Gəncədə Heydər Əliyevin anadan olmasının 100 illiyi ilə əlaqədar "Xurşidbanu Natəvan" pyesi əsasında hazırlanmış tamaşa nümayiş olunub.
Tamaşa Gəncə Dövlət Universitetinin Tələbə Gənclər Təşkilatının tələbələrinin təqdimatında nümayiş olunub.
Tamaşanın hazırlanmasında məqsəd Şuşa şəhərinin 2023-cü il üçün “Türk dünyasının mədəniyyət paytaxtı” elan edilməsi ilə bağlı tədbirlər haqqında Prezidentin Sərəncamının icrası və “2015-2025-ci illərdə Azərbaycan gənclərinin İnkişaf Strategiyası”nın təsdiq edilməsi haqqında ölkə başçısının Sərəncamı ilə əlaqədar Strategiyanın hədəf qrupları olan yaradıcı, istedadlı gənclərə dəstək olmaq və gənclərin asudə vaxtının keyfiyyətinin yüksəldilməsinə şərait yaratmaq olub.
Tamaşaya baxdıqdan sonra gənclərlə görüşdə qeyd olunub ki, Ulu öndər Heydər Əliyev gənc yaşlarından teatra çox bağlı idi. Ümummilli lider müntəzəm olaraq teatr tamaşalarına baxır, yaradıcı heyətlə görüşür, tövsiyələrini verirdi. 1981-ci ildə görkəmli dramaturqumuz İlyas Əfəndiyevin “Xurşidbanu Natəvan” pyesinin tamaşasına Azərbaycan KP MK-nin büro üzvləri ilə birlikdə baxan Heydər Əliyev əsərin və tamaşanın orjinal təhlilini vermiş, ifaçılara öz fikirlərini söyləmişdi: “Siz ilk növbədə Natəvan – bu şairə haqqındakı şaiyələrə son qoydunuz. Natəvanı gözəl Azərbaycan qadını kimi bizə təqdim elədiniz, bununla yanaşı, gözəl xan qızının timsalında siyasi baxımdan və onun xan qızına layiq hərəkətləri ilə bizim şərq qadınlarının obrazını yarada bildiniz. Mən buna görə sizə sağ ol deyirəm. Həm də son monoloqunuza görə sağ ol deyirəm”.
Tamaşa izləyicilər tərəfindən böyük rəğbət və alqışlarla qarşılanıb.
Hamlet QASIMOV,
XQ-nin bölgə müxbiri