Lap qədimdən rəqs dünyanın hər yerində gözəllik, şuxluq, çeviklik sənəti kimi yükək dəyərləndirilib, şənliklərin, milli bayramların, mədəni təqdimatların bəzəyinə çevrilib. Qobustanın qayaüstü rəsmləri bu sənətin ölkəmizdə minilliklərdən qaynaqlanıb gəlməsini sübut edir.
Bugünlərdə dünyaya rəqs təntənəsi yaşadan Beynəlxalq Rəqs Günü Azərbaycanda da geniş qeyd edilib, populyar rəqs qruplarının çıxışları təşkil olunub. Sumqayıt Regional Mədəniyyət İdarəsinin tabeliyindəki Abşeron Rayon Mərkəzi Kitabxanasında həmin gün rayon ictimaiyyəti nümayəndələrinin tanınmış xoreoqraf Elşən Həsənlinin rəhbərlik etdiyi “Abşeron” rəqs ansamblının üzvləri ilə görüş keçirilib.
Tədbirdə qeyd edilib ki, ölkəmizdə qədim və zəngin rəqs sənəti bu gün də yüksək dəyərləndirilir, milli-mədəni dəyərlərimiz sırasında qayğı ilə qorunur, zənginləşdirilir. Gənc nəsil bu gözəl sənətə getdikcə daha böyük maraq göstərir, onun sirlərini peşəkarlardan həvəslə öyrənir.
Görüşdə milli rəqs sənətimizi bütün zənginliyi ilə mənimsəyib yaşadan “Abşeron” qrupunun ölkəmizdəki və xaricdəki uğurlu çıxışlarından məmnunluqla söhbət açılıb. Sonra rəqs ansamblının rəngarəng çıxışları izlənilib. Sonda iştirakçılar kitabxananın əməkdaşı Səbinə Məmmədovanın təqdimatında “Azərbaycan cəngi rəqsləri” adlı kitab sərgisi ilə tanış olublar.
Xatırladaq ki, “Abşeron” rəqs ansamblı bir sıra xarici ölkələrdə Azərbaycanı uğurla təmsil edib. Qrupun Türkiyə, İran və Gürcüstandakı çıxışları böyük maraqla qarşılanıb. Rəqqaslarımızın Türkiyənin Bursa şəhərində ulu öndər Heydər Əliyevin büstünün açılış mərasimində çıxışı qardaş ölkədə yüksək dəyərləndirilib. Kollektiv respublika rəqs müsabiqəsinin qalibləri sırasında yer alıb.
L.AZAD, “Xalq qəzeti”