Azərbaycan Milli İncəsənət Muzeyində ekspozisiyanın açılışında mədəniyyət naziri Adil Kərimli, respublikanın tanınmış mədəniyyət və incəsənət xadimləri iştirak ediblər.
Muzeyin direktoru Şirin Məlikova qeyd edib ki, burada, ümumilikdə, 157 rəngkarlıq, qrafika, heykəltəraşlıq və keramika nümunəsi təqdim olunur. Əsərlər XX əsrdə təsviri sənətdə gedən gərgin yaradıcılıq axtarışlarını əks etdirir. Ötən əsrin ilk yarısında milli qrafika sənətinin formalaşmasına böyük töhfələr vermiş, özünəməxsus dəst-xəttə malik rəssamların müxtəlif janr və texnikalarda yaratdıqları silsilə əsərlər təşkil edir. Sərgidə ilk dəfə olaraq Bəhruz Kəngərlinin portret, mənzərə eskiz və rəsmlərindən ibarət albomlar yer alıb.
İnteraktiv xarakter daşıyan sərginin ekspozisiyasında, həmçinin XX əsrin müxtəlif onilliklərində ərsəyə gəlmiş, qrafik əsərlərlə həmahənglik yaradan müəlliflər tərəfindən işlənilmiş keramik fiqurlar və dekorativ boşqablar da nümayiş olunur. Hər bir zalda tamaşaçılar QR kod vasitəsilə aid olduqları yaş qrupunu qeyd edib bəyəndikləri əsərə səs vermək imkanına malikdirlər.
Azərbaycan Rəssamlar İttifaqının sədri Fərhad Xəlilov sərgidə yer alan əsərlərin hər birinin xüsusi əhəmiyyətə malik olduğunu söyləyib. O vurğulayıb ki, muzeydə keçirilən hər görüş, hər yeni sərgi təqdirəlayiq bayrama çevrilir.
Sonda qonaqlar sərgilənən eksponatlarla yaxından tanış olublar.
XQ