Mədəniyyət Nazirliyinin təşəbbüsü ilə teatrların bölgələrə qastrol səfərləri davam edir. Azərbaycan Dövlət Gənc Tamaşaçılar Teatrı yaradıcı heyətinin Sumqayıta monotamaşa ilə səfəri uğurlu keçib.
Seyrçilər gənc dramaturq Ülviyyə Heydərovanın qələmə aldığı “İnanıram” monopyesinı rejissor Elşad Rəhimzadənin traktobkasında maraqla tamaşa ediblər. İstedadlı aktrisa Zemfira Əbdülsəmədova Vətən sevgisini bütün duyğulardan üstün tutan şəhidlərimizə və onların analarına həsr edilən səhnə əsərində Şəhid anasının iztirablarını məharətlə çatdıra bilib.
Monotamaşanın quruluşçu rejissoru və səhnə tərtibatçısı Elşad Rəhimzadə, musiqi tərtibatçısı Aygül Quliyeva, rejissor assistenti Sona Mustafayevadır. Xatırladaq ki, ötən il Qırğızıstanın paytaxtı Bişkek şəhərində keçirilən “ART - ORDO 2023” IX Teatr Festivalında “İnanıram” xüsusi mükafata, aktrisa Zemfira Əbdülsəmədova isə Şəhid anası roluna görə “Ən yaxşı qadın” nominasiyası üzrə mükafata layiq görülüb.
Tamaşa müharibədə yeganə oğlunu itirmiş qadından bəhs edir. Qadın bir dağ kəndində arxeoloji ekspedisiyada iştirak edərkən, yamacda təkbaşına boy atmaqda olan bir ağac görür. Gənc arxeoloq bu ağacın kölgəsində oturarkən ana olacağını öyrənir. Məhz bu məqamdan sonra qadınla ağac arasında mənəvi bağ yaranır. Amma qadın müharibə səbəbindən arxeoloji qazıntı ərazisindən uzaq düşür. O, həmişə arzulayır ki, işğal altında qalan dağ yamacındakı bu ağacı oğluna göstərə bilsin. İllər sonra qadının oğlu həmin ərazini işğaldan azad edərkən, anasının çox bəhs etdiyi ağacı tanımadan şəhid olur. Qadın isə ürəyindəki dərin ağrı və qəbul etdiyi qəti qərarla ağacın kölgəsinə geri dönür.
Sumqayıt tamaşaçıları monotamaşanı və onun yaradıcılarını alqışlarla qarşılayıblar.
Ə.DOSTƏLİ
XQ