9 ayda büdcə daxilolmaları 12 milyard manatı ötüb
MDB vergi xidməti rəhbərlərinin Koordinasiya Şurasının bir neçə gün əvvəl keçirilən iclasında birlik ölkələrində aparılan vergi islahatları, vergi inzibatçılığının səmərəliliyinin artırılması istiqamətində həyata keçirilən layihələr, bu sahədə innovativ mexanizmlərin yaratdığı imkanlar, qanunvericilikdə dəyişikliklər, insan resurslarının təkmilləşdirilməsi ilə əlaqədar tədbirlər və digər məsələlər müzakirə edilib.
İqtisadiyyat Nazirliyi yanında Dövlət Vergi Xidmətinin rəis müavini İlkin Vəliyev iclasda çıxış edərək respublikamızda vergi inzibatçılığının səmərəliliyinin artırılmasını şərtləndirən texnoloji (rəqəmsal) həllər və əldə olunan nailiyyətlər barədə məlumat verib. Rəis müavini sadalananlarla yanaşı, respublikamızda vergi sisteminin təkmilləşdirilməsi sahəsində mütərəqqi yanaşmaların daim diqqətdə saxlanıldığını da vurğulayıb.
Bütün bunlar ölkəmizdə vergi sisteminin təkmilləşdirilməsinə hər zaman prioritet istiqamət kimi yanaşıldığından xəbər verir. Vergi Məcəlləsində vergi ödəyicilərinin mənafelərinə xidmət edən dəyişikliklər edilməsi, sahibkarlıq fəaliyyəti və ya digər vergi tutulan əməliyyatı olmayan vergi ödəyicilərinə vergi hesabatlarının təqdim edilməməsinə görə maliyyə sanksiyasının ləğvi kimi tədbirlər bunun bariz ifadəsidir.
Respublikamızda vergi sisteminin davamlı şəkildə təkmilləşdirilməsi qeyri–neft sektorunun inkişafında da özünü qabarıq büruzə verib. Başqa sözlə, bu istiqamətdə icra olunan vergi islahatları yeni qurulan iqtisadi zonalarda əlverişli biznes şəraitinə müsbət təsir göstərib. Məsələn, son illərdə texnologiya və sənaye parklarının rezidentləri üçün səmərəli vergi mühiti yaradılıb. Hər bir startap üç il müddətinə gəlir vergisindən azad edilib. Həmçinin kənd təsərrüfatı sahəsində vergi dərəcələri azaldılıb və sahibkarlıq fəaliyyətinin təşviqi diqqət mərkəzində saxlanılıb. Biznes fəaliyyətinin inkişafında bütünlükdə rəqəmsallaşma böyük rol oynayıb. Şübhəsiz ki, bu məsələnin həllinə hər bir sahibkar üçün əlçatan dövlət vergi sisteminin yaradılması önəmli təsir göstərib.
Vergi qanunvericiliyinin beynəlxalq təcrübəyə uyğunlaşdırılaraq müasirləşdirilməsi, eyni zamanda, iqtisadiyyatın bütün sahələrində stimullaşdırıcı mexanizmlərin tətbiqi qeyri-neft sektoruna büdcə gəlirlərinin əsasını təşkil edən vergi daxilolmalarının dinamik artımını gerçəkləşdirib. Dövlət Vergi Xidmətindən aldığımız məlumata əsasən, dövriyyələrin şəffaflaşdırılması, gəlirlərin bəyanetmə səviyyəsinin yüksəldilməsi, eləcə də vergi inzibatçılığında ciddi islahatlar aparılması həm tədiyə növləri üzrə, həm də qeyri-neft sektorunda vergi daxilolmalarının artımını sürətləndirib.
Cari ilin yanvar-avqust aylarında ölkəmizin vergi xidmətinin xətti ilə dövlət büdcəsinə vergi daxilolmalarının həcminin 2022-ci ilin müvafiq dövrü ilə müqayisədə 23,4 faiz artaraq 12 milyard 80 milyon manat təşkil etməsi, həmin müddətdə qeyri–neft–qaz sektorundan vergi daxilolmalarının ötən ilin eyni dövrü ilə müqayisədə 20,5 faiz artaraq 6 milyard 866 milyon manata çatması məhz yuxarıda vurğulanan tədbirlərin məntiqi nəticəsidir.
Vergi sisteminin indiki inkişaf dinamikasına nail olmaq üçün uzun bir yol keçilib, qeyd edildiyi kimi, vergi qanunvericiliyi müasir dövrün tələblərinə uyğun təkmilləşdirilib, “kölgə iqtisadiyyatı”na qarşı mübarizə metodları hazırlanaraq diqqət mərkəzində saxlanılıb, ən başlıcası dövlət–biznes münasibətlərində yeni bir transformasiyanın əsası qoyulub.
“Kölgə iqtisadiyyatı”na gəldikdə isə onun getdikcə “ağarması” dövriyyələrin, daxili istehsalın və ticarətin göstəricilərində, ticarət əməliyyatlarındakı sənədləşmələrdə, habelə bağlanmış əmək müqavilələrinin sayında özünü qabarıq büruzə verib. Məsələn, bu il oktyabrın 1-nə respublikamızda aktiv vergi ödəyicilərinin sayı ilin əvvəli ilə müqayisədə 5,7 faiz çox – 752 min olub. Dövlət Vergi Xidmətinin məlumatına görə, həmin göstəricinin 44,3 mini əlavə dəyər vergisi (ƏDV) ödəyicisi kimi qeydə alınıb. Bu isə ilin əvvəlinə nisbətən 11 faiz çoxdur. Hesabat dövründə aktiv obyektlərin (təsərrüfat subyektlərinin) sayı isə 6,8 faiz artaraq 202,1 minə çatıb.
Yeri gəlmişkən, “kölgə iqtisadiyyatı”nın qarşısının alınması “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın əsas istiqamətlərdən biri kimi müəyyənləşdirilib. Bu isə mövcud sahədə yüksək nəticələrin əldə edilməsinə şərait yaradıb. Xüsusilə son dövrlərdə yeni əmək müqavilələrinin bağlanmasına xüsusi diqqət yetirilməsi, bu sahədə şəffaflaşmaya üstünlük verilməsi ümumdaxili məhsulda artıma gətirib çıxarıb.
Ümumiyyətlə, ölkədə iş yerlərinin rəsmiləşdirilməsi, əməkhaqqı fondunun “ağardılması” və şəffaflığın diqqətdə saxlanılmasının nəticəsidir ki, bu il oktyabr ayının 1-nə bağlanan əmək müqavilələrinin sayı 1 milyon 770 minə çatıb. Qeyri–neft sektorunun özəl bölməsində isə həmin göstərici 341 min artaraq 881 min olub.
Burada onu da xatırladaq ki, haqqında bəhs olunan problemin həllinin gündəlikdə saxlanılması, xüsusən, kiçik və orta sahibkarlığın inkişafı üçün yeni imkanlar yaradıb. Bu, özəl bölmənin inkişafında, məşğulluğunun təmin edilməsində və sağlam rəqabətin gücləndirilməsində özünü göstərib.
Vəkil HÜSEYNOV,
iqtisadçı-ekspert
Ölkədə reallaşdırılan genişmiqyaslı struktur–institusional islahatlar da sosial–iqtisadi göstəricilərin daha da yaxşılaşmasına, iqtisadiyyatda kiçik və orta biznesin dominantlığının yüksəlməsinə müsbət təsir göstərib.
Bu məqamda respublikada yaradılan biznes mühitinə də diqqət yetirək. Belə ki, hazırda hüquqi şəxsin qeydiyyatı prosedurlarının sayı 3-dən 1-ə, müddəti isə 20 dəqiqəyədək azaldılıb, biznesə başlamaq üçün maliyyə vəsaiti və sənəd sayı sıfıra endirilib. Bu sistemə əsasən, qeydiyyat sənədləri yalnız vergi ödəyicisinin elektron kabinetinə onlayn qaydada göndərilir və həmin sənədlərin kağız daşıyıcılarda təqdim edilməsinə zərurət olmur.
Elektron kabinetə göndərilən qeydiyyat sənədləri xüsusi barkodla şifrələnməklə onların rəsmi olaraq bütün dövlət qurumları, banklar, notariuslar və digər təşkilatlarda qəbulu üçün qanunvericilik bazası və inzibatçılıq da təkmilləşdirilib.
Yeni onlayn qeydiyyat sisteminin həyata keçirilməsində əsas məqsəd biznesə başlamaqla bağlı prosedurların sadələşdirilməsi, vaxta qənaət, əlverişli biznes mühiti, şəffaflığın təmin olunması, məmur-sahibkar ünsiyyətinin minimuma endirilməsi və vətəndaş məmnunluğunun artırılmasıdır. Bütün bunlar vergi qanunvericiliyində sahibkarlığın dəstəklənməsi ilə bağlı aparılan islahatların davamıdır və ölkədə biznes mühitinin əlverişliliyinin daha da yaxşılaşdırılmasına xidmət edir.
Nəhayət, onu da qeyd edək ki, vergi daxilolmalarında dinamik artıma ölkədə liberal biznes mühitinin formalaşdırılması mühüm təsir göstərib və bu, investisiya şəraitinin yaxşılaşmasına gətirib çıxarıb. Belə bir şəraitdə icra olunan layihələr isə iqtisadiyyatın genişlənməsinə və investisiyaların artımına yol açıb.
Vaqif BAYRAMOV
XQ