M Teatr – “Mənim Teatrım”ın səhnəsində məşhur irland yazıçısı Etel Lilian Voyniçin geniş oxucu kütləsi tərəfindən sevilən “Ovod” əsəri əsasında hazırlanmış eyniadlı tamaşanın premyerası olub.
Bu əsər XIX əsrin 30-cu illərində italyanların işğalçı Avstriya imperiyasına qarşı azadlıq mücadiləsinin fəal iştirakçılarından olan Artur Bertonun faciəli həyatından bəhs edir. “Ovod” təxəllüsü ilə kəskin yazılar yazan bu gənc sonda xalqının istiqlalı uğrunda canından belə keçməyə hazır olan inqilabçı Feliçe Rivarisə çevrilir. Haqqında çıxarılan ölüm hökmünün dəyişdirilməsi qərarı da onu mübarizəsindən döndərə bilmir.
Yeni tamaşanın quruluşçu rejissoru M Teatrın rəhbəri Vidadi Həsənov, bəstəkarı Əli Cəfərzadə, səs rejissoru Fəyyaz Ələkbərovdur. Əsas rolları Xalq artisti Vidadi Həsənov, Əməkdar artist İlqar Cahangir, aktyorlar Ziya Ağa, Oksana Rəsulova, Tural Rzayev, Şamil İbrahimov, Cavid Baba və Ramiz Qəmbər ifa edirlər.
Əsərin növbəti tamaşaları iyunun 7–8 göstəriləcək.
S.FİDAN
XQ
