Tarixçi-alim, akademik Yaqub Mahmudov sentyabrın 1-də Azərbaycanda keçiriləcək parlament seçkilərinin əhəmiyyəti barədə “Seçki 2024” Müstəqil Media Mərkəzinin suallarını cavablandırıb. Müsahibəni təqdim edirik.

– Yaqub müəllim, növbədənkənar parlament seçkilərinin Azərbaycan üçün əhəmiyyəti barədə nə deyə bilər­siniz? 

– Seçki mədəniyyətdir, həm döv­lət, həm də millət, cəmiyyət üçün strateji məsələdir. Bir xalqın seçkilərdə iştirakı onun gələcək taleyinin müəyyənləşdiril­məsi baxımından müstəsna əhəmiyyət daşıyır. Ona görə də istərdim ki, cavandan qocayadək hamı seçkilərdə fəal iştirak et­sin. Milli Məclis çox mühüm orqandır və buna görə də parlament seçkiləri dövlət üçün strateji əhəmiyyət daşıyır. Xüsusilə indiki məqamda, dünyanın başının üstünü münaqişələrin aldığı bir dövrdə keçirilən seçkilər ikiqat məsuliyyət yaradır. Burada başqa bir məqam da odur ki, Azərbayca­nın İkinci Qarabağ müharibəsində parlaq qələbə qazanması bu seçkilərin əvvəlki seçkilərdən mənəvi cəhətdən üstünlüyü­nü artırır. Çünki ilk dəfədir ki, parlament seçkiləri bütün ölkəni əhatə edir. Bu, ərazi bütövlüyümüzün bərpasından sonra qazan­dığımız üstünlükdür.

– Parlament seçkilərinin ölkədəki siyasi proseslərə təsiri barədə nə deyə bilərsiniz?

– Seçkilərin özü böyük siyasi proses­dir. Bu prosesin yanında digər siyasi pro­seslər nisbətən sönük görünür. Lakin seç­kilərin sabit, demokratik keçməsi qarşıdan gələn COP29 zamanı da Azərbaycanın əlini xeyli gücləndirəcək və ölkəmizin imi­cinə müsbət təsir göstərəcək. Bunun üçün də dövlətimiz xeyli işlər görüb. Görülən işləri qiymətləndirmək lazımdır.

– Yeni parlamenti necə görmək istər­diniz?

– Milli Məclisə seçilən deputat ilk növ­bədə vətənpərvər, fəal vətəndaş olmalıdır. Xeyli yeni namizəd görürəm. Dövlətimiz də onlara uğurlu təşviqat aparmaları üçün çox yaxşı şərait yaradıb. Bu, onu göstərir ki, dövlətimiz demokratik seçkilərin keçi­rilməsində, həmişə olduğu kimi, maraqlı­dır. İnanıram ki, layiqli insanlar deputat kürsüsündə əyləşə biləcəklər. Əsas odur ki, fəaliyyətləri boyu xalqın, seçicilərin, döv­lətin ümumi prinsiplərinə yaxından dəstək olsunlar. Çünki parlament xalqın bugünü­nün və gələcəyinin güclü əsaslar üzərində qurulmasında mühüm rol oynayır. İstərdim ki, bizim yeni Milli Məclis də bu kriteriya­lara cavab versin. 

Anar ƏLİ
XQ