Beynəlxalq maliyyə qurumu indiyədək 188 layihəyə 3,6 milyard avrodan çox investisiya yatırıb
Azərbaycanın iqtisadiyyat naziri Mikayıl Cabbarov “X” sosial şəbəkəsində paylaşdığı məlumatda ölkəmizlə Avropa Yenidənqurma və İnkişaf Bankı (AYİB) arasında əməkdaşlığın genişləndirilməsinin müzakirə edildiyini və Böyük Britaniyaya səfəri çərçivəsində AYİB-in birinci vitse-prezidenti Yurgen Riqterinklə görüşdüyünü bildirib. O, bu müzakirələrdə, həmçinin bərpaolunan enerji mənbələri, özəl sektor və informasiya texnologiyaları sahələrində ikitərəfli əlaqələrin perspektiv prioritetlərinə də toxunulduğunu vurğulayıb.
Qeyd edək ki, AYİB-nin Azərbaycandan müdir, iqtisadiyyat naziri M.Cabbarov həmin görüşdə ölkəmizin adıçəkilən bankla əlaqələrin inkişafına daim önəm verdiyini, bu maliyyə qurumunun respublikamızın iqtisadi inkişafına uzunmüddətli və davamlı dəstək göstərdiyini bildirib. Nazir ölkəmizin sosial-iqtisadi inkişaf prioritetlərinin qlobal məqsədlərə uyğunluğunu vurğulayaraq, qarşıya qoyulan hədəflərin reallaşdırılması üçün səylərin birləşdirilməsinin önəmini də qeyd edib.
Xatırladaq ki, AYİB hazırda ölkəmizlə “yaşıl” iqtisadiyyat, bərpaolunan və alternativ enerji kimi istiqamətlər üzrə prioritet layihələrin icrasına böyük maraq göstərir. Bankın BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının – COP29-un gələn il Azərbaycanda keçirilməsini yüksək dəyərləndirməsi və bu istiqamətdə Azərbaycana dəstək verməyə hazır olduğunu bildirməsi də bunun bariz ifadəsidir.
Prezidenti İlham Əliyev bu il sentyabrın 7-də AYİB-in birinci vitse-prezidenti Yurgen Riqterinkin başçılıq etdiyi nümayəndə heyətini qəbul edərkən də maliyyə qurumu ilə ölkəmiz üçün prioritet sahələrdə, xüsusilə bərpaolunan enerji və nəqliyyat-logistika sahələrində əməkdaşlıq məsələləri müzakirə olunub. Eyni zamanda, AYİB ilə Azərbaycan arasında əməkdaşlığın daha da genişləndirilməsinin önəmi vurğulanıb, bankın ölkəmizin enerji layihələrinə ayırdığı kreditlərin vacibliyi qeyd edilib.
Ümumiyyətlə, AYİB tərəfindən aparılan tədqiqatlar Azərbaycanda ekoloji cəhəfdən təmiz hidrogen istehsalının məqsədəuyğun olduğunu təsdiq edib. Bununla yanaşı, adıçəkilən bankın dəstəyi ilə Niderlandın tanınmış “Advision” şirkəti ilə Azərbaycanın hidrogen potensialının qiymətləndirilməsi ilə bağlı təhlili də yekunlaşıb. Qurumun hesabatında ölkəmizin bu sahədəki potensial imkanları ilə bağlı müsbət məqamlar yer alıb.
Maliyyə qurumunun ölkəmizin bərpaolunan enerji layihələrinin həyata keçirilməsi ilə bağlı fəaliyyətindən danışarkən bankən hazırda respublikamızın şərqində 240 meqavatt gücündə külək enerjisi stansiyasının tikintisini maliyyələşdirdiyi daha çox diqqət çəkir. Bu, külək enerjisi sahəsində ölkədə ilk təşəbbüs olmaqla Qafqazda bu cür ən böyük layihədir. Stansiyası istismara verildikdən sonra ildə 893 qiqavatt-saatadək xalis elektrik enerjisinin hasil olunacağı gözlənilir. Ölkəmiz tərəfindən AYİB-in fəaliyyətində xüsusi yer tutan “Xəzər–Avropa İttifaqı Yaşıl Enerji Dəhlizi” layihəsi də yüksək dəyərləndirilir.
Beynəlxalq maliyyə institutunun öləmizlə əməkdaşlığından bəhs edərkən, ötən ilin yayında Gəncə şəhərinin Azərbaycanda ilk pilot şəhər olaraq AYİB-nin “Yaşıl Şəhərlər Proqramı”na qoşulmasını da xatırladaq. Seçilmiş şəhər üçün “Yaşıl Şəhər Fəaliyyət Planı”nın hazırlanması həmin əsasını təşkil edir. Fəaliyyət Planının əsas məqsədi isə “yaşıl” gələcəyə keçidi dəstəkləmək üçün investisiya qoyuluşu və digər tədbirlər vasitəsilə Gəncənin ekoloji məsələlərinin həllinə kömək göstərilməsidir.
AYİB bu ilin əvvəlində Azərbaycanla birgə imzaladığı Anlaşma Memorandumu ilə təsdiqlənən investisiyalar, eləcə də texniki əməkdaşlıq və siyasi dialoq vasitəsilə “yaşıl proqram”ın həyata keçirilməsini qarşıya mühüm vəzifə kimi qoyub.
AYİB-in ölkəmizdəki fəaliyyəti təkcə “yaşıl enerji” layihələrinin maliyyələşdirilməsi ilə məhdudlaşmır. Ümumiyyətlə, Azərbaycan–AYİB əməkdaşlıq imkanları və bankın maliyyə dəstəyi ilə həyata keçirilən layihələr genişmiqyaslıdır. Maliyyə qurumunun indiyədək respublikamızda 188 layihəyə 3,6 milyard avrodan çox sərmayə qoyması, ümumi investisiyaların 13 faizinin özəl sektorun payına düşməsi də bunun bariz təsdiqidir. Bundan başqa, AYİB-in təkcə 2022-ci ildə Azərbaycanda 9 layihəyə 86 milyon avro investisiya qoyması və həmin vəsaitin 71 faizinin “yaşıl iqtisadiyyat”ın inkişafına, bərpaolunan enerji mənbələrinə yönəltməsi isə maliyyə qurumunun ölkəmizin inkişafına əhəmiyyətli töhfəsidir.
AYİB-in respublikamıza belə ciddi maraq göstərməsi bir sıra amillərlə əlaqədardır. Əvvəla, respublikamızın əlverişli coğrafi məkanda yerləşməsi, eləcə də tranzit yüklərin daşınması üçün müasir infrastruktura malik olması bu baxımdan diqqət çəkir. Bu cür əlverişli şərait səbəbindən mühüm nəqliyyat dəhlizlərinin qovşağında yerləşən Azərbaycanla əməkdaşlıq etməyə calışan beynəlxalq maliyyə qurumlarının və dünya ölkələrinin sayı da ilbəil artır. AYİB-in respublikamızla yükdaşımalar sahəsində sıx əməkdaşlıq qurmasını da məhz bu məqam şərtləndirir. Bankla Azərbaycan İnvestisiya Holdinqi arasında razılıq əldə edilməsi – niyyət sənədi imzalanması da bu məsələdən qaynaqlanır. Bu əməkdaşılıq mövcud nəqliyyat dəhlizləri üzrə Azərbaycanın dəniz, avtomobil və dəmir yolu nəqliyyatının iştirakı ilə multimodal daşımaçılığın səmərəliliyini artıraraq iqtisadiyyatın şaxələndirilməsinə mühüm töhfə verir.
Sonda qeyd edək ki, AYİB 1991-ci ildən fəaliyyətə başlayıb. Ötən müddət ərzində əsasən, keçmiş sosialist ölkələri və Mərkəzi Asiya dövlətlərinə bazar iqtisadiyyatına keçid məqsədilə kredit və texniki yardım üçün kredit, həmçinin ianələr ayırıb.
Azərbaycan 1992-ci ildən mərkəzi ofisi Böyük Britaniyada yerləşən bu maliyyə qurumunun üzvüdür. Beynəlxalq maliyyə institutunun layihələrinin 50 faizi enerji sahəsini əhatə edir. Bankın səhm fondunda Azərbaycan Dövlət Neft Fondunun 100 milyon dollarlıq kapitalı saxlanılır.
V. BAYRAMOV
XQ