Bu il Sumqayıt Kimya Sənaye Parkında ümumi investisiya dəyəri 39,2 milyon manat olan “Kartaş Kimya” MMC-nin tikinti kimyəviləri, eləcə də “Az-Tex-Import” MMC-nin “IVECO” markalı yüngül, orta və ağır tonnajlı yük avtomobilləri istehsalı müəssisələrinin fəaliyyətə başlaması nəzərdə tutulur.
“Kartaş Kimya” MMC-nin direktoru Necmeddin Taşbağın mediaya bildirdiyinə görə, artıq tikinti kimyəvilərinin istehsalı müəssisəsində inşaat işləri tamamlanmaq üzrədir. Yaxın aylarda burada avadanlıqların quraşdırılması işlərinə başlanılacaq. 250 nəfərin daimi işlə təmin ediləcəyi müəssisənin investisiya dəyəri 20 milyon manatdır, layihə üzrə indiyədək görülən işlərə artıq 15 milyon manatdan çox sərmayə qoyulub.
Onun sözlərinə görə, zavodda tikinti kimyəvilərinin istehsalı ilə yanaşı, ölkə ərazisində ilk dəfə olaraq müxtəlif təyinatlı su izolyasiya materiallarının istehsalı da nəzərdə tutulur.
İnvestisiya dəyəri 19,2 milyon manat olan yük avtomobillərinin istehsalı müəssisəsində isə 90 nəfər daimi işlə təmin olunacaq. İl ərzində 100 ədəd avtomobilin istehsal olunacağı müəssisənin məhsulları daxili bazarda satılmaqla yanaşı, Rusiya, Gürcüstan, Türkmənistan və İrana ixrac ediləcək.
