Dekabrın 18-də Rusiya Federasiyasının paytaxtı Moskvada Müstəqil Dövlətlər Birliyinin (MDB) Hökumət Başçıları Şurasının iclası keçirilib. 

Nazirlər Kabinetinin mətbuat xidmə­tindən bildiriblər ki, Azərbaycan Respub­likasının Baş naziri Əli Əsədov iclasda iştirak edib.

Əvvəlcə Əli Əsədov və digər nü­mayəndə heyətlərinin rəhbərləri “Rusiya” beynəlxalq sərgi-forumuna baxış keçirib­lər.

Azərbaycanın Baş naziri iclasda çıxış edərək 2024-cü ildə MDB-yə sədrliyin həyata keçirilməsində Rusiyaya uğurlar arzulayıb, cari ildə uğurlu sədrliyə görə Qırğızıstanı təbrik edib. 

MDB-nin iştirakçı dövlətlər arasın­da bir çox sahələrdə mühüm dialoq və qarşılıqlı fəaliyyət platforması olduğu­nu vurğulayan Baş nazir Azərbaycanın MDB formatında uğurlu qarşılıqlı fəaliy­yətin zəmanəti olan ikitərəfli əlaqələrin bundan sonra da genişləndirilməsinə və möhkəmləndirilməsinə xüsusi əhəmiyyət verdiyini qeyd edib. Əli Əsədov diqqətə çatdırıb ki, hökumətlərarası səviyyədə müntəzəm təmaslar ikitərəfli və çoxtərəf­li əməkdaşlığın bütün istiqamətləri üzrə məhsuldar dialoq aparmağa, həmçinin müxtəlif çağırışlara və risklərə vaxtında cavab verməyə imkan verir. 

Bugünkü iclasın da qarşılıqlı maraq doğuran məsələlər üzrə bir daha fikir mübadiləsi aparmaq üçün yaxşı imkan olduğunu deyən Azərbaycanın Baş naziri qeyd edib: “Sevindirici haldır ki, bu gün bizim gündəliyimiz mədəniyyət mövzusu­na həsr olunub. Ölkələrimiz mədəni-hu­manitar sahədə qarşılıqlı fəaliyyət üçün böyük potensiala malikdir. Hər il MDB çərçivəsində mədəniyyət paytaxtlarının və tematik humanitar illərin elan edilməsi Birlik ölkələrinin humanitar qarşılıqlı fəa­liyyətinin genişləndirilməsinə öz töhfəsini verir. Fürsətdən istifadə edərək, cari ildə Mədəniyyət paytaxtı statusunda Rusiya Federasiyasının Sankt-Peterburq şəhə­rinin MDB ölkələrinin mədəniyyətlərara­sı dialoqunun inkişafına verdiyi töhfəni xüsusi qeyd etmək istəyirəm. Həmçi­nin Səmərqənd şəhərinin 2024-cü ildə Müstəqil Dövlətlər Birliyinin mədəniyyət paytaxtı elan edilməsi münasibətilə Öz­bəkistan Respublikasını təbrik edirəm”. 

Azərbaycanın MDB çərçivəsində mədəni-humanitar əməkdaşlığın güc­ləndirilməsinə böyük töhfə verdiyini vur­ğulayan Əli Əsədov bildirib: “Ölkəmizdə müntəzəm olaraq bu sahədə incəsənət, mədəniyyət, elm, təhsil xadimlərini bir araya gətirən müxtəlif tədbirlər keçirilir. Azərbaycan artıq bu cür tədbirlərin ke­çirilməsinin ənənəvi məkanına çevrilib. Əlbəttə, bütün bunlar coğrafi, tarixi və mədəni köklərə, Azərbaycan xalqına xas olan çoxəsrlik multikulturalizm ənənələ­rinə əsaslanır. Azərbaycan Respublikası çoxmillətli və çoxkonfessiyalı dövlətdir. Bütün millətlərin və dinlərin nümayən­dələri əsrlərdir ki, ölkəmizdə sülh, anlaş­ma və dostluq şəraitində yaşayırlar. Milli və dini mənsubiyyətindən asılı olmaya­raq, onların hamısı bizim bərabərhüquqlu vətəndaşlarımızdır. Biz bu gün bu faktı bu yüksək kürsüdən bir daha bəyan edirik. 

Ölkəmiz çoxsaylı beynəlxalq platfor­malar vasitəsilə millətlərarası dialoqu fəal şəkildə təşviq edir. İdman sahəsində qar­şılıqlı fəaliyyət də humanitar əlaqələrin möhkəmləndirilməsinə öz müsbət təsirini göstərir. İdman yarışları sırf idman xarak­teri daşısalar da, eyni zamanda, millət­lərarası dialoqun möhkəmləndirilməsinə və xalqlar arasında etimad və qarşılıqlı anlaşma ab-havasının yaradılmasına xid­mət edir. Biz 2025-ci ildə Azərbaycanın ikinci böyük şəhəri Gəncədə keçiriləcək III MDB ölkələri Oyunlarına məhz bu priz­madan baxırıq. Əminəm ki, bu Oyunlar gələcəkdə də MDB çərçivəsində huma­nitar qarşılıqlı fəaliyyətin möhkəmləndiril­məsinə və inkişafına kömək edəcək”. 

Baş nazir diqqətə çatdırıb ki, iq­tisadi-ticari sahə ölkələrimiz arasın­da əməkdaşlığın mühüm istiqamətidir. Azərbaycan Birlik çərçivəsində iqtisadi əməkdaşlıqda fəal iştirak edir. Keçən il Azərbaycanın Birlik ölkələri ilə əmtəə dövriyyəsinin həcmi təqribən 30 faiz artıb. Cari ilin 10 ayının yekunlarına görə daha 17 faizlik artım qeydə alınıb. Şərq-Qərb və Şimal-Cənub nəqliyyat dəhlizlərinin prioritet layihələr olacağı nəqliyyat-tranzit sahəsində qarşılıqlı faydalı əməkdaşlıq formalaşıb. Azərbaycan MDB üzrə bir çox tərəfdaşlarımızın fəal istifadə etdik­ləri nəqliyyat-logistika infrastrukturunun modernləşdirilməsini davam etdirir. Biz, həmçinin yuxarıda göstərilən dəhlizlərin ötürücülük qabiliyyətinin genişləndirilməsi üçün Birlik çərçivəsində sıx qarşılıqlı fəa­liyyət göstəririk. 

Çıxışında Azərbaycanın regionda sülhün və təhlükəsizliyin möhkəmləndi­rilməsi səylərinin davam etdirilməsi üzrə möhkəm qətiyyətini bir daha ifadə edən Əli Əsədov bildirib: “Bu yaxınlarda alı­nan müsbət siqnalları nəzərə alaraq, bu istiqamətdə konstruktiv dialoqun davam etdirilməsini son dərəcə mühüm hesab edirik. Yaranmış tarixi fürsətdən rasional istifadə edilməsi bizə regionda çoxdan gözlənilən sülhə nail olmağa imkan verə­cək, regionumuzda bütün insanlara dinc və təhlükəsiz birgəyaşayış ümidləri bəxş edəcək”. 

İclasın yekununda MDB-yə üzv döv­lətlərin hökumət başçılarının mədəni-hu­manitar əməkdaşlığın perspektivlərinə dair Bəyanatı imzalanıb.

XQ