Qardaş Türkiyənin Bayburt şəhərində 27-ci Beynəlxalq Dədə Qorqud Festivalı keçirilib. Ənənəvi mədəniyyət bayramı Dədə Qorqudun zəngin irsinə diqqət çəkmək üçün 1994-cü ildən başlayaraq, hər il iyul ayının üçüncü həftəsində təşkil edilir. Builki tədbirdə də yüzlərlə yerli və xarici qonaq iştirak edib.
Məqsədi türk dünyasının ortaq dəyərlərindən olan Dədə Qorqudla bağlı görülən işlərə nəzər salmaq, bu sahədə yaradılan əsərlərlə bağlı fikir mübadiləsi aparmaq, tarixi irsimizlə bağlı qarşıda duran vəzifələri müəyyənləşdirmək olan festivalın iştirakçıları əvvəlcə Oğuz elinin atasının Bayburtda Gənc Osman məhəlləsi Akşemsettin küçəsində yerləşən məzar-türbəsi ziyarət edib, önünə əklil qoyublar. Əfsanəyə görə, Dədə Qorqudun məzarı məhz bu şəhərdə yerləşir. Ən qədim türk dastanı olan “Kitabi Dədə Qorqud”da bəhs edilən qəhrəmanlıq hekayələri bu günə qədər türk tarixinə və mədəni keçmişinə işıq salmağa davam edir.
Qeyd edək ki, 2018-ci il noyabrın 28-də Mavriki Respublikasının paytaxtı Port Luis şəhərində UNESCO-nun Qeyri-maddi mədəni irsin qorunması üzrə Hökumətlərarası Komitəsinin 13-cü sessiyasında qəbul edilmiş qərarla Azərbaycan, Türkiyə və Qazaxıstanla birgə təqdim etdiyi “Dədə Qorqud irsi: Dastan mədəniyyəti, xalq nağılları və musiqisi” çoxmillətli mədəniyyət nümunəsi kimi UNESCO-nun Qeyri-maddi mədəni irs üzrə Reprezentativ siyahısına daxil edilmişdir.
Dədə Qorqud Türk mədəniyyətinin ən mühüm simvollarından biridir. Ölməz Dədə Qorqud irsi nümunəsi qardaş ölkələrdə birlik, bərabərlik və müxtəlifliyi, həmçinin xalqlarımızın ailə dəyərlərini, qadının cəmiyyətdə rolu, qonaqpərvərlik və ədalət prinsiplərini təbliğ etdiyini ifadə edir.
Bayramsayağı açılış mərasiminin proqramı zəngin və yaddaqalan olub. Festival panel müzakirələrlə davam edib. Dədə Qorqud irsinin öyrənilməsi, bu mövzuda yaradılan ekran əsərləri, nəşr olunan kitablar və sair barədə məlumatlar yayılıb. Festival çərçivəsində milli yeməklərin təqdimatı, sərgilər, konsertlər, folklor tamaşaları, konfranslar və digər mədəni tədbirlər keçirilib.
“Xalq qəzeti”
