Gürcüstanın Borçalı mahalının əhalisi şifahi xalq yaradıcılığının əsas qollarından biri olan ozan sənətinə yüksək qiymət verir, saz ifaçılığının ənənələrini sevə-sevə yaşadır. Burada saz aləti müqəddəs hesab edilir. Hətta yeni doğulan körpənin adına saz bağlanır, uşaqlar ana laylası ilə yanaşı, aşıq havalarının sədaları ilə böyüyürlər.
Təəssüf ki, bu gün Borçalıda saz alətinin hazırlanması – sazbəndlik sahəsində vəziyyət ürəkaçan deyil. Aldığımız məlumatlardan bəlli oldu ki, hazırda bu sənətlə məşğul olan yalnız Bafəli Adıgözəlovdur. Onunla söhbət zamanı dedi:
– Uzun illərdir ki, Gürcüstanda sazımızın, sözümüzün, musiqimizin və mədəniyyətimizin qorunub yaşadılması sahəsində fəaliyyətimi davam etdirirəm. İki qardaş ölkə arasında ədəbi-mədəni əlaqələrin inkişafına, eləcə də Azərbaycan mədəniyyətinin xarici ölkələrdə təbliğinə verə bildiyim töhfələr “Diaspor fəaliyyətində xidmətə görə” medalına layiq görülüb. Buna görə Azərbaycan Prezidenti İlham Əliyevə minnətdarlığımı bildirirəm. Bu medal dövlət başçısının Gürcüstanda yaşayan soydaşlarımıza, sənət adamlarına göstərdiyi qayğı və diqqətin bariz nümunəsidir.
Bafəli Adıgözəlov soydaşlarımız arasında həm də aşıq, zurna ifaçısı kimi məşhurdur. Bafəli müəllim bu gün Borçalı ətrafında sazbəndlik sənətinə marağın olmamasından çox narahatdır:
– Kim istəyirsə, gəlsin, öyrədim. Mən hamıya deyirəm, heç kimdən heç nə güdmədən bu sənəti öyrədərəm, istək olsun, yetər, təki sənət yaşasın.
Azərbaycan Diasporla İş üzrə Dövlət Komitəsinin şöbə rəhbərləri Marneulidə olarkən onunla sazbənd sənətinin inkişafı üçün müasir tipli emalatxananın açılması barədə fikir mübadiləsi aparıblar. B.Adıgözəlov da ümidvardır ki, komitənin dəstəyi ilə sazbəndlik sahəsində yeni nəsil sənətkarların yetişməsi üçün lazımi şərait yaradılacaq və o da bu işə öz töhfələrini verəcək.
XQ