Paytaxt Bakının bir-birindən cəlbedici və bənzərsiz memarlıq nümunələri onun xoş cazibəsini daha da artırır, ecazkar gözəlliyi ilə heyranlıq yaradır. Şəhərin küçə və meydanlarını bəzəyən tarixi-memarlıq və mədəniyyət abidələrinin yaratdığı möhtəşəm mənzərə paytaxtımızı dünyanın ən maraqlı məkanlarının sırasında qərarlaşdırır. Bakının görünüşünü daha da ehtişamlı edən vasitələrdən biri, şəhərin ən görməli yerlərində ucaldılan milli heykəltaraşlıq nümunələridir. Bu gün paytaxtımızın park və xiyabanlarını dolaşarkən, tez-tez görkəmli şəxslərin heykəlləşmiş obrazları ilə üz-üzə gəlirik. Onlardan bir çoxunun üzərində bərpa-təmizlik işlərinin aparılmasına ehtiyac duyulduğu aydın görünür. Bürünc, mərmər və qranitdən ucaldılan bu monumental heykəllərin səthində uzun illərdir ki, restavrasiya işləri görülməyib və hazırda onlarda bərpa-təmir işlərinin aparılması zərurəti yaranıb.

Bəs Mədəniyyət Nazirliyi tərəfindən bu heykəllərin unikallıqlarının saxlanıl­ması – yad təsirlərdən qorunması və çirk­lərdən təmizlənməsi istiqamətində hansı addımlar atılır?

Bu barədə Mədəniyyət Naziriliyinin Media və komunikasiya şöbəsinin müdiri Aynur Kərimli sorğumuza cavab olaraq bildirdi ki, artıq qeyd edilən yöndə inten­siv işlərə başlanılıb. Nazirlik heykəllərin yad təsirlərdən qorunması və təmizlənməsi üçün artıq “Abidələrə qayğı – Bakı şəhə­rində heykəltaraşlıq əsərlərinin təmizlən­məsi və bərpası” layihəsinə start verib.

– İyul ayının 10-da mövcud vəziyyət­lə əlaqədar Bakı şəhərində 100-dən çox abidəyə baxış keçirilərək, üzərlərində ekspertiza aparılıb. Abidələrdən 20-nin təmizlənmə və bərpaya ehtiyac oduğu müəyyən edilib. Bəzi abidələrdə toz və yağ qatı, habelə yanlış rənglənmə aşkar­lanıb. Bu baxımdan təmizlənmə işinin icrası qərara alınıb. Bu günə kimi 10-dək heykəl və abidə kompleks yuyularaq tə­mizlənib və əvvəlki halına qaytarılıb. Buraya Məhəmməd Füzuli, Mirzə Ələk­bər Sabir, Qara Qarayev, Səməd Vurğun, Boris Vannikov, Albert Aqarunov və Qa­fur Məmmədovun heykəlləri, habelə 20 Yanvar abidə kompleksi, "Kitabi-Dədə Qorqud" abidəsi daxildir. 

Nazirlik rəsmisi onu da əlavə etdi ki, təbiətin, aqressiv mühitin yaratdığı müxtə­lif rəng dəyişmələri, korroziyaların aradan qaldırılması və heykəlin ilkin vəziyyətinə qaytarılması üçün təmizlənmə prosesi in­tensiv aparılır. 

– Heykəl yad təsirlərdən, çirklərdən təmizlənərək ilkin vəziyyətinə qaytarılır və sonrakı mərhələdə qaydalara uyğun ola­raq, tonlama prosesi aparılır. Bundan son­ra, heykəlin yad təsirlərdən uzun müddət qorunması məqsədilə ona qoruyucu qat çə­kiləcək. Heykəllərin unikallığının qorun­ması və təhlükəsizliyinin təmin olunması məqsədilə peşəkar heykəltaraşların nəzarə­ti ilə texniki heyət tərəfindən görülən işlər bütün standartlara uyğun və keyfiyyətlə həyata keçirilir.

Layihənin regionlardakı abidə və hey­kəllərə də şamil olunmasına gəlincə, na­zirlik rəsmisi söylədi ki, bu proses yaxın perespektivdə regionlar üçün nəzərdə tu­tulmur. 

Qeyd edək ki, layihə Mədəniyyət Na­zirliyi, Bakı Şəhər İcra Hakimiyyəti və "Bakı Abadlıq Xidməti" MMC-nin birgə təşkilatçılığı ilə həyata keçirilir.

Ceyhun ALIŞLI