Kaledoniya Birliyinin sədri Makronu ittiham edib

Kaledoniya Birliyinin sədri, FNKLS-nın mətbuat katibi Daniel Qoa Fransa Prezidenti Emmanuel Makrona və fransalı nazirlərə açıq məktub göndərib.

Məktubda 1853-cü ildən Fransanın Yeni Kaledoniyada hökmranlıq etdiyi vurğulanır.

Bildirilir ki, Fransa hökuməti tərəfindən Kaledoniyaya məqsədli şəkildə köçürülən insanlar onları xalq kimi tanımır: “Sizin siyasətiniz bizim məhvimizə hesablanıb. Amma siz bizi məhv edə bilməyəcəksiniz. Bizim ərazilərin dekolonizasiya olunmasına dair 1957-ci ildə imzaladığınız sənəddə götürdüyünüz öhdəliklərə əməl eləmirsiz. Fransa prezidenti bir şeyi deyir, amma tamamilə əksinə addımlar atır”.

Açıq məktubda Fransaya qarşı tələblər də irəli sürülüb: “Ləyaqətimizi özümüzə qaytarın. Çünki bu sizin fəxr etdiyiniz insan hüquqlarının tələbidir. Bizə azadlığımızı qaytarın. Çünki bu insanlığın tələbidir. Bizi dekolonizasiya edin. Çünki bu tarixi ədalətin bərpa edilməsidir”.