Mədəniyyət Nazirliyinin təşəbbüsü ilə Sumqayıt Dövlət Dram Teatrında tanınmış teatr və kino rejissoru Rövşən Almuradlının 70 illiyinə həsr olunmuş bədii gecə keçirilib.
Öncə monitorda mərhumun həyat və yaradıcılığı ilə bağlı foto-video fraqmentlər göstərildi. Sonra tədbirin aparıcısı Əməkdar artist Cəlal Məmmədov Rövşən Almuradlının yaradıcılıq fəaliyyətindən bəhs etdi. Sumqayıt Dövlət Dram Teatrının baş rejissoru, Xalq artisti Firudin Məhərrəmov ötən əsrin sonlarından tanıdığı Rövşən Almuradlının yaradıcılığının səciyyəvi cəhətlərini vurğuladı. Onun quruluş verdiyi “Dəyirman”, “Bayramın birinci günü”, “Qətl günü” və s. tamaşalarının fərqli keyfiyyətləri qeyd edildi. Ustad rejissorun hər zaman gənclərə tükənməz enerji ötürdüyü bildirildi.
Milli Məclisin üzvü, Xalq şairi Sabir Rüstəmxanlı milli mücadilə mövzusunda əsərlərin səhnə və ekran həllində rejissor dostunun rolunu dəyərləndirdi. Onun “Ölüm zirvəsi” romanının motivləri əsasında Rövşənin çəkdiyi “Cavad xan” bədii filmini qeyd etdi. BDU-nun professoru, Əməkdar jurnalist Qulu Məhərrəmli mərhum yubilyarın şəxsiyyəti ilə yaradıcılığının mükəmməl vəhdətinin təsvirini verdi. AJB-nin sədri Elçin Şıxlı bildirdi ki, Rövşən Almuradlı yaradıcılığının mayasında Vətən sevgisi, Turan sevdası, müdrik insan sevgisi dayanırdı. Milli Məclisin üzvü Müşfiq Məmmədli tanınmış rejissorun hər zaman tarixi irsə, qan yaddaşına sadiq olduğunu söylədi. Xanəndə, Əməkdar artist Nuriyyə Hüseynova ifası ilə məclisi rövnəqləndirdi. İstedadlı aktyor Cavidan Novruz “Cavad xan” filminin çəkilişləri ilə bağlı xatirələrini bölüşdü.
Sonda mərhum sənətkarın çox sevdiyi Ramiz Rövşən yaradıcılığından nümunələri musiqi notları üstündə bəstəkar-ifaçı, rejissor Rövşən Nicat təqdim etdi.
Ə.ƏLİYEV
XQ