Daşkənddəki Özbəkistan Dövlət İncəsənət Muzeyi ilə Azərbaycan Milli İncəsənət Muzeyi arasında əməkdaşlıq haqqında memorandum imzalanıb.
Sənəd Azərbaycan Milli İncəsənət Muzeyinin direktoru Çingiz Fərzəliyev və Özbəkistan Dövlət İncəsənət Muzeyinin direktoru Vasila Fayziyeva tərəfindən imzalanıb. Tərəflər dost və qardaş olan iki ölkə arasında mədəni əlaqələrin genişlənməsindən məmnunluğunu ifadə edərək, bu sazişin muzeylər arasında gələcək əlaqələrin inkişafına, təcrübə mübadiləsinə öz layiqli töhfəsini verəcəyinə əmin olduqlarını qeyd ediblər.
Sənədə əsasən, 5 il müddətində muzeylər arasında elmi-tədqiqat və bərpa-konservasiya işinin aparılması, muzey işçilərinin təcrübə mübadiləsi, konfrans, seminar və treninqlərin keçirilməsi, birgə sərgilərin təşkili, elektron kataloqların yaradılması kimi məsələlər reallaşdırılacaq.
***
Azərbaycanda bir həftəlik “Sevilfest-2023” IV Beynəlxalq Qadın Sənədli Film Festivalı start götürüb. Filmlər Bakı, Şəki və Lənkəran şəhərlərində nümayiş olunur
Azərbaycanda müstəqil sənədli film festivalı olan “Sevilfest” qadınların problemlərinə həsr olunub və 2020-ci ildən keçirilir. Builki festival “Bu, sizin ölkənizdə yoxdur” devizi altında və təcrübə mübadiləsi şəraitində təşkil olunub. Yerli və beynəlxalq kinematoqrafçıların qatıldığı “Sevilfest” qadınların və marginal qrupların həyat hadisələrini paylaşmaq və diqqəti onların sosial problemlərinə yönəltmək məqsədilə kinematoqrafçıları və kino həvəskarlarını öz ətrafında birləşdirir. Bu tədbir çərçivəsində dörd il ərzində ölkənin müxtəlif regionlarında çoxsaylı film nümayişləri təşkil olunub. Ümumilikdə, Azərbaycanın 8 şəhərində 2600-dən çox iştirakçının cəlb edildiyi 125 nümayiş keçirilib.
Festivalın münsiflər heyətinin üzvləri arasında rejissor və jurnalist Atanur Nəbiyeva, sənədli filmlərin rejissoru Ketevan Vaşaqaşvili, ictimai xadim və qadın hüquqları müdafiəçisi Ülviyyə Babasoy, rejissor və kinoşünas Şarofat Arabova, fotoqraf Rəna Əfəndi, prodüser, “Qızlar kinoda” platformasının nümayəndəsi Rebekka Reyni var.
Festivalın adı Cəfər Cabbarlının qadın azadlığı mövzusunda qələmə aldığı “Sevil” pyesindən götürülüb.
***
Milli Musiqi Günü münasibətilə sentyabrın 16-da Azərbaycan Milli Xalça Muzeyində “Xalçalarda musiqi” adlı sərgi açılıb və uşaqlar üçün konsert proqramı təşkil olunub.
Sərgidə muzeyin kolleksiyasından musiqi sənəti ilə əlaqəli zəngin kompozisiyalı portret və süjetli xalçalar, qobelenlər nümayiş etdirilir. Bunlar Xalq rəssamları Tahir Salahov və Eldar Mikayılzadənin görkəmli bəstəkarlar Üzeyir Hacıbəyli, Qara Qarayev və Dmitri Şostakoviçə həsr olunmuş portret xalçaları, rəssamlar Pavel Kuzmenko, Rimma Eminova və Faiq İbrahimovun xalça eskizlərindən ibarət əsərləridir.
Miniatür və realizm üslubunda bədii-texniki cəhətdən mükəmməl işlənmiş bu əsərlərdə klassik və xalq musiqisi, muğam və milli rəqs sənəti, musiqi alətlərimiz xalça naxışlarında öz əksini tapıb.
Yüksək bədii-estetik dəyəri olan müəllif əsərlərindən ibarət sərgi sentyabrın 28-dək davam edəcək.
Sərgi ilə tanışlıq Milli Musiqi Gününə həsr edilən konsert proqramı ilə davam edib. H.Sarabski adına 7 nömrəli uşaq musiqi məktəbinin şagirdlərinin ifasında klassik və müasir musiqi nümunələri təqdim edilib, vətənpərvərlik ruhunda şeirlər səsləndirilib.
***
Sentyabrın 17-də Lənkəran Dövlət Dram Teatrı rejissor Abdulla Elşadlının Mixail Bulqakovla Səbuhi İmanovun mətnlərindən istifadə etməklə Əbdürrəhim bəy Haqverdiyevin “Kimdir müqəssir?” pyesi əsasında quruluş verdiyi “The Müqəssir” tamaşası ilə özünün 133-cü mövsümünə başlayacaq.
Teatrdan XQ-yə verilən məlumata görə, mistik komediya janrında olan səhnə əsərinin quruluşçu rəssamı Tərlan Sadıqov, musiqi tərtibatçısı Azər Hacıəsgərlidir. Bildirilib ki, kollektiv bu mövsümdə Çingiz Aytmatovun “Cəmilə” (rejissor: İmran Əli Qurbanlı), Piter Turininin “Bu da axırı” (monotamaşa; rejissor: Abdulla Elşadlı) tamaşalarını tamamlamaqla yanaşı, Heydər Əliyevin 100 illiyinə həsr olunmuş “İki 23 arasında” (müəllif: Qəşəm Nəcəfzadə, rejissor:Emil Əskərov) səhnə işini də teatrsevərlərin ixtiyarına verəcək.
Ə.DOSTƏLİ ,
F.SALMANOVA
XQ
.jpg)
.jpg)
