“Qələbə” – 100
Bölgə mediasının “ağsaqqal”larından sayılan Salyanın “Qələbə” qəzeti bölgənin ictimai-siyasi və mədəni həyatında mühüm rolu olan mətbu orqandır. İlk nömrəsi tarixi sənəd kimi Əli bəy Hüseynzadə adına Salyan Rayon Tarix-Diyarşünaslıq Muzeyində qorunan qəzet 1924-cü il fevral ayının 21-də “Qırmızı Muğan” – “Krasnıy Muqan” adı ilə Azərbaycan və rus dillərində nəşrə başlamışdır.
Salyan Qəza Partiya və İcraiyyə komitələrinin orqanı kimi, qəzet uzun illər insanların yeganə informasiya mənbəyi olmaqla bərabər, bölgənin ictimai-siyasi salnaməsini yarada bilmişdir. Yüz il əvvəl qəza mərkəzi olan Salyanda gedən proseslər haqqında məlumatları özünün saralmış səhifələrində bu gün də yaşadan bu orqan zaman-zaman tarixi proseslərdə ideoloji tribuna olmuş, kollektiv təbliğatçı, təşviqatçı və təşkilatçı rolunu oynamışdır.
Yubilyar qəzet müxtəlif dövrlərdə ayrı-ayrı adlarla fəaliyyətini davam etdirmişdir. 1930-cu ildən 1960-cı ilə kimi “Sosializm yolu”, 1962–1965-ci illərdə “Məhsul”, 1965–1992-ci illərdə “Qələbə”, 1992–1993-cü illərdə “Günaydın” adlanıb. 1994-cü ilin yanvar ayından isə yenidən “Qələbə” adı ilə nəşr edilir. İndiyədək qəzetin 8 min 700-dən çox sayı işıq üzü görmüşdür.
İlk redaktoru Andrey Novaxatski olan qəzetimizin bir əsrlik fəaliyyəti ərzində ona 11 redaktor rəhbərlik etmişdir. Tağı Məmmədov, Şirinbala Süleymanov, Əfsərağa Məmmədov, Sahib Səfərov, Mahmud Ağalarov, Məhəmməd Xəlilbəyli, Akif Quliyev, Fərqanə Cəbrayılova qəzetin redaktoru olduqları dövrlərdə regionda mətbu orqanın dövrün tələbləri səviyyəsində fəaliyyəti üçün böyük əmək sərf etmişlər. Artıq 20 ilə yaxındır ki, “Qələbə”yə bu sətirlərin müəllifi rəhbərlik edir.
Qəzetimiz bütün dövrlərdə zamanın aynasına çevrilmiş, cəmiyyətin həyatında baş verən yenilikləri, mütərəqqi hadisələri işıqlandırmış, nöqsanlara qarşı prinsipial mövqe bildirmiş, qabaqcıl təcrübələrin təbliğatçısı olmuşdur. Bölgəmizin tanınmış elm və sənət adamları, ziyalıları, yazıçıları ilk qələm nümunələrini məhz "Qələbə" qəzetində çap etdirmişlər. Bu gün adı xüsusi hörmətlə çəkilən, respublikamızın ədəbi, ictimai-siyasi həyatında xidmətləri olmuş “İstiqlal” ordenli Xalq şairi Xəlil Rza Ulutürk, Əməkdar incəsənət xadimi Əliağa Kürçaylı, Əməkdar müəllim, şair Oqtay Rza, Əməkdar mədəniyyət işçiləri – aşıq Pənah Pənahov və Əliqismət Lalayev, Azərbaycan Yazıçılar Birliyinin üzvləri Ağacavad Əlizadə, İmamverdi Əbilov və onlarca digər ziyalımızın ictimai mühitə, ədəbiyyat və poeziyaya gedən yolu məhz bizim rayon qəzetindən başlamışdır.
“Qələbə” qəzeti respublikamızda tanınmış çoxlu sayda jurnalist kadrlarının yetişməsində mühüm rol oynayıb. Jurnalistlərdən Vaqif Əliyev, Əlövsət Bəşirov, Səxavət Qarayev, Səfər Səfərov, Ziyafət Babayev, Rəhim Hüseynzadə, Qulam Sadiq, Tofiq Kərim, Seyran Cavadov, Fərman Əliyev, Eldar Əliyev, Akif Bayramoğlu, Fazil Qəhrəmanov, Fəxrəddin Fərzəliyev,Təyyar Nəsirli və başqaları regionda sözün ilk məbədi olan doğma qəzetdən xeyir-dua almışlar.
Qəzetin fəaliyyətinin 35 ili məhz Ümummilli liderimiz Heydər Əliyev kimi nəhəng şəxsiyyətin fəaliyyəti, onun qurub-yaratdığı Azərbaycanın tərəqqisinin təbliği ilə, doğma respublikamızın bir parçası olan Salyanın mədəni-ictimai və siyasi həyatının salnaməsinin yaradılması ilə bağlı olmuşdur. Ona görə də tarixi yubileyini qeyd etməyə hazırlaşdığımız “Qələbə” qəzetinin həyatında yaddaqalan hadisələr, tarixi günlər çoxdur. Sözsüz ki, onların ən şərəflisi də ulu öndərin Salyana səfərlərinin işıqlandırılması, bu mühüm tarixi hadisələrin rayon səviyyəsində salnaməsinin yaradılmasıdır.
Ümummilli lider Azərbaycana rəhbərlik etdiyi illər ərzində 5 dəfə Salyanda olmuş, rayonun sosial-iqtisadi inkişafına dair bir çox mühüm sənədlər, qərarlar, sərəncamlar imzalamışdır. Salyanlılar qürurla xatırlayırlar ki, 1969-cu ilin tarixi iyul plenumunda Azərbaycanın rəhbəri seçilən Heydər Əliyevin dövlət başçısı kimi ilk dəfə səfər etdiyi rayon Salyan olmuşdur. Həmin tarixi günlər həm salyanlıların, həm qəzetin və əməkdaşların həyatında silinməz izlər buraxmışdır. “Qələbə” qəzetinin əməkdaşları o tarixi günlərdə dahi rəhbərlə birlikdə olmuş, redaksiyanın tapşırıqlarını yerinə yetirmişlər.
Ulu öndər Heydər Əliyevin layiqli davamçısı, Prezident İlham Əliyevin də rayonumuza səfərləri, ictimaiyyət nümayəndələri ilə görüşləri, rayonun sosial-iqtisadi inkişafı barədə sərəncamları salyanlılarda həmişə yüksək əhval-ruhiyyə, qurub-yaratmaq əzmi yaratmışdır. Son illər rayonda aparılan genişmiqyaslı abadlıq və quruculuq işləri, həyata keçirilən dövlət layihələri qəzet əməkdaşlarına çox maraqlı və rəngarəng mövzular vermişdir.
Təbii ki, möhtərəm Prezidentimiz, Ali Baş Komandan İlham Əliyevin rəhbərliyi ilə Vətən müharibəsində böyük qələbəmiz, şəhidlərimizin qəhrəmanlığı, qazilərimizin hünəri qəzetimizin son dövr fəaliyyətində əsas yer tutur. Azərbaycanın ərazi bütövlüyünün təmin edilməsində 70 nəfərə yaxın şəhidi, onlarla qazisi olan, beş oğlunun Vətən Müharibəsi Qəhrəmanı adına, yüzlərlə hərbi qulluqçusunun yüksək orden və medallara layiq görülməsi vətənpərvərlik ruhunda yazılar hazırlayan qəzet əməkdaşlarımız üçün daimi mövzulardır.
“Qələbə” respublikamızın ictimai-siyasi həyatında yaxından iştirak edir. Qəzet 2007-ci ildən Azərbaycan Mətbuat Şurasının üzvüdür. Şuranın qurultaylarında, regional tədbirlərində və müxtəlif yaradıcılıq müsabiqələrində yaxından iştirak edir.
Qəzetimiz Salyan Rayon İcra Hakimiyyətinin aparatının diqqət və qayğısını həmişə hiss edir. 22 İyul Milli Mətbuat Günü, jurnalistlərin, ziyalıların yubileyləri bir qayda olaraq yüksək səviyyədə qeyd olunur. RİH başçısı Sevindik Hətəmovun qəzetin fəaliyyətinə, onun əməkdaşlarına göstərdiyi qayğıkeş münasibət hər birimizə daha fəal və məhsuldar çalışmaq, qəzeti yaşatmaq üçün stimul verir.
“Qələbə” qəzetinin kollektivi texniki dəstək, abunə, çap və digər qayğıları ilə bərabər, 100 illik fəaliyyətinə yüksək əhval-ruhiyyə ilə başa vurur və yeni onillikləri də fəth etmək əzmindədir.
Rüstəm MƏLİKOV,
“Qələbə” qəzetinin baş redaktoru, “Tərəqqi” medallı, Ali Media Mükafatı laureatı
