Mayın 30-da Viktor Mamatuaiahutapunun başçılıq etdiyi Maohi Nuinin (Fransız Polineziyasının) nümayəndə heyəti Milli Məclisdə olub.
Nümayəndə heyəti ilə görüşdə Milli Məclis sədrinin birinci müavini, Hüquq və dövlət quruculuğu komitəsinin sədri Əli Hüseynli Azərbaycan dövlətinin beynəlxalq aləmdə neokolonializm siyasətinə qarşı daim barışmaz mövqe nümayiş etdirdiyini bildirib.
Müstəmləkəçiliyə qarşı mübarizənin Prezident İlham Əliyevin apardığı məqsədyönlü xarici siyasətin tərkib hissəsi olduğunu deyən Əli Hüseynli vurğulayıb ki, ölkəmiz Qoşulmama Hərəkatına sədrliyi dövründə neokolonializmə qarşı güclü koalisiya yaratmağa, müstəmləkəçilik siyasətindən əziyyət çəkən xalqların azadlıq mübarizəsinə dəstək göstərilməsinə nail olub.
Görüşdə Maohi Nuinin fransız müstəmləkəçiliyinə qarşı apardığı ardıcıl mübarizəyə dəstək ifadə olunub, Azərbaycan dövlətinin və xalqının daim bu ölkənin yanında olduğu, onun azadlıq mübarizəsini dəstəklədiyi diqqətə çatdırılıb.
Qeyd edilib ki, neokolonializm siyasəti həyata keçirən ölkələrin önündə bu gün Fransa gəlir. Fransa Azərbaycan torpaqlarının Ermənistan tərəfindən 30 ilə yaxın davam edən işğal siyasətini də yaxından dəstəkləyib.
Görüşdə Fransanın müstəmləkəçilik keçmişindən danışan Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov qeyd edib ki, XXI əsrdə Fransanın müstəmləkəçilik siyasətinə son qoyulmasının vaxtı çoxdan çatıb.
Maohi Nui nümayəndə heyətinin başçısı Viktor Mamatuaiahutapu ölkəmizə səfərini əlamətdar adlandırıb.
Fransanın əsrlər boyu həyata keçirdiyi müstəmləkəçilik siyasəti nəticəsində ölkəsində demokratiyanın boğulduğunu, insan hüquqlarının kobud şəkildə pozulduğunu deyən qonaq bildirib ki, Fransa Maohi Nuinin müstəqillik əldə etmək istiqamətində apardığı mübarizəyə əngəllər törətməyə davam edir, dialoqdan qaçır. O qeyd edib ki, Maohi Nui xalqı öz azadlıq mübarizəsini sonadək davam etdirəcək.