Finlandiya Ankaranın təhlükəsizlik sahəsində narahatlıqları ilə bağlı səmimi və konkret addımlar atıb. İsveçdən fərqli olaraq, Finlandiyada terrorçulara dəstək aksiyalarının olmaması NATO üzvlüyünə ərizələrə ayrılıqda baxılması barədə qərar qəbul edilməsinə səbəb olub. Bunu Türkiyə Prezidenti Rəcəb Tayyib Ərdoğan deyib. Məlumatı “Anadolu” verib.
Ərdoğan Finlandiya Prezidenti Sauli Niinistö ilə danışıqlardan sonra NATO-nun Baş katibi Yens Stoltenberqə zəng edib və NATO-ya üzvlük prosesi ilə bağlı Finlandiyanın İsveçdən müsbət şəkildə fərqləndiyini, onunla bağlı qərarın parlamentə göndərildiyini ifadə edib. O qeyd edib ki, İsveçlə bağlı prosesin necə gedəcəyi bu ölkənin atacağı konkret addımlarla bağlı olacaq.
Stoltenberq Türkiyənin Finlandiyanın NATO-ya üzvlüyünün ratifikasiyası ilə bağlı qərarını alqışladığını bildirib.
Paşa ƏMİRCANOV, “Xalq qəzeti”
.jpg)
