Çoxəsrlik tarixi olan Azərbaycan mədəniyyəti öz inkişafının zirvə dövrünü yaşayır. Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi bu yüksəlişdə xidmətləri olan aparıcı qurumdur. 

XX əsrdə fəaliyyətə başlayan müəs­sisə müxtəlif adlarla xidmət göstərsə də, ölkənin mədəni dirçəlişi, sahəyə marağın və kadr potensialının artırılması, ixtisa­sartırma üzrə təlim, tədris proqramları­nın hazırlanması, insanların maariflən­dirilməsi, sənət xadimləri ilə görüşlər, milli-mənəvi irsin təbliği, tədqiqi kimi işləri layiqincə həyata keçirir. Bir vaxtlar xalq yaradıcılıq evi, Mədəniyyətşünaslıq üzrə Elmi və Metodiki Mərkəz, 2019-cu ildən isə Mədəniyyət üzrə Elmi-Metodiki və İxtisasartırma Mərkəzi adı ilə fəaliy­yət göstərən qurum sahəyə aid bütün islahatlarda yaxından iştirak edir. Ölkə başçısının qanun və sərəncamlarını, Mə­dəniyyət Nazirliyinin tapşırıqlarını rəhbər tutaraq sahənin müxtəlif istiqamətləri üzrə maarifləndirici və yenilikçi layihələr təqdim edir. 

Son aylarda həyata keçirilən “Azər­baycan Respublikasının əmək qanun­vericiliyi” mövzusunda təlim, “Sənətkarın dostu”, “Musiqidə ədəbi dil normaları”, “Musiqinin psixoloji təsiri”, korrupsiyaya qarşı mübarizənin gücləndirilməsinə dair maarifləndirici seminar, “Nəsildən-nəslə teatr” və başqa layihələr söylənilənlərə ən bariz nümunədir. Bu layihələri mədə­niyyət ictimaiyyəti böyük maraqla qarşı­layıb. 

MEMİM-in mədəniyyət müəssisələ­rində çalışan əməkdaşların peşə səriş­tələrinin formalaşdırılması və inkişafı məqsədilə yeni tədris modulları əsasında hazırladığı kurs cari ilin may–iyun ayların­da M.F.Axundov adına Azərbaycan Milli Kitabxanasında keçirilib. Nazirliyin tabeli­yində olan müəssisələrin insan resursları üzrə mütəxəssisləri üçün nəzərdə tutul­muş bu ixtisasartırma kursunun təlimçisi Bakı Dövlət Universitetinin Əmək və Eko­logiya Hüququ kafedrasının professoru Mayis Əliyev olub. İki aylıq təlim proqra­mında əmək qanunvericiliyinin əsasları, müəssisənin insan resursları işinin təşkili və mühafizəsi qaydaları, sahəyə uyğun qanunvericilik kimi mövzular tədris edilib.

Sahəyə marağın artırılması məqsə­dilə daim yenilik axtarışında olan MEMİM-in həyata keçirdiyi layihələr­dən biri də “Sənətkarın dostu”-dur. Bakı Şəhər Mədəniyyət Baş İdarəsinin dəstəyi ilə gerçəkləşən bu tədbir silsilə şəklində olmaqla, iyun ayında baş tutub. Fərqli yaş qruplarına aid sənətsevərlərlə sənət xadimləri arasında könül bağı və mənəvi dostluq körpüsü yaratmaq məqsədi daşı­yan layihənin ilk görüşü 1 İyun Uşaqların Beynəlxalq Müdafiəsi Gününə həsr olu­nub. Üzeyir Hacıbəylinin ev-muzeyində təşkil olunan görüşün qonağı Xalq artisti, professor, pianoçu Ülviyyə Hacıbəyova idi. Görüş Ülviyyə xanımın Azərbaycan peşəkar musiqisinin inkişafı, bəstəkarlıq ənənələri barədə zəngin məzmunlu nitqi, Ü.Hacıbəylinin, Q.Qarayevin əsərlərinin ifa edilməsi ilə yadda qalıb. 

Gündəlik mədəni həyat tərzinin for­malaşması, uşaq və gənclərin yaradı­cılıqlarının stimullaşdırılması, görkəmli mədəniyyət xadimləri ilə görüşlərin zən­gin təcrübə mübadiləsinə çevrilməsinə zəmin yaradan “Sənətkarın dostu” la­yihəsi üzrə növbəti görüş iyunun 24-də Rəşid Behbudov adına Dövlət Mahnı Teatrında baş tutub. 26 iyun Silahlı Qüvvələr Gününə həsr olunan görüşə hərbi diktor, hərbi-vətənpərvərlik mahnılarının müəllifi və ifaçısı Şəmistan Əlizamanlı dəvət edilib. Görüşdə 44 günlük müha­ribənin qələbə ilə başa çatmasında hər­bi nəğmələrin rolu, gənclərin milli ruhda tərbiyə edilməsi kimi mövzulara toxunu­lub və Ş.Əlizamanlının ifaları dinlənilib. MEMİM-in əməkdaşı Riad Cəbrayılovun moderatorluğu ilə təqdim edilən layihənin növbəti görüşləri də nəzərdə tutulur.

“Musiqidə ədəbi dil normaları” möv­zusunda seminar isə MEMİM-in elmi əhəmiyyət kəsb edən layihələrindəndir. Həmin seminar iyunun 6-da Azərbay­can Respublikası Dövlət Dil Komissiya­sı yanında Monitorinq Mərkəzinin təşki­latçılığı, Ü.Hacıbəyli adına Bakı Musiqi Akademiyası (BMA) və Azərbaycan Musiqi Mədəniyyəti Dövlət Muzeyinin dəstəyi ilə eyniadlı muzeydə keçirilib. Musiqi mətnlərində Azərbaycan ədəbi dil normalarının pozulması hallarının aşkar edilməsi, aktual problemlərin həlli kimi məsələləri əhatə edən semi­nar MEMİM-in sektor müdiri, filologiya üzrə fəlsəfə doktoru Ramil Əhmədovun moderatorluğu ilə baş tutub. Seminarın ekspetləri Monitorinq Mərkəzinin direk­toru, filologiya üzrə elmlər doktoru, pro­fessor Sevinc Əliyeva, BMA-nın prorek­toru, fəlsəfə elmləri doktoru, professor, Əməkdar incəsənət xadimi Gülnaz Abdullazadə, muzeyin direktoru, sənət­şünaslıq üzrə elmlər doktoru, Əmək­dar mədəniyyət işçisi Alla Bayramova, BMA-nın kafedra müdiri, filologiya elm­ləri doktoru, professor Tərlan Quliyev, sənətşünaslıq üzrə fəlsəfə doktoru, Əməkdar artist İlham Nəzərov və Mo­nitorinq Mərkəzinin aparıcı mütəxəssisi Günel Hacıyeva idi.

MEMİM-in növbəti layihəsi cəmiyyət­də bədii zövqün yüksəldilməsinə xidmət edən “Musiqinin psixoloji təsiri” mövzu­sunda elmi-praktik seminar olub. Həmin seminar Bakı Şəhər Mədəniyyət Baş İdarəsi və Beynəlxalq Muğam Mərkəzinin (BMM) dəstəyi ilə iyunun 12-də keçirilib. Musiqinin cəmiyyətdəki rolunu müəyyən­ləşdirməyi, bədii zövqün formalaşdırılma­sını ehtiva edən bu seminara görkəmli oftalmoloq, tibb elmləri doktoru, profes­sor Paşa Qəlbinur, psixologiya üzrə fəl­səfə doktoru, musiqişünas Bahar Bəy­lərova-Ələkbərova, sənətşünaslıq üzrə fəlsəfə doktoru Könül Əhmədova-Yusi­fova öz iştirakları, Türkiyənin neyro-elm mütəxəssisi, professor Sinan Canan isə video formatlı çıxışı ilə rəng qatıblar.

Azərbaycan Respublikası Prezidenti­nin 2022-ci il 4 aprel tarixli “Korrupsiya­ya qarşı mübarizənin gücləndirilməsinə dair 2022–2026-cı illər üçün Milli fəaliy­yət planı”nın təsdiq edilməsi haqqında sərəncamının icrası məqsədilə bu ayın 1-də Mədəniyyət Nazirliyi, Baş Prokuror yanında Korrupsiyaya qarşı Mübarizə Baş İdarəsi və MEMİM-in birgə təşkilatçı­lığı ilə BMM-də korrupsiyaya qarşı müba­rizənin gücləndirilməsinə dair maariflən­dirici seminar da xüsusi qeyd edulməlidir. Korrupsiyaya qarşı Mübarizə Baş İdarəsi Təşkilatı və informasiya təminatı idarə­sinin böyük prokuroru Pirayə Səmədzadə-Əliyeva, idarənin prokurorları İlkin Babazadə və Kamil Kamillinin çıxış etdiyi seminarda mədəniyyət müəssisələrində çalışan əməkdaşlar üçün korrupsiya ilə əlaqədar hüquqpozmalar, onlara görə məsuliyyət və s. məsələlərə toxunulub.

Mədəniyyət naminə dolğun məzmu­na və müasir yanaşmaya malik layihələrə imza atan MEMİM Azərbaycan incəsənə­tinin mühüm şaxəsini təşkil edən teatr sənətindən bəhrələnərək daha bir uğurlu layihəyə imza atıb. Azərbaycan Dövlət Akademik Milli Dram Teatrınının təşkilati dəstəyi ilə keçirilən “Nəsildən-nəslə teatr” mövzusunda tematik seminarın “Öz teat­rını yarat” adlı ilk paneli iyulun 9-da te­atrın kiçik səhnəsində baş tutub. Sahəyə könül vermiş gənclərə teatr işinin təşki­lində sosial-iqtisadi, bədii-konseptual as­pektlərdə yeni yaradıcı tendensiyalar aşı­layan seminarın ilk panelinin moderatoru MEMİM-in əməkdaşı, teatrşünas Dağlar Yusif, qonağı isə Azərbaycan Dövlət Pantomima Teatrının yaradıcısı və bədii rəhbəri, Хalq artisti Bəxtiyar Xanızadə idi. Onu da qeyd edək ki, MEMİM-in digər layihələri kimi, “Nəsildən-nəslə teatr” da silsilə xarakterli olub, çoxsaylı görüşlərini davam etdirəcək.

Göründüyü kimi, sadalanan layihələr MEMİM-in son 3 aylıq fəaliyyətinin qısa məcmusudur. Mərkəz bundan sonra da milli-mənəvi dəyərlərimizin özəyi sayı­lan adət-ənənələri, fərqli sənət növlərini, həmçinin sahə ilə əlaqədar digər aktual mövzuları silsilə layihələr şəklində sənət­sevərlərə təqdim edəcək. 

Səadət TƏHMİRAZQIZI,
Sənətşünaslıq üzrə fəlsəfə doktoru 

Rəfiqə NƏSİROVA,
MEMİM-in əməkdaşı