Azərbaycan Turizm Bürosu Özbəkistanın Daşkənd şəhərində “İpək Yolu üzərində turizm” mövzusuna həsr edilmiş Beynəlxalq Turizm Sərgisində (TIFF) təmsil olunur. Milli stenddə ölkəmizi ümumilikdə 7 yerli turizm sənayesi tərəfdaşı təmsil edir. Məlumatı Turizm Bürosu verib. 

Ziyarətçilərə Azərbaycanın tarixi, mədəni irsi, milli mətbəx nümunələri, dağ-xizək mərkəzləri, şərabçılıq, sağlamlıq və qış turizmi imkanları haqqında ətraflı məlumat verilir, xarici turizm sənayesi nümayəndələri ilə B2B formatlı görüşlər keçirilir.

Sərgi çərçivəsində keçirilən sessiya zamanı Dövlət Turizm Agentliyi sədrinin müşaviri Kənan Quluzadə İpək Yolunun turizm məhsuluna çevrilməsinin əhəmiyyətindən bəhs edən təqdimatla çıxış edib.

Daşkənd Beynəlxalq Turizm Sərgisi (TIFF) Özbəkistan və Mərkəzi Asiya regionunda turizm sənayesinin əlamətdar tədbirlərindən biri hesab olunur.

Noyabrın 17-dək davam edəcək sərgidə 1500 iştirakçının, dünyanın bir sıra ölkələrindən ümumilikdə 15 mindən çox ziyarətçi və turizm sənayesi nümayəndəsinin qatılacağı gözlənilir.

Qeyd edək ki, 2023-cü ilin yanvar-oktyabr dövrü ərzində Özbəkistandan Azərbaycana səfər edən turistlərin sayı 31 416 nəfər təşkil edib ki, bu da ötən ilin eyni dövrü ilə müqayisədə 52 faiz artım feməkdir.

Ümumilikdə cari ilin yanvar-oktyabr dövründə Mərkəzi Asiya regionundan Azərbaycana səfərlərin sayı 108 516 olub və bu, ötən ilin eyni dövrünə nisbətdə 85 faiz çoxdur.

P.ƏMİRCANOV

XQ