Bu gün ərzaq təhlükəsizliyini gerçəkləşdirən, ixrac potensialının daha da güclənməsinə, habelə kənd yerlərində əhalinin rifahının daha da yüksəlməsinə töhfə verən aqrar sektorun inkişafı hökumətin diqqət mərkəzində saxladığı prioritet istiqamətlərdən biridir. Son illərdə uğurla həyata keçirilən davamlı inkişaf strategiyasına uyğun olaraq bu sahədə çoxşaxəli dövlət dəstəyi sisteminin qurulması, sözügedən sektorun potensialının reallaşdırılmasına yönəldilən resursların həcminin artırılması və nəticədə kənd təsərrüfatı məhsulları istehsalında dinamik artım əldə edilməsi aqrar sistemin gücləndirilməsinə dövlət qayğısının bariz ifadəsidir.
Qeyd edək ki, aqrar sektorun potensialının gücləndirilməsi müxtəlif istiqamətlər üzrə reallaşdırılan genişmiqyaslı tədbirlərlə həllini tapır. Məsələn, bitkiçiliyin canlanması üçün intensiv və ekstensiv amillərə xüsusi diqqət yetirilir, heyvandarlıq sahəsinin tərəqqisi isə tədrici intensiv metodlara əsaslanılır. Azərbaycanda 3 il əvvəl tətbiqinə başlanılan aqrar sığortanın əhatə dairəsi davamlı şəkildə genişləndirilir. Aqrar Sığorta Fondunun fermerlərə ödənişləri isə hazırda rekord həddə çatır. Fermerlərin ötən il adı çəkilən fonddan 4 milyon manat civarında sığorta ödənişi alması, belə bir göstəricinin isə 2021–2022-ci illərlə müqayisədə təxminən 2 dəfə çox olması bunun bariz ifadəsidir.
Onu da deyək ki, kənd təsərrüfatının inkişafında meliorasiya layihələrinin icrası da əhəmiyyətli rol oynayıb. Bu fikrin təsdiqi üçün xatırladaq ki, respublikada meliorasiya-irriqasiya sisteminin yenidən qurulması və təkmilləşdirilməsi üçün dövlət büdcəsi vəsaitləri hesabına son 10 il ərzində 390 min hektardan çox sahədə torpaqların su təminatı yaxşılaşdırılıb, 188 min hektar sahə yeni suvarılan torpaqlar qrupuna əlavə edilib. Həmçinin suvarılan sahələrdə müvafiq dövlət dəstəyi hesabına tətbiq olunan müasir suvarma sistemlərinin payı artıq 5 faizdən çox yüksəlib.
Aqrar sahədə həyata keçirilən bütün bu və digər tədbirlər nəticəsində 2022-ci illə müqayisədə 2023-cü ildə müəyyən artım göstəriciləri qeydə alınıb. Məsələn, ilkin statistik rəqəmlərə diqqət yetirəndə görürük ki, hesabat dövründə respublikada, təqribən, 12 milyard manat dəyərində kənd təsərrüfatı məhsulu istehsal edilib. Bu rəqəm ötən ilin eyni dövrü ilə müqayisədə 3,1 faiz çox olub. Bundan başqa, son bir ildə ölkədə istehsal olunan bitkiçilik məhsullarının dəyəri 2,8 faiz artaraq 5 milyard 842 milyon manat, heyvandarlıq məhsullarının dəyəri isə 3,3 faiz artaraq 5 milyard 728 milyon manata yüksəlib.
Son rəsmi statistik məlumata əsasən, keçən il qarğıdalı da daxil olmaqla tarlalardan 3 milyon 223 min ton və yaxud 2022-ci ilə nisbətən 2,9 faiz çox dənli və dənli paxlalı bitkilər, 1 milyon 813 min ton (0,1 faiz çox) tərəvəz, 1 milyon 249 min ton (0,1 faiz çox) meyvə və giləmeyvə, 222 min ton (5,3 faiz çox) üzüm, 1124 ton (12,3 faiz çox) yaşıl çay yarpağı, 29 min ton (1,3 faiz çox) günəbaxan, 214 min ton (4,8 faiz çox) şəkər çuğunduru, 5 min ton (22,3 faiz çox) tütün yığılıb.
Emin BAĞIROV,
ETN Riyaziyyat və Mexanika İnstitutunun böyük elmi işçisi, şərhçi
Aqrar sektorda əldə edilən uğurları şərtləndirən əsas amillərdən biri də fikrimcə, bu sahəyə ötən illər ərzində əlavə güzəştlərin verilməsi ilə bağlı olub. Məsələn, Vergi Məcəlləsində dəyişikliyə əsasən, cari ildən ölkədə yem və yem əlavələrinin satışı üzrə dövriyyələr daha 3 il müddətinə əlavə dəyər vergisindən (ƏDV) azad edilib. Başqa sözlə, ölkədə siyahısı Nazirlər Kabineti tərəfindən təsdiqlənən yem və yem əlavələrinin satışı üzrə dövriyyələrə tətbiq olunan ƏDV-dən azadetmənin müddətinin 2027-ci il yanvarın 1-nə kimi uzadılması qərara alınıb.
Xatırladaq ki, kənd təsərrüfatı məhsullarının istehsalı və satışı vergidən azad olunub. 2020-ci il yanvarın 1-dən heyvandarlıq və quşçuluq təsərrüfatlarında işlədilən yem və yem əlavələrinin satışı üzrə dövriyyələr də tam olaraq ƏDV-dən azad edilib. Həmin malların siyahısı Nazirlər Kabinetinin 30 iyun 2022-ci il tarixli qərarı ilə təsdiqlənib. Bu siyahıya qüvvəli, qaba və şirəli, həmçinin bitki və heyvan mənşəli yemlər, heyvandarlıqda və quşçuluqda istifadə olunan müəyyən amin turşuları və digər maddələr daxil olunub.
Qeyd edək ki, artıq bu cür məhsulların bütün zəncirlər üzrə dövriyyəsinin ƏDV-dən azad olunması təbii ki, heyvandarlığın inkişafına, eyni zamanda, bu sahədə müsbət göstəricilərin qeydə alınmasına öz təsirini göstərir. Vergi güzəşti, həm də ölkədə istehsal edilən mal, qoyun və quş ətinin bahalaşmasının qarşısını alır.
Vergi Məcəlləsinə edilən digər bir dəyişikliyə əsasən, cari ildən Azərbaycanda buğdanın idxalı və satışı, buğda ununun və çörəyin istehsalı və satışı daha 3 il müddətinə ƏDV-dən azad edilib. Güzəştin müddəti 2027-ci il yanvarın 1-nə kimi uzadılıb.
Xatırladaq ki, Azərbaycanda buğdanın idxalı və satışı, buğda ununun və çörəyin istehsalı və satışı 2017-ci il yanvarın 1-dən güzəşt müddətinin iki dəfə uzadılmaqla vergidən azad edilmişdi.
Ümumiyyətlə, son illər ərzində aqrar sahədə sahibkarlığın inkişafını stimullaşdıran bir çox qanunlar qəbul edilib, çoxsaylı fərmanlar imzalaıb və dövlət proqramları təsdiqlənib. Təbii ki, bütün bunlar kənd təsərrüfatının inkişafını şərtləndirib. Bundan başqa, respublikada istehsal olan məhsulların “Made in Azerbaijan” brendi adı ilə dünyanın bir çox ölkəsinə ixracına başlanıb və müsbət göstəricilər əldə edilib. Belə ki, statistik göstəriciyə əsasən, 2003-cü ildə kənara göndərilən kənd təsərrüfatı və emal məhsullarının dəyərinin 166 milyon ABŞ dollarından 2023-cü ildə 912 milyon ABŞ dollarına yüksəlib.
Aqrar sektordan bəhs edərkən, onu da bildirim ki, bu sahənin regionların tərəqqisinə müsbət təsiri danılmazdır. Başqa sözlə, kənd təsərrüfatında davamlılığın və mühüm makroiqtisadi nəticələrin əldə olunması bölgələrin inkişafını, ən başlıcası isə ərzaq təhlükəsizliyini şərtləndirir. Dövlətimizin başçısı tərəfindən Hökumət qarşısında əhalinin ərzaq təminatının tam ödənilməsinin daim strateji vəzifə kimi qoyulması, 2024-cü ilin dövlət büdcəsində bu məsələnin həlli istiqamətinə 500 milyon manatdan çox vəsaitin nəzərdə tutulması da bunun bariz ifadəsidir.
Azərbaycanda ərzaq təhlükəsizliyindən bəhs edərkən, bir məsələni də xatırlatmaq istərdim. Hökumət artıq ərzaqlıq buğda istehsalçılarının aldığı kreditlərə dövlət zəmanəti verməyə, eləcə də faiz subsidiyası ödəməyə başlayıb. Bunun üçün Prezident İlham Əliyev “Kənd təsərrüfatına dövlət dəstəyinin və aqrar sahədə lizinq fəaliyyətinin təkmilləşdirilməsi haqqında” 19 dekabr 2018-ci il tarixli fərmanında dəyişiklik edib, Kənd Təsərrüfatı Nazirliyi yanında Aqrar Kredit və İnkişaf Agentliyinin vəsaitindən istifadə ilə bağlı bəzi məsələlərin tənzimlənməsi barədə fərman imzalayıb.
Bununla belə, 2023-cü ildə respublikada ərzaqlıq buğdanın dövlət tədarük qiyməti 2022-ci illə müqayisədə 22,4 faiz az – 450 manat/ton müəyyənləşdirilib. Əvəzində fermerlərdən alınan şəkər çuğundurunun qiyməti artırılıb. “Azərsun Holdinq” MMC-yə məxsus “Azərbaycan Şəkər İstehsalat Birliyi” MMC tərəfindən 2023/2024-cü təsərrüfat ilində qışlıq və yazlıq mövsümü üzrə şəkər çuğundurunun hər tonunu şəkərlilik faizinə uyğun olaraq 4 manat baha – 485 manata alınmasına qərar verilib.
Vaqif BAYRAMOV
XQ