Şirkət və tərəfdaşları ölkəmizin neft-qaz sektoruna 84 milyard dollar sərmayə qoyub
Azərbaycanın enerji sektorunda uğurla əməkdaşlıq etdiyi Böyük Britaniyanın BP şirkəti ölkəmizdə gələcəkdə reallaşdırılacaq neft-qaz və alternativ enerji layihələrinə də maraq göstərir. Bununla bağlı fikirlər şirkət rəsmilərinin sentyabrın 20-də Bakıya səfəri zamanı səsləndirilib.
Xəbər verildiyi kimi, BP-nin İdarə heyətinin sədri Helge Lund, hasilat və əməliyyatlar üzrə icraçı vitse prezidenti Qordon Birrel və şirkətin sabiq icraçı direktoru Mədinqli lordu Braun SOCAR-ın ümummilli lider Heydər Əliyevin 100 illik yubileyi ilə bağlı Gülüstan sarayında keçirdiyi tədbirdə iştirak etmək üçün Bakıda olublar.
Azərbaycan Respublikasının Prezidenti İlham Əliyev sentyabrın 20-də BP şirkətinin İdarə Heyətinin sədri Helqe Landı qəbul edib. Qəbulda şirkətin hasilat və əməliyyatlar üzrə icraçı vitse-prezidenti Qordon Birrel və 1994-cü il sentyabrın 20-də Bakıda “Xəzərin Azərbaycan sektorunda yerləşən “Azəri”, “Çıraq” yataqlarının və “Günəşli” yatağının dərinlikdə yerləşən hissəsinin kəşfiyyatı, işlənməsi və hasilatın pay bölgüsü haqqında” sazişə imza atan sabiq baş icraçı direktoru Lord Con Filip Braun iştirak ediblər.
Görüş zamanı “Əsrin müqaviləsi”nin önəmi qeyd olunmaqla yanaşı, bu tarixi sazişin ölkəmizin inkişaf tarixində çox mühüm bir səhifə olduğu vurğulanıb. Prezident İlham Əliyev BP şirkətinin rəhbərliyinin, eləcə də “Əsrin müqaviləsi”nin imzalanmasının birbaşa iştirakçısı və uzun illər şirkətə rəhbərlik edən Lord Con Filip Braunun Azərbaycanda neft işçilərinin peşə bayramı kimi qeyd edilən Neftçilər Günü və sazişin 29-cu ildönümü ilə bağlı keçirilən tədbirdə iştirakını yüksək qiymətləndirib. Dövlətimizin başçısı, həmçinin Azərbaycan ilə Böyük Britaniya şirkəti arasında həyata keçirilən uzunmüddətli sıx, səmərəli və strateji əməkdaşlığın tarixindən bəhs edib.
Azərbaycanın keçdiyi çətin və tarixi sınaq dövründə iqtisadi inkişaf yolunun əsasının qoyulmasında “Əsrin müqaviləsi”nin xüsusi rolunu vurğulayan Prezident İlham Əliyev ölkəmizin təşəbbüsü və iştirakı ilə həyata keçirilmiş və nəzərdə tutulan regional və qlobal miqyaslı layihələrdən söhbət açıb.
BP şirkətinin sabiq baş icraçı direktoru Lord Con Filip Braun Azərbaycan üçün çətin bir dövrdə məhz Heydər Əliyevin ölkəyə rəhbərlik etməsi sayəsində investisiya qoyuluşu üçün mövcud risklərin dəf edildiyini və beləliklə, “Əsrin müqaviləsi”nin imzalandığını böyük məmnunluqla xatırladıb. Şirkətin nümayəndələri bu tarixi sazişin ölkəmizin mürəkkəb dövründə Ümummilli liderin qətiyyətli və məharətli siyasəti nəticəsində ərsəyə gəldiyini söyləyib, Azərbaycanın enerji ehtiyatlarının inkişafında müqavilənin rolundan bəhs ediblər.
Qeyd etdiyimiz kimi, görüş zamanı qlobal enerji keçidi nəzərə alınaraq BP-nin Azərbaycanda olan tərəfdaşlarla, o cümlədən SOCAR ilə əməkdaşlıqda, yeni bərpaolunan enerji layihələrinin həyata keçirilməsində maraqlı və qətiyyətli olduğu bir daha diqqətə çatdırılıb, yeni sərmayə qoyuluşu imkanları müzakirə olunub.
Bu məsələlər BP nümayəndə heyəti ilə SOCAR rəhbərliyi arasında keçirilən görüşdə də ətraflı müzakirə mövzusu olub. Görüşdə bp-nin ölkəmizdəki səmərəli fəaliyyətindən, SOCAR ilə bp arasında uzunmüddətli uğurlu əməkdaşlıqdan məmnunluq ifadə edilib. Tərəflər, həmçinin enerji layihələri üzrə mövcud əməkdaşlıq imkanlarını nəzərdən keçirib, insan kapitalı sahəsində təcrübə mübadilələrinin həyata keçirilməsinə və qarşılıqlı maraq doğuran digər məsələlərə dair fikir mübadiləsi aparıblar. Sonra Azərbaycan İnvestisiya Şirkətinin (AİŞ) nümayəndələri ilə birgə tərəflər arasında Qoşulma Sazişi imzalanıb. Bu sənəd SOCAR-ın və AİŞ-in “Şəfəq” (Sunrise) layihəsinə daxil olmaq niyyətini əks etdirir.
Xatırladaq ki, 1992-ci ildə Azərbaycanla enerji sahəsində fəal əməkdaşlığa başlayan BP şirkəti hazırda ölkəmizdə həyata keçirilən bir sıra dünya səviyyəli neft-qaz layihələrinin operatoru kimi fəaliyyət göstərir. “Azəri-Çıraq-Dərinsulu Günəşli” yataqlar bloku, “Azəri-Mərkəzi-Şərqi”, “Şahdəniz” (1 və 2-ci mərhələlər) yataqlarının kəşfiyyatı, işlənməsi və hasilatın pay bölgüsü sazişləri üzrə layihələr, Səngəçal terminalının inşası və genişləndirilməsi, eləcə də Azərbaycanın karbohidrogen ehtiyatlarının dünya bazarına çıxarılmasını təmin edən ixrac boru kəmərləri layihələri məhz dünyanın neft nəhəngi sayılan BP şirkətinin operatorluğu ilə reallaşdırılıb. Hazırda isə şirkət Xəzər dənizinin Azərbaycan sektorunda yerləşən “Şəfəq-Asiman” yatağında kəşfiyyat-qiymətləndirmə işlərini davam etdirir.
“Əsrin müqaviləsi”nin ilkin imzalanmasından ötən 29 il ərzində bp və tərəfdaşları tərəfindən Azərbaycanın neft-qaz sektoruna, təxminən, 84 milyard ABŞ dolları investisiya qoyulub. Bundan əlavə, şirkət ötən müddətdə ölkəmizdə reallaşdırdığı sosial sərmayə layihələrinə, ümumilikdə, təqribən 109 milyon ABŞ dolları vəsait xərcləyib
BP şirkəti ölkəmizdə növbəti layihəsini işğaldan azad olunmuş Şərqi Zəngəzur iqtisadi rayonunda həyata keçirəcək. Məlum olduğu kimi, 2021-ci il iyunun 3-də Azərbaycan Respublikasının Energetika Nazirliyi və BP arasında Zəngilan/Cəbrayıl rayonu ərazisində 240 meqavat gücündə Günəş Elektrik Stansiyasının tikintisi layihəsinin qiymətləndirilməsi və həyata keçirilməsi fəaliyyəti üzrə əməkdaşlığa dair İcra Müqaviləsi imzalanıb. Müqavilə çərçivəsində əməkdaşlıq günəş enerji layihəsinin texniki və kommersiya aspektində qiymətləndirilməsini, stansiyanın layihələndirilməsini, maliyyələşdirilməsinin təmin edilməsi və yekun investisiya qərarının qəbulu kimi istiqamətləri əhatə edir.
Bir il sonra, 4 iyun 2022-ci il tarixində Azərbaycan Respublikasının Energetika Nazirliyi və BP arasında Cəbrayılda inşa olunacaq 240 meqavatlıq Günəş Elektrik Stansiyası layihəsinin birgə həyata keçirilməsi ilə bağlı növbəti addımların atılması məqsədilə mövcud müqaviləyə Əlavə imzalanıb. Xatırladaq ki, “Bakı Enerji Həftəsi” çərçivəsində Şuşa şəhərində imzalanmış bu sənəd “Şəfəq” Günəş Elektrik Stansiyası layihəsinin reallaşdırılması istiqamətində birgə fəaliyyəti yekunlaşdırmaq üçün görüləcək tədbirləri əks etdirir.
Yeri gəlmişkən, Azərbaycanın energetika nazirinin müavini Elnur Soltanov bir qədər əvvəl mətbuata bildirib ki, “Şəfəq” Günəş Elektrik Stansiyasının tikintisi layihəsinin texniki və kommersiya parametrləri, demək olar ki, razılaşdırılıb. Onun sözlərinə görə, adıçəkilən layihənin maliyyə tərəfləri ilə bağlı Energetika Nazirliyi və BP şirkəti arasında razılığa gəlinib.
Qeyd edək ki, gələcəkdə adıçəkilən stansiyada istehsal olunacaq enerji Səngəçal terminalını təmin edəcək. “Şəfəq” Günəş Elektrik Stansiyasının tikintisinin isə, təqribən, iki il ərzində başa çatdırılması nəzərdə tutulur.
M.YAQUBZADƏ
XQ