Heydər Əliyev Mərkəzində “Azərbaycan Kinosu – 125. Reallıq, çağırışlar və hədəflər” mövzusunda Kino Forumuna start verilib. Ölkəmizdə ilk dəfə keçirilən Forumda görkəmli mədəniyyət, incəsənət xadimləri ilə yanaşı, xarici ölkələrdən gəlmiş qonaqlar da iştirak edirlər. 

Forum Azərbaycan milli kinosunun keçdiyi inkişaf yolundan bəhs edən videoçarxın nümayişi ilə başlanıb.

Mədəniyyət naziri Adil Kərimli çıxış edərək Forumun əhəmiyyətindən da­nışıb. O deyib ki, bu yaradıcı toplantı ümummilli lider Heydər Əliyevin 100 illik yubileyi çərçivəsində Mədəniyyət Nazirli­yi və Heydər Əliyev Mərkəzinin birgə təş­kilatçılığı ilə keçirilir. Bir neçə gün əvvəl məhz bu məkanda Teatr Forumu da təş­kil edilmişdi: “Ümid edirik ki, Kino Foru­mu da çox maraqlı müzakirələrlə yadda qalacaq və kinomuzun inkişaf yoluna işıq salacaq. Bu gün burada yığışmağımızın əsas məqsədi hazırda Azərbaycan kino sənətinin üzləşdiyi problemləri, eyni za­manda, perspektivləri müzakirə etmək, onların həlli yollarını taparaq bunun əsa­sında yeni inkişaf istiqamətlərini müəy­yən etməkdir. Teatr və Kino forumundan əlavə, bu il ərzində ulu öndərin 100 illik yubileyi çərçivəsində mədəniyyətimizin digər sahələri ilə də bağlı forumlar keçi­riləcək və nəticədə, Mədəniyyətimizin İn­kişaf Strategiyasını irəli sürəcəyik”.

Milli kino tarixinə ekskurs edən nazir yaradılmış sanballı ekran əsərlərinin onil­liklər boyu soydaşlarımızda milli-mənəvi dəyərlərə hörmət, Vətənə məhəbbət və sədaqət hissləri aşıladığını, xalqımızın dünyagörüşünün formalaşmasına öz töhfəsini verdiyini bildirib.

Adil Kərimlinin sözlərinə görə, in­cəsənətin bütün sahələrində olduğu kimi, milli kinomuzun inkişafında da ümummilli lider Heydər Əliyevin xidmətləri danıl­mazdır. “Kino bizim xalqımızın salnamə­sidir” – deyən ulu öndər istər sovetlər dövründə, istərsə də müstəqillik illərində Azərbaycana rəhbərlik etdiyi vaxtlar­da milli kino sahəsinə yüksək diqqət və qayğı göstərmişdir. SSRİ dağıldıqdan sonra Azərbaycanda digər sahələrdə olduğu kimi, kinoda da durğunluq yara­nanda məhz ulu öndərin qayğısı nəticə­sində milli kinomuz yenidən dirçəlməyə başlamışdır. Kino fəaliyyətinin norma­tiv-hüquqi bazası formalaşdırılıb və Döv­lət Film Fondu təsis edilmişdir. Uzun il­lər Azərbaycanda da sovet kinosu günü qeyd olunurdu. Lakin, ulu öndər tərəfin­dən kino tariximizə qarşı bu haqsızlığa son qoyulmuş və müvafiq sərəncamla milli kino tarixinin başlanğıcı – 1898-ci il, 2 Avqust Azərbaycan Kinosu Günü kimi qeyd edilməyə başlamışdır.

Bu gün Azərbaycan kino sənətinə Prezident İlham Əliyev tərəfindən xüsusi diqqət yetirilir. Dövlət başçısının müvafiq sərəncamı ilə təsdiq edilmiş “Azərbay­can kinosunun 2008-2018-ci illər üzrə inkişafına dair Dövlət Proqramı", “Azər­baycan kinematoqrafiyasının inkişafı ilə bağlı bəzi tədbirlər haqqında” 1 mart 2019-cu il tarixli sərəncamı milli kino sənətinə yüksək diqqət və qayğının bariz nümunəsidir.

Son illər ölkəmizdə istehsal olunan filmlərin dünyanın ən nüfuzlu beynəlxalq film festivallarında iştirakı və mükafatlan­dırılması, habelə film çəkilişinə vəsait qo­yuluşunun həcminin artması və tamaşaçı auditoriyasının genişlənməsi kinematoq­rafiyamızın keyfiyyətcə yeni inkişafından xəbər verir. Prezident İlham Əliyevin sərəncamı ilə təsdiq edilən “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın Tədbirlər Planında kino sənətinin də in­kişaf etdirilməsi konsepsiyası öz əksini tapmışdır. Birinci vitse-prezident, Heydər Əliyev Fondunun prezidenti Mehriban xanım Əliyevanın bu sahəyə göstərdiyi qayğı nəticəsində müxtəlif illərdə Azər­baycanın kino sənəti bir sıra beynəlxalq festivallarda, eləcə də Kann kinofestiva­lında təbliğ edilmişdir.

Mədəniyyət naziri vurğulayıb ki, kinematoqrafiyada şəffaf idarəçilik mexa­nizmlərinin tətbiqi məqsədilə Kino Agent­liyinin yaradılması irəliləyişə böyük təkan olmuşdur. Mədəniyyət Nazirliyi aidiyyəti qurumlarla birgə Agentliyin fəaliyyətə başlaması üçün tələb olunan bütün la­zımi işləri tamamlamışdır. Kino Agentli­yinin yaradılması Azərbaycan kinosuna gələcəkdə Agentlik vasitəsilə bir çox yeni beynəlxalq birgə layihələrdə iştirak et­mək, “Evroimaj” kimi nüfuzlu beynəlxalq platformalara qoşularaq birgə kino isteh­salında iştirak, Azərbaycan kinematoqra­fiyasına yeni təcrübələr gətirmək, eləcə də audiovizual sahənin iqtisadi fəallığını artırmaq imkanı yaradacaq.

Nazirin sözlərinə görə, Azərbaycan kino sənətinin bir sıra problemləri də var. Buna görə də Forumun əsas məqsə­di kino tariximizin zəngin irsini qoruyub saxlamaqla yanaşı, problemləri aydınlaş­dırmaq, gələcək illərdə də inkişafı təmin etmək və rəqabət qabiliyyətli kinomuzun formalaşması istiqamətində atıla bilə­cək addımları birlikdə müzakirə etmək, bunun əsasında inkişaf strategiyaları və dövlət proqramlarının hazırlanılmasına nail olmaqdır: “Düşünürük ki, bu sahədə yaranmış yeni münasibətlər, yeni çağı­rışlar, özəl sektorun fəaliyyətinin təşviq edilməsi, dövlətdən asılılığın azaldılması və dünya kino sənayesində mövcud olan trendlərə çatması üçün müvafiq köklü dəyişikliklərin edilməsinə böyük zərurət vardır”. 

Sonra ümumi müzakirələr olub. Fo­rum panel müzakirələrlə davam edib. Çıxışlardan bəzi qeydləri təqdim edi­rik. 

Şəfiqə Məmmədova, Azərbaycan Respublikası Kinematoqrafçılar İtti­faqının sədri, Xalq artisti: “Kino Foru­munun keçirilməsi əlamətdar hadisədir. Teatr və kino sahəsinin inkişafı naminə dövlət səviyyəsində göstərilən dəstək fərəhlidir. Bugünədək Azərbaycan kino­sunun, mədəniyyətinin keçdiyi inkişaf yolu uğurlu olub. Ümummilli lider Heydər Əliyevin kino sahəsinə, ümumən, mədə­niyyət və incəsənət adamlarına göstər­diyi diqqət və qayğıdan hər kəs qürurla danışa bilər”. 

Oqtay Mirqasım, Xalq artisti, rejissor: “Ulu öndər Azərbaycan kine­matoqrafiyasına, sözün əsl mənasında, atalıq edirdi, bu sahəyə qayğısını əsirgə­mirdi. Mədəniyyətin bu sahəsini də millə­tin inkişafı üçün əsas vasitələrdən hesab edirdi. Qayğı estafeti uğurla davam edir. Amma təəssüf ki, bu gün kinoteatrlarımı­zın əksəriyyətində bayağı filmlər təbliğ olunur. Buna nəzər yetirilməlidir. Bəzi filmlərdə Azərbaycan cəmiyyəti elə təq­dim olunur ki, xəcalət çəkirsən. Biz kine­matoqrafçılar dövrün tələblərini nəzərdə saxlamalı, amma tamaşaçının da zövqü­nü korlamamalıyıq”. 

Rasim Balayev, Xalq artisti: “Azərbaycanfilm” kinostudiyası bir neçə illər dövlət dotasiyasında olmalıdır, dövlət və özəl qurumlar tərəfindən maliyyələşdi­rilməlidir. Azərbaycan Dövlət Mədəniyyət və İncəsənət Universitetinin tələbələri, həmçinin sənətdə olan bəzi gənclər xarici ölkələrə treninqlərə, təhsil almağa gön­dərilməli və sənət mübadiləsi olmalıdır. Bildiyimiz kimi, Kino Agentliyi yaradılacaq və oraya Azərbaycan kinosunu bilən, ki­nematoqrafiyadan anlayışı olan adamlar cəlb olunmalıdır. Mən xoşbəxtəm ki, Qa­rabağın alınmasını görə bildim. Bu barə­də, vətənpərvərlik mövzusunda filmlər çəkilməli, həmçinin xarici arenaya çıxa­rılmalıdır”. 

Digər natiqlər də Azərbaycan kine­matoqrafiyasının müəyyən çatışmaz­lıqlarından söhbət açıb, eyni zamanda, kinomuzun gələcək inkişafına ümid bəs­lədiklərini vurğulayıblar.

“Xalq qəzeti”