Avropa musiqisinin ənənələri – Frederik Şopen və List yaradıcılığını, marş, polka kimi məişət janrlarını özündə ehtiva edən bu musiqi növü həm də reqtaym adlanır. Faktik olaraq cazın ilkin mərhələsini də məhz reqtaym təşkil edir. 

Azərbaycan 2012 və 2015-ci illərdə ilk beynəlxalq caz forumlarında iştirak etmiş­dir. 2015-ci ildə Parisdə Beynəlxalq Caz Günündə ölkəmizi İsfar Sarabski, gənc pia­noçu Etibar Əsədli, respublikanın Əməkdar artisti Ruslan Hüseynov, Elvin Bəşirov və Xalq artisti Mircavad Cəfərovun rəhbərlik etdiyi “Cəngi” folk-estrada qrupu təmsil etmişdir.

2017-ci ildən etibarən Azərbaycan Respublikası Mədəniyyət Nazirliyinin və bir sıra şirkətlər qrupunun təşkilatçılığı ilə Bakıda da Beynəlxalq Caz Günü qeyd olu­nur. Bu ənənəyə sadiq qalaraq, iyulun 3-də Heydər Əliyev Mərkəzində V Beynəlxalq Bakı Yay Caz Günləri festivalının açılış mərasimi keçirilib.

Mərkəzin Auditorium zalında baş tutan tədbirdə Türkiyənin məşhur gitaraçısı Ön­der Focan caz vokalçısı Meltem Ege ilə bir­likdə səhnəyə çıxıb. Onları klassik musiqi ifaçılığı ilə tanınan Bakı Kamera Orkestri müşayiət edib. Bu dəfə cazsevərlərə bir-bi­rindən fərqli, maraqlı musiqi nömrələri təq­dim olunub.

Tədbirdə pianoçu Elçin Şirinovun isra­illi həmkarları ilə birlikdə çıxışı da tədbir iştirakçılarının gur alqışları ilə qarşılanıb. 

İyulun 4-də Heydər Əliyev Mərkəzin­də məşhur caz-pianoçu Alfredo Rodrigez Kuba–ABŞ triosu ilə çıxış edib. Qremmi mükafatı nominantı, məşhur caz-pianoçu A.Rodrigez dünya turnesi çərçivəsində caz­sevərlərə sevimli musiqi kompozisiyalarını ərmağan edib.

Bu gün isə pianoçu, aranjımançı, Berkli Musiqi Kollecinin professoru Giorgi Mi­kadze Heydər Əliyev Mərkəzinin parkında triosu ilə birgə tanınmış gürcü bəstəkarla­rının caz improvizasiyalarını ifa edəcək. Həmçinin Azərbaycan cazının banisi olan Vaqif Mustafazadənin adını daşıyan 2 nöm­rəli Uşaq İncəsənət Məktəbinin tələbələri Heydər Əliyev Mərkəzinin parkına topla­şanlara gözəl caz axşamı bəxş edəcəklər. Heydər Əliyev Mərkəzinin parkında Fran­sadan olan musiqiçilər Francois Moutin və Rafael Pannierlə birgə tanınmış gürcü bəstəkarları da öz caz improvizə bacarıq­larını göstərəcəklər. Qonşu ölkəni Bakı caz günlərində pianoçu, aranjımançı, Berkli Musiqi Kollecinin professoru Giorgi Mika­dze təmsil edəcək. 

Caz bayramının yekun akkordunu iyulun 7-də Oleq Lundstrem adına Caz Orkestri vuracaq. İlk dəfə 2019-cu ildə Bakıya gələn kollektiv o vaxtdan audito­riyamızın rəğbətini qazanıb və bu dəfə də yaradıcılığı ilə dinləyicilərini sevindirməyi düşünür. Konsert Heydər Əliyev Mərkəzi­nin parkında baş tutacaq.

Artıq 5-ci dəfədir ki, ölkəmizdə keçi­rilən caz günləri festivalı qapalı məkanlarla yanaşı, açıq havada da təşkil olunur. Kon­sert tədbirləri geniş tamaşaçı kütləsi üçün daha da əlçatan olur. Bu isə festivalın əsas məqsədinə nail olmağa şərait yaradır, caz musiqisinin daha geniş auditoriyada təbli­ğinə xidmət edir.

Park ərazisindəki konsertlərə giriş sər­bəstdir.

Fidan HÜQUQQIZI, “Xalq qəzeti”