Onların adına ilk dəfə Azərbaycan Respublikasının Diasporla İş üzrə Dövlət Ko­mitəsinin illik hesabatında rast gəldik. Xocalı soyqırımı ilə bağlı tədbirlər sırasın­da Londonda yaşayan soydaşlarımızın faciə qurbanlarının xatirəsinə “Chiquilin de Bachin” əsərinin videoklipini təqdim etdikləri bildirilir və qeyd olunurdu ki, əsəri Səadət Fərziyeva (piano), Rasim Fərziyev (kamança) və Tereza Mostallino (kaman­ça) ifa ediblər. 

Maraqlanıb öyrəndik ki, hazırda London sakinləri olan Səadət və Rasim Fərziyevlər Sumqayıtda doğulub böyü­müş cütlükdür. Onlar ilk olaraq gənclik şəhərindəki musiqi məktəblərini bitiriblər. Səadət xanım fortepiano, Rasim bəy isə kamança (eyni zamanda skripka) alət­lərində ifa etməyi dərindən öyrəniblər. Tədricən sevgi dolu ifaları ilə ətrafa səs salıblar.

Səadət xanım bir müddət Sumqayıt­dakı Bülbül adına 2 nömrəli İncəsənət Məktəbində pedaqoq, şöbə müdiri olub. Yetirmələri dövlət tədbirlərində və kon­sertlərdə uğurla çıxış ediblər. Rasim bəy də Azərbaycan musiqilərini, xarici bəstə­karların əsərlərini iki alətdə ifa edərək konsertlərdə, hətta xarici publikanın qar­şısında layiqincə təqdim edib.

Səadət Fərziyeva özünü bəstəkarlıq sahəsində də sınayıb. Qoşduğu mahnı­ları ilk olaraq anasına oxuyub. Bu həvəsi qetdikcə artıb və musiqiçi öz mahnılarına mətnlər də yazmağa başlayıb. Dərs de­diyi bağçada, musiqi məktəbində bunları balacalara həvəslə öyrədib. Mahnıların­da vətən, ana, nənə-babaya sevgi və s. mövzular yer alıb. Müsabiqələrdə uğurlar qazanıb. Onun bəstəkarlıq yaradıcılığın­da uşaq mahnıları, fortepiano üçün pyes­lər xüsusi yer tutur. Xalq artisti, bəstəkar Oqtay Zülfüqarov, Əməkdar incəsənət xadimi, professor Gülnaz Abdullazadə və başqaları Səadətin istedadını yüksək dəyərləndiriblər. 

Səadət xanımın dedikləri: “Daim musiqi sədaları ilə nəfəs almışam. Evdə Azərbaycan xalq, bəstəkar mahnıları­nı eşidib sevə-sevə dinləmişəm. Anam bağça müdiri olsa da, musiqi vurğunu idi və bu, mənə də sirayət edib. Anamın hə­zin səslə oxuduğu nəğmələrin, danışdığı nağılların təsiridir ki, uşaq mahnılarına ruhən daha yaxınam”. 

Düz 26 il əvvəl Üzeyir Hacıbəyli adına Bakı Musiqi Akademiyasını (BMA) bitirən musiqiçi orada “Azərbaycanın Cənub bölgəsinin “Halay” rəqs mahnıları” möv­zusunda dissertasiya müdafiə edərək sənətşünaslıq üzrə fəlsəfə doktoru elmi dərəcəsi alıb. Rasimlə birlikdə Cənuba ekspedisiyasından sonra çap etdirdiyi “Halay kitabı”nda 70-ə yaxın əmək, toy və mərasim, sevgi və əzizləmə, beşik mahnıları və ağıları nota alıb. Səadət xanım 2011-ci ildən BMA-da böyük elmi işçi, daha sonra dosent kimi çalışıb, ha­zırda doktoranturada dəyərli mövzuda araşdırma işi aparır. Azərbaycan xalq mahnılarının səs və fortepiano üçün iş­lənməsi və Cənub bölgəsinə aid mah­nıların sözlərinin ingilis dilinə tərcüməsi, sonradan kitabın İngiltərədə çap olunma­sı da onun böyük uğurlardandır. 

“Uşaq mahnıları-2013” müsabiqəsi­nin qalibi olması Səadət Fərziyevanın qarşısında yeni üfüqlər açıb. Həmin mü­sabiqədən sonra onun “Xoş gəlmisən, Novruzum”, ”Dostluq himni”, “Qaranguş” və s. mahnıları geniş yayılmağa başlayıb və uşaq xor kollektivlərinin repertuarına salınıb, bu günə qədər də bağçalarda, məktəblərdə həvəslə ifa olunur.

Fərziyevlər 2016-cı ildən Londonda yaşayıb-yaradırlar. İlk gündən orada bir çox uşaq tədbirlərində çıxış edərək öz­lərini peşəkar musiqiçi, yüksək səviyyəli müəllim kimi tanıdıblar. Hər çıxışdan son­ra “Haradansınız?” sualına cavab olaraq “Azərbaycandanıq” deməkdən qürur duyurlar. Skripka, kamança, fortepiano, musiqi nəzəriyyəsi, vokal dərslərini təq­dim edən bu cütlük şagirdlərini özlərinin maraqlı metodu ilə öyrədir və bu, onların imtahanlarda əla nəticələr əldə etmə­sinə səbəb olur. Müəllimlər bu uğurlara şaqirdlərdən və valideynlərdən az sevin­mirlər. 

Prezident İlham Əliyevin Şuşada keçirilən Dünya Azərbaycanlılarının V Qurultayında səsləndirdiyi tövsiyələrdən sonra dünyanın müxtəlif ölkələrində fəa­liyyət göstərən həftəsonu Azərbaycan məktəblərinin sayı artıb. Birinci vitse-pre­zident Mehriban Əliyevanın təşəbbüsü, Diasporla iş üzrə Dövlət Komitəsinin, diaspor fəaliyyəti ilə tanınan Britaniya Azərbaycanlıları Cəmiyyətinin rəhbəri Fəridə Pənahovanın təşkilatçılığı ilə Lon­donda “Qarabağ” məktəbinin yaradılması orada yaşayan azərbaycanlıları çox se­vindirib. Məktəbdə Azərbaycan dili, tarixi, rəsm dərsləri ilə yanaşı, musiqi və xor dərsləri də öyrədilir. 

“Qarabağ”ın musiqi rəhbərləri Səadət və Rasim Fərziyevlərdir. Amalları balaca soydaşlarımıza ana vətənlərini tanıtmaq, dillərini inkişaf etdirmək və milli varlıqla­rını unutmağa qoymamaqdır. Məktəbdə oxuyan uşaqların arasında, təbii ki, vali­deynlərindən biri xarici millətdən olanlar da var. Sevindirici hal həmin valideynlə­rin də Azərbaycan mədəniyyətinə, dilinə maraqlarının artmasıdır. Səadət Fərzi­yeva özünün yaratdığı “Muzlogopedika” proqramı ilə millətindən asılı olmayaraq, ingilis dilli uşaqların azərbaycanca sözlə­ri düzgün söyləməsinə yardım edir. Belə­cə, balacalar dilimizi şeir və mahnılarla öyrənə bilirlər. 

Çoxmillətli kollektivdə işləmək və uşaqlara dərs demək elə də asan deyil. Rasim Fərziyev isə skripka ilə yanaşı, Azərbaycanın milli aləti olan kamancanı valideyn və tələbələrinə böyük məhəb­bətlə təqdim edib sevdirir. Baxdığımız videolentlərdən də gördük ki, xalq mah­nılarımızın, rəqslərimizin, mahnıdan mahnıya keçidlərdə muğam hissələrinin ifası valideynləridə, uşaqları da valeh edir, onların bu alətlə yaxından tanış ol­masına səbəb olur ki, bu da öz növbəsin­də Azərbaycan mədəniyyətini dünyaya tanıtmaq fürsətidir. 

Fərziyevlər Böyük Britaniyada yur­dumuzun təbliği üçün əllərindən gələni əsirgəmirlər. Zəfər, Novruz bayramı, Xo­calı və s. mövzularla bağlı olan tədbirlə­rin çoxluğu onların əsl vətənpərvərliyinin göstəricisidir. Səadət xanım Azərbayca­nın tanınmış bəstəkarlarının mahnıları ilə yanaşı, öz əsərlərini də uşaqlara öyrədir. Odur ki, hər kəs məktəbə canı-könüldən bağlıdır. Uşaqlar mahnıları sevərək öy­rənir, valideynlərsə ev tapşırıqlarını yax­şı yerinə yetirmək üçün onlara sonsuz həvəslə kömək edirlər. Artıq məktəbin bir cox tələbəsi solo ifaçısı kimi yetişərək, konsertlərdə gözəl, canlı performansını təqdim etməyə başlayıb. 

Britaniya Azərbaycanlıları Cəmiy­yətinin rəhbəri Fəridə Pənahovanın dediyinə görə, Rasim müəllimin Lon­dondakı yetirmələri arasında fiziki əngəl­li – görmə qabiliyyəti olmayan bir uşaq da var. İngilis müəllimlər onu öyrətməyə həvəssiz olublar. Rasim müəllim isə uşaqdan himayəsini əsirgəməyib və o da yaşına görə mahir kamança ifaçısı kimi, çox ciddi imtahan qurumlarının sınağın­dan bacarıqla keçib. Bu, pedaqoq soyda­şımızın ictimai nüfuzunu daha da artırıb. 

Söhbət zamanı Rasim Fərziyev belə bir vətənpərvərlik şüarını dilə gətirdi: “Bizim silahımız milli mədəniy­yətimizdir! Ona görə də mədəniyyətimi­zi dünyaya tanıtmaq hər bir Azərbaycan vətəndaşının, xüsusilə də xaricdə yaşa­yan soydaşlarımızın ülvi borcudur!” 

“Qarabaq” məktəbi şagirdlərinin illik yekun konsertində və “Heydər Əliyev – 100” tədbirində Azərbaycanın Birləşmiş Krallıqdakı səfirliyinin, yerli ictimaiyyətin, soydaşlarımızın və ölkəmizə dost xalq­ların icma nümayəndələrinin qarşısında çıxışı xüsusilə xoş təəssürat yaradıb. “Qarabağ”lılar Xalq artisti Gülyanaq Məmmədova ilə rəngarəng proqram təq­dim ediblər. Tədbirin musiqi təşkilatçısı Rasim Fərziyev olub. Gecədə ingilis və Azərbaycan dillərində canlı ifalarda səs­lənən “Dostluq himni” və vətənpətvərlik mahnıları bütün qonaqlara xoş təsir ba­ğışlayıb. Uşaqların dili ilə müharibələrə yox deyilməsi, bütün dünyada yaşayan insanların sülhə çağrılması sürəkli alqış­lara səbəb olub. 

Həmsöhbətlərim peşəkar musiqiçi kimi yetişmələrinə, Londanda nüfuzlu xa­rici auditoriyada yüksələrək hörmət qa­zanmalarına görə Vətənə borclu olduq­larını dönə-dönə vurğuladılar. Dedilər ki, azərbaycanlı olmaları ilə fəxr edirlər və Vətənimizin, xalqımızın adını hər zaman ucaltmaq üçün bindan sonra da əllərin­dən gələni əsirgəməyəklər. 

Əli NƏCƏFXANLI
XQ