyyəti və İrsi Fon­dunun prezidenti Aktotı Raimkulova, ki­tabın tərtibçiləri şair, tərcüməçi, AYB-nin katibi Səlim Babullaoğlu, şair Fərid Hü­seyn, redaktoru Nurlıbek Samatulu, məs­ləhətçisi isə ədəbiyyatşünas Didar Kulke­novdur. Bakıda “Zərdabi nəşr”də işıq üzü görən kitabda dahi şairin 22 qəzəl və 6 qəsidəsi yer alıb.

Azərbaycan Milli Kitabxanasının di­rektoru professor Kərim Tahirov, Azərbay­can Yazıçılar Birliyinin katibi İlqar Fəhmi, Qazaxıstan Mədəniyyət və İnformasiya Nazirliyinin Arxiv, sənədləşmə və kitab işi komitəsinin sədri Rüstəm Əli, Azərbay­can mədəniyyət nazirinin müşaviri Oleq Əmirbəyov, Azərbaycanın Qazaxıstandakı səfiri Ağalar Atamoğlanov, Türk Mədə­niyyəti və İrsi Fondunun prezidenti Aktotı Raimkulova, AMEA-nın Ədəbiyyat İns­titutunun şöbə müdiri, filologiya elmləri doktoru Fəridə Əzizova və başqaları çıxış ediblər. Bildirilib ki, Qazaxıstan və Azər­baycan arasında mədəniyyət sahəsində bö­yük əlaqələr mövcuddur və çox sayda la­yihələr həyata keçirilir. Füzuli yaradıcılığı, ümumən, klassik irs həmişə öz aktuallığını saxlayır və milli-mənəvi dəyərlərdən biri­dir. Vurğulanıb ki, bu tədbir Azərbaycan ədəbiyyatının təntənəsi olacaq və Azər­baycan–Qazax ədəbi əlaqələrinin daha da möhkəmlənməsinə təkan verəcək.

Xalq yazıçısı Elmira Axundova mədə­niyyət günləri çərçivəsində təqdim edilə­cək “Zərifə və Heydər Əliyevlər. Əbədi məhəbbətin tarixçəsi” kitabı haqqında mə­lumat verib.

Beynəlxalq Türk Mədəniyyəti və İrsi Fondunun prezidenti Aktoty Raimkulova jurnalistlərə müsahibəsində deyib: “Təş­kilatımızın missiyası Türk dünyasının mədəniyyəti və irsinin dəstəklənməsi, po­pulyarlaşdırılması və qorunmasıdır. Dövlət başçılarımızın tapşırıqlarına uyğun olaraq, biz ümumtürk irsinin, xüsusilə maddi və qeyri-maddi mədəni irs nümunələrinin qorunması istiqamətində fəaliyyət göstəri­rik. Biz digər türk təşkilatları ilə birlikdə, əsrlərlə yaşı olan Türk dünyasının yazıçı­larının, alimlərinin və şairlərinin yaratdı­ğı ümumtürk irsinin nəşri və təbliğinə öz töhfəmizi verdiyimiz üçün böyük qürur hissi keçiririk. Biz çox şadıq ki, Bakıda yerləşən Mədəniyyət və İrs Fondu Füzuli irsinin təbliğinə öz töhfəsini verib və onun qəzəllərini, poemalarını və şeirlərini qazax dilinə tərcümə edib. Gələcəkdə digər dil­lərə – qırğız və özbək dillərinə tərcümələr də planlaşdırılır”.

Bədii hissədə qiraət ustası Hüseynağa Aslanov və aktrisa Jalə Novruzova Füzu­linin qəzəllərini səsləndiriblər. Xanəndələr – respublika və beynəlxalq müsabiqələr laureatları Orxan Hüseynli və Leyla Rə­himova Füzulinin qəzəllərini muğam üstə ifa ediblər. Qazaxıstan aktyorları Kazibek İskara və Guldana Alixan tərəfindən Fü­zuli şeirlərinin qazax dilinə tərcümələrin­dən nümunələr təqdim olunub. Qiraətçiləri Əməkdar artist Toğrul Əsədullayev (ka­mança) və respublika və beynəlxalq mü­sabiqələr laureatı İbrahim Babayev (tar) müşayiət ediblər.

Həmin gün K.Kuanışbayev adına Qa­zax Milli Musiqili Dram Teatrında “Za­man” qrupunun etnocaz konserti təqdim olunub. Konsertdən əvvəl çıxış edən mu­siqi qrupunun bədii rəhbəri Vasif Hüseyn çıxış edərək, milli çalğı alətlərinə böyük marağı olduğunu bildirib. Sonra söz mu­siqiyə verilib və ifaçılar maraqlı proqramla çıxış ediblər. Qazax musiqisevərləri kon­serti böyük maraqla qarşılayıblar. 

Sentyabrın 25-də isə Qazaxıstan Res­publikasının Milli Akademik Kitabxana­sında Azərbaycan Milli Kitabxanası ilə əməkdaşlıq memorandumu imzalanıb və “Azərbaycan ədəbiyyatı guşəsi” açılıb. Bundan əlavə, Astananın Sülh və Razılıq Sarayında “Azərbaycanın sənət inciləri” adlı sərgi təşkil olunub və həmin sarayda Azərbaycan Dövlət Rəqs Ansamblının konserti keçirilib. 

Qazaxıstan Respublikasının Milli Mu­zeyində Azərbaycan Milli İncəsənət Mu­zeyinin direktoru, Əməkdar mədəniyyət işçisi Şirin Məlikovanın “1920–1980-ci illərdə Azərbaycanda rəngkarlıq və qra­fika”, Azərbaycan Mədəniyyət Nazirli­yinin şöbə müdiri Sevil Kərimovanın “Təbriz məktəbi miniatürü”, Azərbaycan Milli Xalça Muzeyinin direktoru, Əmək­dar mədəniyyət işçisi Əminə Məlikovanın “Azərbaycan Milli Xalça Muzeyi. Müasir məkanda qədim incəsənət” mövzuların­da mühazirələri dinlənilib. Həmin gün K.Kuanışbayev adına Qazax Milli Musiqi­li Dram Teatrında Azərbaycan incəsənət ustaları və bədii kollektivlərinin iştirakı ilə qala-konsert keçirilib. 

Ə.ƏLİYEV
XQ