Almatı Heyvanat Parkından gətirilən “Simba” adlı beş yaşlı erkək şir Bakı Zooloji Parkının daimi sakininə çevrilib. 
Dünyanın ən iri ikinci yırtıcı pişikkimiləri olan şirlər (Panthera leo) ən çox Şərqi və Cənubi Afrikanın geniş və açıq düzənliklərində, savannalarda, meşələrdə və yarımsəhra ərazilərində məskunlaşır. Dişi fərdlər, balalar və bir neçə erkək fərd “prayd” adlanan qruplarda yaşayırlar. Vəhşi təbiətdə 10-14, qapalı şəraitdə isə təhlükələrdən uzaq olduqları üçün daha çox, təxminən, 20 il ömür sürürlər. 
Bakı Zooloji Parkın əsas məqsədi Azərbaycanın “Qırmızı Kitab”ına daxil, nadir və nəsli kəsilmək üzrə olan heyvan növlərinin qorunub saxlanılması, çoxaldılaraq yenidən təbiətə buraxılmasını təmin etməklə yanaşı, həmçinin ziyarətçilər üçün canlı aləm haqqında bilik əldə edə biləcəkləri təhsil və maarifləndirmə layihələrini təşkil etməkdir. 
Xatırladırıq ki, şirin Bakıya gətirilməsi Almatı Heyvanat Parkı ilə aparılan beynəlxalq mübadilə çərçivəsində həyata keçirilib.