Bu qurum TANAP layihəsi üzrə ölkəmizə 600 milyon dollar kredit ayırıb
Asiya İnfrastruktur İnvestisiya Bankının (AİİB) vitse-prezidenti Konstantin Limitovski ölkəmizə rəsmi səfərə gəlib. Bank rəsmisi səfər çərçivəsində Azərbaycanın iqtisadiyyat nazirinin birinci müavini Elnur Əliyev ilə görüşüb.
Nazirliyin mətbuat xidmətindən verilən məlumata görə, görüşdə E.Əliyev Azərbaycanın Asiya İnfrastruktur İnvestisiya Bankı ilə əməkdaşlığa xüsusi önəm verdiyini bildirib. Nazir müavini AİİB-in “yaşıl” və dayanıqlı gələcəyin təmin olunması istiqamətində fəaliyyətini, həmçinin üzv ölkələrə güclü iqtisadiyyat qurmaqda dəstəyinin əhəmiyyətini vurğulayıb. O, bankla Cənub Qaz dəhlizi layihəsi, Bakı Beynəlxalq Dəniz Ticarət Limanı, dəmiryol infrastrukturu və digər nəqliyyat-tranzit və logistika layihələri çərçivəsində əməkdaşlığa dair fikirlərini bölüşüb.
AİİB-in investisiya əməliyyatları üzrə vitse-prezidenti Konstantin Limitovski təmsil etdiyi qurumun Asiya regionunda iqtisadi artımın stimullaşdırılması və infrastrukturun inkişafı istiqamətində həyata keçirdiyi tədbirlərdən bəhs edib. Bankın Azərbaycanla səmərəli əməkdaşlığını qeyd edən qonaq tərəfdaşlığın gələcək inkişaf imkanları barədə fikirlərini bölüşüb. Görüşdə, həmçinin tərəflər arasında potensial əməkdaşlığın əsas istiqamətləri, AİİB-in Azərbaycanda gələcək fəaliyyət prioritetləri, o cümlədən “yaşıl enerji” və infrastrukturun inkişafı üzrə perspektiv layihələr haqqında müzakirələr aparılıb.
Yeri gəlmişkən, bu, Asiya İnfrastruktur İnvestisiya Bankının vitse-prezidenti Konstantin Limitovskinin başçılıq etdiyi nümayəndə heyətinin cari ildə ölkəmizə ikinci səfəridir. Xatırladaq ki, fevral ayında baş tutmuş ilk səfər zamanı Konstantin Limitovski ilə iqtisadiyyat naziri Mikayıl Cabbarov, maliyyə naziri Samir Şərifov və Azərbaycan İnvestisiya Holdinqinin baş icraçı direktoru Ruslan Əlixanov arasında görüşlər keçirilmişdi.
Həmin görüşlərdə Azərbaycanın AİİB ilə əməkdaşlığa xüsusi önəm verdiyi, bankın “yaşıl” və dayanıqlı gələcəyin təmin olunması istiqamətində fəaliyyəti, həmçinin üzv ölkələrə güclü iqtisadiyyat qurmaqda dəstəyinin əhəmiyyəti vurğulanmış, tərəflər arasında energetika, infrastruktur, nəqliyyat sahələrində investisiya layihələrinin maliyyələşdirilməsi istiqamətində əməkdaşlığın genişləndirilməsi perspektivləri müzakirə edilmişdi. Eyni zamanda, tərəflər potensial əməkdaşlığın əsas istiqamətləri, AİİB-in Azərbaycanda gələcək fəaliyyət prioritetləri, bankın maliyyə dəstəyi ilə ölkəmizdə layihələrin həyata keçirilməsi imkanları haqqında müzakirələr aparmışdılar.
Xatırladaq ki, baş ofisi Çin Xalq Respublikasının Pekin şəhərində yerləşən və nizamnamə kapitalı 100 milyard dollar olan Asiya İnfrastruktur İnvestisiya Bankı 2014-cü ildə yaradılıb. Həmin gün Asiya qitəsinin 21 ölkəsi bu nəhəng investisiya bankının yaradılması məqsədilə memorandum imzalayıblar. Hazırda bankın dünyanın 106 ölkəsində səhmdarları mövcuddur.
Bankın əsas fəaliyyət istiqaməti etibarlı investisiyalar üçün uzunmüddətli maliyyələşdirmənin təqdim edilməsi, eləcə də əsasən Asiya regionunda həyat şəraitinin yaxşılaşdırılması və iqtisadi inkişafın təmin edilməsindən ibarətdir. Asiya qitəsində iqtisadi artımın stimullaşdırılması və infrastruktura bağlı layihələri maliyyələşdirən AİİB, həmçinin regionda kənd təsərrüfatının və infrastrukturunun inkişafı, enerji təchizatı, ətraf mühitin mühafizəsi, nəqliyyat və telekommunikasiya, su təchizatı və kanalizasiya, şəhərsalma və logistik mərkəzlərin yaradılmasında da xüsusi fəallığı ilə seçilir.
Son 7 ildə AİİB-in əməliyyat portfeli 35 milyard dollara çatıb. Ötən müddətdə bank öz missiyasına uyğun olaraq Asiya ölkələrinin infrastruktur baxımdan inkişafını dəstəkləməkdə davam edib. Asiya İnfrastruktur İnvestisiya Bankı ölkəmizlə əməkdaşlığa isə 2016-ci ildə başlayıb. Belə ki, həmin il iyunun 24-də adıçəkilən banka üzv seçilən Azərbaycan Respublikası ötən müddətdə dünyanın bir sıra beynəlxalq maliyyə-iqtisadi qurumları ilə yanaşı, AİİB ilə də fəal əməkdaşlıq edib. Ötən 7 ildə bankdan dövlət zəmanəti ilə 2 layihə üzrə kreditlər cəlb edilib. Artıq hər iki layihənin icrası başa çatdırılıb.
Yeri gəlmişkən, AİİB-in Azərbaycanda maliyyələşdirdiyi ilk layihə Cənub Qaz Dəhlizinin mühüm seqmentlərindən sayılan Trans-Anadolu Qaz Boru Kəmərinin (TANAP) tikintisi ilə bağlı olub. Belə ki, 2016-cı ilin dekabr ayında bank TANAP-ın çəkilişi üçün Azərbaycana 600 milyon dollar məbləğində kredit ayırıb. Bu, həm də ölkəmizin AİİB-lə əməkdaşlığının uğurlu nümunələrindən sayılır.
Bankın Azərbaycan üçün ayırdığı ikinci kredit isə 2021-ci ilin iyul ayına təsadüf edib. Xatırladaq ki, həmin vaxt bank Azərbaycan Respublikasının “COVID-19-a Aktiv Müdaxilə və Xərclərə Dəstək Proqramı” adlı layihəyə 100 milyon dollar məbləğində kredit ayırıb. Həmin vəsait ölkəmizdə COVID-19 infeksiyasının mənfi tibbi, sosial və iqtisadi təsirlərinin azaldılması üzrə hərtərəfli planın həyata keçirilməsinə yardım məqsədi daşıyıb.
Elə bankın məlumat bazasında da proqramın məqsədinin Azərbaycan hökumətinin COVID-19 pandemiyasının əhalinin sağlamlığına, gəlirlərinə və iqtisadi imkanlarına, həmçinin makroiqtisadi sabitliyə mənfi təsirinin azaldılmasına yönəlmiş maliyyə dəstəyi tədbirlərini dəstəkləməkdən ibarət olması göstərilir.
Asiya İnfrastruktur İnvestisiya Bankı Azərbaycanla əməkdaşlığı bundan sonra da genişləndirməyə, ölkəmizin iqtisadi inkişaf prioritetlərini dəstəkləməyi davam etdirmək niyyətindədir. Bu isə Asiyanın qabaqcıl maliyyə qurumunun ölkəmizə olan inam və etibarından irəli gəlir.
Mirbağır YAQUBZADƏ, “Xalq qəzeti”