Dünya üzrə şirkətlərin 90 faizdən çoxu kiçik və orta bizneslərdir. KOB-lar dünyada məşğulluğun 70 faizini, ümumi daxili məhsulun 50 fa­izini təmin edir. KOB-ların ətraf mühitə fərdi təsiri nisbətən kiçik olsa da, qlobal miqyasda istixana qazı emissiyasının 50 faizi, biznes sektoru­nun enerji istifadəsinin isə 30–60 faizi onların payına düşür. Milyonlarla KOB-un “yaşıl” iqtisadiyyata keçidi iqlim dəyişiklikləri ilə qlobal müba­rizəyə öz töhfəsini verə bilər. Azərbaycanda fəaliyyətdə olan sahibkarların 99,6 faizini KOB subyektləri təşkil edir.

Bütün bunlar haqqında “Yaşıl” iqti­sadiyyatda kiçik və orta biznesin rolu” mövzusunda keçirilən konfransda ətraflı danışılıb, KOB-ların iqlim dəyşiklikləri ilə mübarizəyə, “yaşıl” iqtisadiyyata keçi­də verə biləcəkləri töhfə bir daha diqqətə çatdırılıb. 

İqtisadiyyat, ekologiya və təbii sərvət­lər nazirliklərinin dəstəyi, Kiçik və Orta Biznesin İnkişafı Agentliyinin təşkilatçılı­ğı ilə keçirilən konfransda aidiyyəti dövlət qurumlarının rəhbər şəxsləri, beynəlxalq təşkilatların və sahibkarların ictimai birlik­lərinin nümayəndələri, müxtəlif sahələrdə fəaliyyət göstərən iş adamları iştirak edib­lər.

İqtisadiyyat naziri Mikayıl Cabba­rov və ekologiya və təbii sərvətlər naziri, COP29-un müəyyən edilmiş prezidenti Muxtar Babayev çıxışlarında “yaşıl” iq­tisadiyyatın dayanıqlı inkişafda rolu, Pre­zident İlham Əliyevin müəyyənləşdirdiyi “Təmiz ətraf mühit və “yaşıl” artım ölkəsi” milli prioriteti üzrə görülən tədbirlər, eko­loji təmiz texnologiyaların tətbiqi, eləcə də “yaşıl” istehsalın artırılması, təkrar emal və çirklənmiş ərazilərin bərpasının təşviqi üzrə qarşıda duran vəzifələr barədə məlu­mat veriblər. 

Qeyd olunub ki, Azərbaycanda KOB subyektlərinin sosial-iqtisadi inkişafda çə­kisi və rolu artmaqdadır. KOB-lar ÜDM-nin artmasına, məşğulluğa, azad olunmuş ərazilərin iqtisadi reinteqrasiyasına mü­hüm töhfələr verir. “Yaşıl” iqtisadiyyatın indiki inkişafında da KOB-ların töhfəsi diqqət çəkir. 

Konfransda BMT-nin iqlim dəyişikli­yi üzrə yüksək səviyyəli çempionu Nigar Arpadarai, Kiçik və Orta Biznesin İnkişa­fı Agentliyi İdarə Heyətinin sədri Orxan Məmmədov, İxracın və İnvestisiyaların Təşviqi Agentliyinin icraçı direktoru Yu­sif Abdullayev və Dünya İqlim Fondunun İdarə Heyətinin sədri Cens Nilsen çıxış ediblər.

KOB-ların “yaşıl” transformasiyası milli və qlobal səviyyədə maraqlı tərəflə­rin birgə fəaliyyəti nəticəsində mümkün­dür. Bu zərurətdən irəli gələrək Kiçik və Orta Biznesin İnkişafı Agentliyi tərəfindən KOB-ların “yaşıl” keçidinin asanlaşdırıl­masına dəstək üçün qlobal təşəbbüs irəli sürülüb və bu, KOB-ların “Yaşıl iqlim keçidi üçün Bakı Koalisiyası Bəyannamə­si”ndə öz əksini tapıb. Konfrans çərçivə­sində müvafiq bəyannamə COP29-un pre­zidentinə təqdim edilib.

Tədbirdə KOBİA və “ACWA Power Azerbaijan Renewable Energy” MMC arasında KOB-ların “yaşıl” keçidi üzrə əməkdaşlığa dair Anlaşma Memorandu­mu imzalanıb. KOBİA-nın İdarə Heyəti­nin sədri Orxan Məmmədov və “ACWA Power Azerbaijan Renewable Energy” MMC-nin direktoru Səlim Güven tərəfin­dən imzalanmış sənəd kiçik və orta sahib­karlıq subyketlərinin “yaşıl” iqtisadiyyata keçidinə dəstək məqsədilə birgə əməkdaş­lıq tədbirlərini nəzərdə tutur.

Konfransda BMT-nin Qlobal Sazişi tərəfindən korporativ dayanıqlılıq mədə­niyyətinin təşviqində fəal iştirakına görə KOBİA-ya sertifikat təqdim edilib.

Tədbir “KOB subyektlərinin yaşıl iq­tisadiyyata keçidinin zərurəti” və “İqlim maliyyəsi və KOB-lar” mövzularında pa­nel iclaslarla davam edib.