Azərbaycan Mətbuat Şurası Ermənistanın Şuşa Qlobal Media Forumu ilə bağlı apardığı məqsədli əks təbliğata və bu fonda ölkənin media qurumlarının “fəaliyyətinə” etiraz əlaməti olaraq bəyanat yayıb.

Şuradan “Xalq qəzeti”nə daxil olmuş bəyanatda bildirilib ki, Şuşa Qlobal Media Forumu auditoriya genişliyi, mövzu zən­ginliyi ilə Azərbaycanda, Cənubi Qafqaz regionunda və bütövlükdə dünyada mü­hüm əhəmiyyət daşıyan hadisəyə çevril­di. İki gün ərzində nüfuzlu media, jurnalist təşkilatları rəhbərləri, ekspertlər media və informasiya-kommunikasiya sahəsinin ak­tual məsələlərini ətraflı müzakirə etdilər. 

Təəssüf ki, böhtan və qarayaxma ənənəsinə sadiq qalan Ermənistanın Azərbaycana qarşı apardığı qaralama kampaniyası hələ tədbirin gedişində özünü göstərməyə başladı. Ölkənin 11 jurnalist təşkilatı Forumun iştirakçılarına müraciət ünvanlayaraq və yersiz həmkar sentimentallığı nümayiş etdirərək, əcnəbi media mənsublarını qınadılar, onları Şu­şanı tərk etməyə çağırdılar. Müraciətdə, həmçinin, Qarabağın erməni əhalisinin, guya “blokadada” olduğuna dair iddianın irəli sürülməsi və xarici jurnalistlərdən mövzunu gündəmə gətirmək istənilməsi bu mühüm hadisəni siyasiləşdirmək və bundan mümkün dividend əldə etmək cəhdindən başqa bir şey deyildi, – deyə sənəddə vurğulanıb. 

Bəyanatda erməni tərəfinin eyni mo­tivli müraciəti beynəlxalq təşkilatlara da ünvanlamasına toxunulub. Bildirilib ki, hə­min müraciətdə Foruma qarşı bəyanatın verilməsi, tədbirə qatılmış xarici jurnalist­lərin fəaliyyətinin pislənilməsi kimi qəbul-edilməz fikirlər irəli sürüldü. Bu azmış kimi, həmin jurnalistlərin elektron poçt ünvanla­rına hədə-qorxu dolu məktublar göndərildi, onlar şantaja və sözün əsl mənasında ter­rora məruz qaldılar. Bəzi iştirakçılar hətta öz sosial şəbəkə hesablarını müvəqqəti qapatmaq məcburiyyətində qaldılar.

Şura hesab edir ki, beynəlxalq ictimai rəyi çaşdırmağa yönəlmiş, xarici media mənsublarını təhdid edən bu kimi hallar tam yolverilməzdir və məsələyə sərt re­aksiyanın göstərilməsi mütləqdir. Qurum beynəlxalq ictimaiyyəti, habelə dünyanın aparıcı jurnalist təşkilatlarını mövcud is­tiqamətdə həmrəylik nümayişinə, müvafiq tədbirlər görməyə çağırır: “Ermənistanın, ermənipərəst dairələrin bu sayaq spekul­yativ addımları heç bir nəticə verməyəcək. Mətbuat Şurası əmindir ki, Şuşa Qlobal Media Forumu davamlı xarakter almaqla, dünyada media sahəsindəki problemlərin dərin müzakirə olunacağı mötəbər platfor­maya çevrilməkdədir”.