Energetika nazirinin İstanbul görüşləri

post-img

Energetika naziri Pərviz Şahbazov İstanbul Təbii Sərvətlər Zirvəsi çərçivəsində Rumıniyanın energetika naziri Sebastian-İoan Burduja və Bolqarıstanın energetika naziri Jeço Stankov ilə görüşlər keçirib.

Energetika Nazirliyinin məlumatına görə, Rumıniyanın energetika naziri Sebastian-İoan Burduja ilə görüşdə təbii qaz və “yaşıl” enerji təchizatı, eləcə də ikitərəfli enerji əməkdaşlığının gündəliyindəki aktual məsələlərlə bağlı fikir mübadiləsi edilib. “Xəzər – Qara dəniz – Avropa Yaşıl Enerji Dəhlizi” layihəsinin icra vəziyyəti, eləcə də Rumıniyanın “Azərbaycan – Gürcüstan – Türkiyə – Bolqarıstan Yaşıl Enerji Dəhlizi” layihəsinə qoşulması perspektivləri nəzərdən keçirilib. Söhbət zamanı Rumıniyada “mavi yanacağ”a tələbat müstəvisində qaz tədarükü və infrastrukturların inkişafına dair müzakirələr aparılıb.

Bolqarıstanın energetika naziri Jeço Stankovla görüşdə isə Azərbaycanla enerji sahəsində tərəfdaşlıqdan məmnunluq ifadə edilib. Bolqarıstanın enerjiyə tələbatının ödənilməsində əhəmiyyətli paya malik Azərbaycan təbii qazının ölkəyə faydalarından bəhs edilib. Türkiyə ilə sərhəddə interkonnektorun ötürücülük gücünün artırılması imkanları dəyərləndirilib. Bununla yanaşı, Bolqarıstanda həyata keçirilən qazlaşdırma layihəsi üzrə irəliləyişlər nəzərdən keçirilib, həmçinin Azərbaycan, Gürcüstan, Türkiyə və Bolqarıstan arasında “yaşıl” enerji infrastrukturunun qurulması prosesindən irəli gələn məsələlər müzakirə edilib.

Hər iki ölkənin nazirləri 2–4 iyun tarixində Bakıda keçiriləcək “Enerji Həftəsi”ndə iştiraka dəvət edilib.

İqtisadiyyat