Maliyyəçilər əhalini maarifləndirirlər
Maliyyə Nazirliyində Azərbaycan Respublikasının 2024-cü ilin dövlət və icmal büdcələri ilə bağlı məlumatları özündə birləşdirən “Vətəndaşın büdcə bələdçisi” hazırlanaraq qurumun rəsmi internet səhifəsində yerləşdirilib.
Nazirliyin bununla bağlı məlumatına görə, hər il ənənəvi olaraq hazırlanan bələdçidə dövlət və icmal büdcələrin əsas parametrləri, büdcə gəlirlərinin formalaşma mənbələri və xərclərin istiqamətləri barədə əsas məlumatlar əks olunub.
Vətəndaşların ixtiyarına verilən bələdçidə 2024-cü ildə hökumətin həyata keçirəcəyi sosial-iqtisadi layihələr, həmçinin ölkəmizin müdafiə qabiliyyətinin gücləndirilməsi, işğaldan azad olunan ərazilərdə sürətli bərpa və yenidənqurma işlərinin davam etdirilməsi, iqtisadi inkişafın stimullaşdırılması, əhalinin sosial müdafiəsinin reallaşdırılması, təhsil, səhiyyə xərcləri və dövlətin əsas vəzifə və funksiyalarının gerçəkləşdirilməsi üçün yaradılan maliyyə təminatı barədə məlumatlar əldə etmək olar.
Hazırlanmış bu nəşr vətəndaşlara büdcə sahəsində bələdçilik edəcək, büdcənin daha asan və aydın şəkildə başa düşülməsində yardımçı olacaqdır.
XQ