Türkiyə müxbirimiz xəbər verir ki, bu adda konserti qardaş ölkədə fəaliyyət göstərən azərbaycanlı musiqi müəllimləri, “Xarıbülbül” Azərbaycan Vizyon Teatr Birliyinin üzvləri təşkil ediblər. Öncə Azərbaycan və Türkiyənin Dövlət himnləri səsləndirilib, iki qardaş ölkənin şəhidlərinin xatirəsi yad edilib.
“Tək Hədəfimiz Təhsil” Birliyinin rəhbəri Cem Yıldırımer ölkələrimiz arasındakı dostluq və qardaşlığın dünya üçün əsl örnək olduğunu bildirərək deyib ki, bu münasibətlər hər sahədə olduğu kimi, mədəniyyət sahəsində də sağlam təməllər üzərində inşa edilib və bu dəyərləri qoruyub-saxlamaq bizim ən ali vəzifəmizdir.
Tədbirlə bağlı jurnalistlərə müsahibə verən “Xarıbülbül” Azərbaycan Vizyon Teatr Birliyinin rəhbəri Kamalə Kamal Cabbarova deyib: “Belə tədbirlərin keçirilməsi gənclərimizin ortaq mədəniyyətimizə marağının artırılması baxımından olduqca vacibdir. Proqramda fiziki baxımdan qüsurlu övladlarımız da iştirak edirdilər. Bu baxımdan bu üç xanımın hazırladığı konsert proqramı bütün qonaqlarda xoş duyğular oyatdı. Çünki belə tədbirlər həm də bu gənclərin cəmiyyətə inteqrasiyasına kömək edir”.
Konsertdə Azərbaycan və Türkiyə gənclərinin ifasında xalq və bəstəkar mahnıları ilə yanaşı, Avropanın klassik musiqiləri də səsləndirilib. Çıxışlar alqışlarla qarşılanıb.
Qafar ÇAXMAQLI,
XQ-nin xüsusi müxbiri
İstanbul
