Qarabağ Dirçəliş Fondunun (QDF) təşəbbüsü, Mədə­niyyət nazirliyi və Dövlət Rəssamlıq Akademiyasının dəstəyi ilə “Qarabağın Rəngləri” adlı yeni layihəsinin icrasına başlanıb. Məqsəd ölkə ictimaiyyətinin işğal­dan azad edilmiş ərazilərin bərpası kimi mühüm bir missiya ətrafında birləşərək, bərpa-quruculuq işlərinə töhfə verə bilməsi və ən əsası, bu torpağın gözəlliyinin, Azərbaycan xalqının mədəni irsinin təbliğidir. 

Bu günlərdə Rəssamlq Akade­miyasında layihənin, rəsmlərdən ibarət kataloqun və eyniadlı saytın təqdimatı keçirilib. Bildirilib ki, layihə çərçivəsində Rəssamlıq Akademiyasının tələbəsi olan 23 nəfər istedadlı gənc rəssam və heykəltaraşın Qarabağın ruhunu özündə birləşdirən sənət əsərləri – 19 rəsm və 4 heykəl ərsəyə gətiri­lib. Həmin gənc rəssam və heykəl­taraşları 200-dən artıq Akademiya tələbələri arasında keçirilən açıq müsabiqə vasitəsilə təsviri in­cəsənətimizin məşhur simaların­dan ibarət münsiflər heyəti seçib. Yaradıcılıqla bağlı tələb olunan bütün xərclər və tələbələr üçün xüsusi təqaüdlər Qarabağ Dirçəliş Fondunun dəstəyi ilə qarşılanıb.

Qeyd edək ki, Qarabağ sev­gisi ilə hazırlanan və sarsılmaz ruhumuzun ifadəsi olan sənət əsərlərinin bir hissəsi artıq sa­tışa çıxarılıb. Gənc müəlliflərin yağlı, akril boya ilə və gildən vasitəsilə hazırladıqları sənət əsərləri Qarabağın füsunkar mənzərəsini, tarixi abidələrinin səssiz hekayələrini, mədəni ir­sin döyünən nəbzini özündə bir­ləşdirir. Yaradıcılıq fantaziyası ənənəvi sərhədləri aşaraq təkcə mənzərələri deyil, həm də dərin təfəkkür və düşüncələrin mahiy­yətini əhatə edir. Əsərlər insanda fərqli emosiyalar oyadır, Qara­bağ üçün ümidli, parlaq gələcəyi, dirçəliş və çiçəklənmə istiqamə­tində ümumi yanaşmanı təlqin edir. “Tarixin ruhu”, “Əbədi gözətçi”, “Qarabağın lalələri”, “Ədən bağı”, “Qırxqız yaylağı”, “Qarabağ şikəstəsi”, “Vətənin əks-sədaları” , “Dağların melodi­yası” kimi rəsmlər, eləcə də “Qa­rabağın izləri”, “Ümid körpüsü”, “İşıltılı zaman” və “Ruhların səsi” heykəltəraşlıq əsərləri bu baxımdan diqqətəlayiqdir. 

Xüsusi qala gecəsi çərçivəsin­də təşkil olunacaq xeyriyyə hərra­cı vasitəsilə alıcılara təqdim edilə­cək və geniş ictimaiyyət üçün sərgilənəcək. Müəlliflər Fatimə, Rasimə, Banu Çiçək, Samirə, Ra­him, Ruslan və başqalarıdır. 

Əsərlərin satışından toplanan bütün vəsait Ağdam rayonunun ərazisində yerləşən və hazırda Qarabağ Dirçəliş Fondunun ma­liyyə dəstəyi ilə bərpa olunan Pə­nahəli xanın İmarət kompleksinin bərpasına yönəldiləcək.

Ə.DOSTƏLİ
XQ