Dünyada milyonlarla istifadəçisi olan “TikTok” qadağalar və cərimə xəbərləri ilə gündəmdən düşmür. Bir müddət əvvəl Avstraliya hökuməti tərəfindən qadağan edilən platforma indi Böyük Britaniyada rekord məbləğdə cərimələnib. Belə ki, məlumatların qorunması qanununu pozduğuna görə platforma 12,7 milyon funt sterlinq ödəməli olacaq. Xəbəri “cnn.com” saytı verib.
Böyük Britaniya İnformasiya Komissarlığı Ofisi (ICO) tərəfindən aparılan araşdırmada “TikTok” 13 yaşından kiçik uşaqların şəxsi məlumatlarından valideyn icazəsi olmadan istifadə etməkdə və bu yaş qrupunun proqramdan istifadə edə bilməməsi üçün lazımi tədbir görməməkdə ittiham olunur. Bununla yanaşı, komissarlıq “TikTok”un 2018-ci ilin may və 2020-ci ilin iyul aylarını əhatə edən dövr ərzində britaniyalı istifadəçilərə məxsus şəxsi məlumatlardan hüquqi, ədalətli və şəffaf şəkildə istifadə edilməməsi səbəbi ilə də qanunları pozduğunu irəli sürüb.
“TikTok” komissiyanın qərarı ilə razılaşmır. Şirkət platformanın 13 yaşdan kiçiklərə sayta girişi dayandırmaq üçün böyük sərmayə qoyduğunu bildirib. “TikTok”a şikayət etmək üçün 28 gün vaxt verilib. Qeyd edək ki, 12,7 milyon funt sterlinq cərimə ICO-nun tətbiq etdiyi ən böyük cərimələrdən biridir.
Əfsanə ƏHƏDLİ, “Xalq qəzeti”