Azərbaycanla Qırğızıstan arasında turizm əlaqələrinin inkişaf perspektivləri Dövlət Turizm Agentliyinin sədri Fuad Nağıyevlə Qırğız Respublikasının ölkəmizdəki səfiri Kayrat Osmonaliyev arasında keçirilən görüşdə müzakirə olunub.
Tarixdən bəllidir ki, Azərbaycan və qırğız xalqları eyni kökə, mədəniyyətə, qədim qardaş münasibətlərinə və ənənələrə malikdirlər. Bundan başqa, xalqlarımızı dil və din eyniliyi də birləşdirir.
Dövlət Turizm Agentliyindən bildirilib ki, Qırğızıstan səfiri ilə görüşdə beynəlxalq təşkilatlar çərçivəsində əməkdaşlıq əlaqələrinin genişləndirilməsinin, birgə təbliğat tədbirlərinin keçirilməsinin və təcrübə mübadiləsinin vacibliyi vurğulanıb. Eyni zamanda, qarşılıqlı tanıtım səfərlərinin təşkili və turist mübadiləsinin artırılması üçün birbaşa uçuşların əhəmiyyəti haqqında fikir mübadiləsi aparılıb.
Səfir Kayrat Osmonaliyev bildirib ki, bu il iyulun 22-dən etibarən Bişkek və Bakı arasında həftədə 1 dəfə olmaqla birbaşa uçuşların həyata keçirilməsi planlaşdırılır.
Qeyd edək ki, 2023-cü ilin yanvar–may aylarında Qırğızıstandan Azərbaycana 1733 nəfər səfər edib ki, bu da 2022-ci ilin eyni dövrü ilə müqayisədə 51 faiz artım deməkdir.
“Xalq qəzeti”
