Xəzərin Azərbaycan sektorunda yerləşən “Şahdəniz” qaz-kondensat yatağındakı “SDX-8” kəşfiyyat quyusunun qazılması üzrə nəzərdə tutulmuş 7 min metrlik ümumi layihə dərinliyinə nail olunub. Bu barədə “BP Azərbaycan” şirkətindən bildiriblər.
Məlumatda qeyd olunur ki, daha sonra yerdə qalan quyu işləri başa çatdırılacaq və əldə edilmiş məlumatlar proqnozlaşdırılacaq. Bu işlərin isə bir neçə ay ərzində başa çatdırılması nəzərdə tutulur.
Xatırladaq ki, BP “Şahdəniz” perspektiv sahəsinin kəşfiyyatı, işlənməsi və hasilatın pay bölgüsü haqqında saziş çərçivəsində müqavilə ərazisində yeni “SDX-8” kəşfiyyat quyusunun qazılmasına ötən il yanvarın 23-də başlanıb. Quyu 2022-ci ilin dekabrında “Şahdəniz” yatağının şərq cinahında, SDX-8 quyusunun ərazisində yerləşdirilən Heydər Əliyev adına yarımdalma qazma qurğusundan istifadə edilməklə qazılıb.
Yeri gəlmişkən, “Şahdəniz”in təsdiqlənmiş ehtiyatları 1,2 trilyon kubmetr qaz və 240 milyon ton kondensat olaraq qiymətləndirilir. “Şahdəniz" layihəsinin iştirakçıları isə BP (operator – 29,99 faiz), LUKOYL (19,99 faiz), TPAO (19 faiz), SOCAR (14,35 faiz), NICO (10 faiz) və SGC (6,67 faiz) şirkətləridir.
XQ
.jpg)
