Mədəniyyət Nazirliyi Respublika “Xatirə kitabı” redaksiyasının layihəsi əsasında çəkilmiş növbəti 4 film nümayiş olunub. 

Filmlər Vətən müharibəsində həlak olmuş Murad Əsədov, Dəyanət Əliyev, Toğrul Abbasov və Mətləb Quliyevin şərəfli həyat və döyüş yolunu özündə əks etdirir. Ağcabədi rayonunda dün­yaya gəlmiş bu igidlər 44 günlük Zəfər yürüşünün qəhrəman yolçularıdır.

Nizami Kino Mərkəzində keçirilən təqdimat mərasimində çıxış edənlər – Milli Məclisin deputatı Aydın Hüsey­nov, Azərbaycan Mətbuat Şurası İdarə Heyətinin üzvü, “Bakı-Xəbər” qəzetinin baş redaktoru Aydın Quliyev, Müdafiə Nazirliyinin Şəxsi Heyət Baş İdarəsinin şöbə müdiri Zümrüd Səmədova, “Xatirə Kitabı” redaksiyasının baş redaktoru Nəzakət Məmmədova, filmlərin ssena­ri müəllifi və rejissoru Vüsal Nuru çıxış ediblər. Natiqlər şərəf tariximizin qızıl səhifələrini yazmış şəhidlərin örnək hə­yat yolunun işıqlandırılmasının əhəmiy­yətindən danışıblar. “Vətən daşı... və ya 44 günün dastanı” layihəsinin dəyərli təşəbbüs olduğu vurğulanıb.

Sonra şəhidlər Murad Əsədov, Də­yanət Əliyev, Toğrul Abbasov və Mətləb Quliyevin qısa, lakin şərəfli həyat və döyüş yolunu əks etdirən silsilə filmlər nümayiş olunub. Sənədli kadrlar ana qucağı qədər əziz, ana nəfəsitək doğ­ma olan Vətən sevgisi haqqında Xalq şairi Məmməd Arazın məşhur “Vətən daşı olmayandan olmaz ölkə vətənda­şı...” misralarına sığınaraq döyüşlərə atılan oğulların igidliklərini bədii boya­larla əks etdirib. 

Qeyd edək ki, son üç ildə Respub­lika “Xatirə Kitabı”nın bu mövzuda 20 cild kitabı çap olunub və 12 filmi ər­səyə gətirilib. Bütün bunlar göstərir ki, həqiqətən də, heç kim unudulmur, heç nə yaddan çıxmır.

Ə.DOSTƏLİ
XQ