Mingəçevir Şəhər İcra Hakimiyyətinin başçısı yanında Fövqəladə Hallar Komissiyasının iclası keçirilib. İclas zamanı aprelin 6-da və 30-da, eləcə də mayın 1-də yağan güclü leysan yağışlarından, dolu düşməsindən sonra şəhərdə baş verən fəsadlar müzakirə olunub. 

Mingəçevir Şəhər İcra Hakimiyyətinin başçısı İlham İsmayılov iclasda qeyd edib ki, apreldə və mayın 1-də yağan güclü leysan yağışları və dolu şəhərimizdə bir sıra fəsadlar törədib. Bununla əlaqədar olaraq şəhər icra hakimiyyətinə və əra­zi xidmət sahələrinə sakinlərdən çoxsaylı müraciətlər daxil olub. Bəzi fərdi yaşayış evlərinin həyətlərini su basıb, dolunun yağması nəticəsində binaların dam ör­tükləri zərər çəkib. Həyətlərdəki meyvə ağacları və digər kənd təsərrüfatı sahələri sıradan çıxıb, sakinlərə çoxsaylı ziyan də­yib. Görülən tədbirlər nəticəsində yaranan fəsadların qarşısı nisbətən alınıb. 

İclasda şəhər icra hakimiyyətinin baş­çısı yanında Fövqəladə Hallar Komissi­yasının sədr müavini Məhluqə Cavadova həyata keçirilən tədbirlər barədə komissi­ya üzvlərinə ətraflı məlumat verib. 

Qeyd edilib ki, həmin saatlarda Min­gəçevirə yağan yağışların, dolunun miq­darı aylıq normadan çox olub. Buna bax­mayaraq, şəhərimizin bütün kommunal xidmət sahələrinin rəhbərləri və işçiləri fəsadların qarşısının alınmasında fəda­karlıq göstərib. 

İclasda Sukanal idarəsinin, qaz təsər­rüfatının, mənzil-kommunal təsərrüfatı idarələrinin, işıqlanma idarəsinin, yaşıl­laşdırma və sanitar təmizlik idarəsinin rəhbərləri görülən işlər barədə məlumat verərək təkliflərini bildiriblər. 

Sonda Mingəçevir Şəhər İcra Haki­miyyətinin başçısı İlham İsmayılov iclasın işinə yekun vuraraq yaranmış problemlə­rin aradan qaldırılması yolunda tapşırıq­larını verib. 

İlqar HƏSƏNOV,
“Xalq qəzeti”nin bölgə müxbiri