Lənkəran Dövlət Dram Teatrı 133-cü mövsümünü uğurla başa vurub. Sənət ocağı iyulun 18-də teatrın baş rejissoru Anar Babalının səhnələşdirdiyi, yazıçı və professor Kamal Abdullanın “Casus” pyesi əsasında səhnəyə qoyulmuş eyniadlı tamaşa ilə teatrsevərlərin qarşısına çıxıb.
İyulun 19-da isə mövsümün son tamaşası – görkəmli qırğız yazıçısı Çingiz Aytmatovun “Cəmilə” əsərinin motivləri əsasında hazırlanmış eyniadlı səhnə əsəri nümayiş olunub. Tamaşanın müəllifi rejissor İmran Ali Qurbandır.
Qeyd edək ki, teatr yeni mövsümdə də teatrsevərlərin qarşısına uğurlu tamaşalarla, beynəlxalq festivallardakı çıxışları və digər layihələrlə çıxmağı qarşısına məqsəd qoyub.
Xatırladaq ki, Lənkəran teatrı fəaliyyətə 1891-ci ilin 18 yanvarında N. B. Vəzirovun “Oddan alova” (“Yağışdan çıxdıq, yağmura düşdük”) komediyası ilə başlamışdır. Bundan 41 il sonra, 1930-cu ildən bu sənət məbədi H. Ərəblinskinin adını daşıyır. 1949-cu ildən Xalq Teatrı statusunu qazanmışdır.
Yaradıcı kollektiv son 51 ildə isə 300-əyaxın əsərə səhnə həyatı vermişdir. Azərbaycan və dünya dramaturgiyasının klassik nümunələrini uğurla səhnəyə qoyan teatr fəaliyyəti dövründə bir çox beynəlxalq festivallarında ölkəmizi uğurla təmsil etmişdir.
Fidan SALMANOVA
XQ
