Sudan Dövlət Şurasının sədri, general Əbdülfəttah əl-Burhan bəyan edib ki, Afrika Regional Birliyi (İQAD) tərəfindən ölkədəki böhranın nizamlanması ilə bağlı irəli sürülmüş təşəbbüsü bəyənir. Məlumatı “Anadolu” verib.
Sudan ordusundan verilən məlumata görə, əl-Burhan təşkilata üzv dövlətlərin başçıları ilə virtual görüşündə Cənubi Sudanın, Keniyanın və Cibutinin rəhbərlərindən xahiş edib ki, yaranmış münaqişənin nizamlanması üzrə təklif hazırlasınlar. Dünən o, həmin təklifləri alıb.
Təkliflərdə hazırda davam edən atəşkəs rejiminin daha 72 saat müddətinə uzadılması, eləcə də ölkənin Silahlı Qüvvələri və qiyamçıların nümayəndələrinin detalları müzakirə etmək üçün Cənubi Sudanın paytaxtı Cubaya göndərilməsi nəzərdə tutulur.
Əl-Burhan özü də bildirib ki, irəli sürülmüş təşəbbüsü bəyənir. O, eyni zamanda İQAD nümayəndələrinə Sudandakı vəziyyətin nizamlanması üzrə göstərdikləri səylərə görə təşəkkür edib.
Qeyd edək ki, Sudanın Silahlı Qüvvələri və Çevik Reaksiya Qüvvələri (xüsusi təyinatlılar) arasında hərbi toqquşma aprelin 15-dən başlayıb. Ölkədə həyata keçirilməsi nəzərdə tutulan islahatlar çərçivəsində xüsusi təyinatlıların Silahlı Qüvvələrin tərkibinə daxil edilməsi ilə bağlı təklif iki qurum arasında ağır toqquşmalara səbəb olub.
Ordunun baş komandanı Əbdülfəttah əl-Burhan Çevik Reaksiya Qüvvələrini buraxdığını və onun üzvlərini qiyamçı elan etdiyini bildirib.
Bir neçə gün bundan əvvəl isə ABŞ-ın dövlət katibi Entoni Blinkenin tərəflərlə uzun-uzadı danışıqlar aparmasından sonra ölkədə 72 saat müddətinə atəşkəs elan olunması ilə bağlı razılaşma əldə edilib.
Ümumdünya Səhiyyə Təşkilatı isə paytaxt Xartumda və digər şəhərlərdə baş vermiş hərbi toqquşmalar nəticəsində 459 nəfərin öldüyü və 4 min 72 nəfərin yaralandığı barədə məlumat yayıb.
Paşa ƏMİRCANOV, “Xalq qəzeti”