Ölkəmizdə Azərbaycan Dili və Ədəbiyyatı Forumu davam edir
Mədəniyyətin inkişafında əsas lokomotivin dil və ədəbiyyat olduğu danılmaz həqiqətdir. Filologiya və pedaqogika elmləri isə bu konsepsiyanı reallaşdıran başlıca sahələrdir. Geniş elmi və ədəbi ictimaiyyətin cəlb olunduğu Azərbaycan Dili və Ədəbiyyatı Forumunda aparılan müzakirələr məhz bu mövzuları əhatə edir.
Qeyd edək ki, Heydər Əliyev Fondu ilə Mədəniyyət nazirliyinin təşkilatçılığı, Elm və Təhsil nazirliyinin, Azərbaycan Milli Elmlər Akademiyasının dəstəyi ilə keçirilən ilk forum sentyabrın 1-də qədim söz-sənət diyarı Şamaxıda başlanıb. Orada açılışa həsr olunan ədəbi-bədii proqram təqdim edildikdən sonra çıxışlarda tədbirin məram və məqsədləri açıqlanıb. Ardınca qloballaşma və zamanın çağırışları kontekstində ana dilimizin qorunması məsələləri ətraflı müzakirə edilib.
Dünən isə forum Bakıdakı “Gülüstan” sarayında davam edib. İlk panel iclası “Teatr və kinonun inkişafında ədəbiyyat faktoru: əsərdən səhnəyə, səhnədən ekrana” mövzusuna həsr olunub. Moderatoru kinodramaturq İlqar Fəhmi olan panel iclasda Əməkdar incəsənət xadimi Əli Əmirli, yazıçılar Elçin Hüseynbəyli, Varis Yolçuyev, ədəbi tənqidçi Əsəd Cahangir və “Ədəbiyyat” qəzetinin baş redaktoru Azər Turan iştirak ediblər.
Paneldə “Müasir Azərbaycan dramaturgiyası və onun problemləri”, “Azərbaycan ədəbiyyatında teatr və kino platforması”, “Kino sənətində dil və tərcümə problemləri”, “Ədəbiyyatın cəmiyyətə çatdırılması metodikası: beynəlxalq təcrübədə bu istiqamətdə tətbiq olunan innovasiyalar” və sair mövzularda məruzələr dinlənilib, çıxışlar olub.
Forum çərçivəsində günün digər panel iclası “Uşaq və yeniyetmələr arasında mütaliənin təbliği. Azərbaycan uşaq ədəbiyyatının vəziyyəti” mövzusuna həsr olunub. Yazıçı Günel Əsgərovanın moderatorluğu ilə keçən iclasda Elm və Təhsil nazirliyinin şöbə müdiri Vəfa Yaqubova, yazarlar Zahid Xəlil, Rafiq Yusifoğlu, Reyhan Yusifqızı, Sevinc Nuruqızı, Qəşəm Nəcəfzadə və Nizami adına Ədəbiyyat İnstitutunun şöbə müdiri Elnarə Akimova iştirak ediblər.
Paneldə “Ədəbiyyatın cəmiyyətə çatdırılması metodikası: beynəlxalq təcrübədə bu istiqamətdə tətbiq olunan innovasiyalar”, “Uşaq ədəbiyyatının ideoloji mahiyyəti və müasir problemləri”, “Mədəni və ədəbi qaynaqların müəyyənləşməsində uşaq ədəbiyyatı nə dərəcədə rola malikdir?”, “Uşaqlarda mütaliə mədəniyyətinin formalaşdırılması üçün hansı maarifçi islahatlara ehtiyac var?”, “Oxucu–naşir–müəllif vəhdəti gözlənilən nəticəni verirmi?”, “Təhsildə ana dili və uşaq ədəbiyyatının rolu”, həmçinin digər mövzularda məruzələr dinlənilib.
Panel başa çatandan sonra forumun iştirakçılarından qısa müsahibələr aldıq.
İbrahim İlyaslı, AYB “Poeziya seksiyası”nın rəhbəri:
– Ulu öndər Heydər Əliyevin dediyi kimi, hər bir xalqın milliliyini, mənəvi dəyərlərini yaşadan, inkişaf etdirən onun dili və ədəbiyyatıdır. Bu mənada, ilk dəfə olaraq Azərbaycan dili və ədəbiyyatına həsr olunan forumun təşkili son dərəcə təqdirəlayiqdir. Panel iclasları yüksək səviyyədə keçir. Mən kinodramaturq İlqar Fəhminin moderatorluğu ilə müzakirəyə çıxarılan “Teatr və kinonun inkişafında ədəbiyyat faktoru: əsərdən səhnəyə, səhnədən ekrana” mövzusunda müzakirələri xüsusilə bəyəndim. Faydalı polemika oldu, fikir mübadilələri sayəsində perspektiv vəzifələrə konkret aydınlıq gətirildi. İnanıram ki, forumda söylənilən fikirlər, təkliflər diqqətə alınacaq və gələcəkdə ana dili və ədəbiyyatımızın daha da inkişafına kömək edəcək.
Baba Vəziroğlu, şair, dramaturq, Əməkdar incəsənət xadimi:
– Əvvəlcə Şamaxıda, sonra isə Bakıda yüksək səviyyədə təşkil olunan forumdan son dərəcə razıyam. Onu xüsusi olaraq vurğulayım ki, Mədəniyyət Nazirliyinin yeni rəhbərliyinin möhtərəm Prezidentimizin qarşıya qoyduğu konkret vəzifələrin icrası ilə bağlı atdığı addımlar sevindiricidir. Bu qurum öz birbaşa missiyalarını layiqincə yerinə yetirir. Bundan əvvəl iştirakçısı olduğum Kino forumu da, elə Azərbaycan dili və ədəbiyyatına həsr olunan bu forum da göstərir ki, hər şey öz məcrasında rəvan şəkildə getməkdədir. Müzakirə olunan məsələlərə gəlincə isə deyim ki, işgüzar ruh, konkretlik və tərəqqi əzmi təqdirəlayiqdir.
Söz bayramı sabah davam etdiriləcək. Mədəniyyətimizin yaşadılması, inkişafı və təbliğində Azərbaycan dili və ədəbiyyatının rolu, müasir ədəbi proseslər, milli kitab sənayesinin mövcud vəziyyəti bu sahəyə dövlət dəstəyi və digər istiqamətlərdə müzakirələr aparılacaq.
Qeyd edək ki, Ulu öndər Heydər Əliyevin 100 illiyinə həsr olunmuş forumda səsləndirilən fikir və təkliflər ümumiləşdirilərək, “Azərbaycan mədəniyyəti–2040” Dövlət Proqramına daxil ediləcək.
Əli NƏCƏFXANLI,
XQ