“Azərenerji” Açıq Səhmdar Cəmiyyəti işğaldan azad edilmiş ərazilərin daimi və dayanıqlı elektrik enerjisi təchizatı ilə bağlı enerji xəritəsi hazırlayıb.
Qurumun Qarabağ Regional Elektrik Şəbəkəsinin rəisi Mircəlal Hüseynovun bildirdiyinə görə, dekabrın 24-də Prezident İlham Əliyevin açılışını etdiyi “Ağdam” qovşaq yarımstansiyası da həmin enerji xəritəsinə daxildir. Yarımstansiyanın çox böyük əhəmiyyət daşıdığını vurğulayan şəbəkə rəisi deyib ki, bu obyekt Ağdam şəhərinin bir hissəsinin, ətraf kəndlərin, yaxınlıqda yerləşən Xocalı rayonunun Əsgəran qəsəbəsinin və digər ərazilərinin, eləcə də Ağdərə rayonunun enerji təchizatında mühüm rol oynayacaq.
Onun sözlərinə görə, 2 ədəd 40 meqavatlıq transformatorun fəaliyyət göstərdiyi yarımstansiya 35/10 kilovoltluq qapalı və 110 kilovoltluq açıq paylayıcı qurğulardan ibarətdir. “Bu qovşaq yarımstansiyaya “Ağdam 1” yarımstansiyasından 10 kilometr məsafədə 110 kilovoltluq ikidövrəli elektrik verilişi hava xətti çəkilib. Eyni zamanda quraşdırılan bütün avadanlıqlar SCADA dispetçer idarəetmə sisteminə tam inteqrasiya olunub”, – deyə o əlavə edib.
XQ
