İki ölkə arasında ticarət əlaqəsi ilin əvvəlindən 64 faiz artıb
Azərbaycan Qazaxıstan istehsalı olan dəmir yolu lokomotivlərinin Azərbaycana idxalı və ölkəmizdən gəmilərinin bu dövlətə ixracı layihələrinin qısa zamanda həyata keçirilməsində maraqlıdır. Bunu iqtisadiyyat naziri Mikayıl Cabbarov Qazaxıstanın ölkəmizdəki səfiri Alim Bayel ilə görüşündə deyib.
Söhbət zamanı nazir Orta Dəhlizin rəqəmsallaşdırılmasının və nəqliyyat-logistika sahəsində “vahid pəncərə” sisteminin yaradılmasının vacibliyini vurğulayıb. M.Cabbarov hazırkı geoiqtisadi vəziyyətdə ölkəsinin Azərbaycan–Qazaxıstan iqtisadi əməkdaşlığının sürətləndirilməsində maraqlı olduğunu təsdiqləyib.
Qazaxıstanın Azərbaycandakı səfiri də, öz növbəsində, Qazaxıstan və Azərbaycan arasında iqtisadi əməkdaşlığın yeni səviyyəyə yüksəldiyini bildirib. A. Bayel qeyd edib ki, dövlət başçılarının 2022 və 2023-cü illərdəki qarşılıqlı səfərləri ikitərəfli əməkdaşlıqda yeni mərhələyə qədəm qoyulduğunu göstərir. Diplomat Qazaxıstanın Baş naziri Əlixan Smailovun iyun ayında Azərbaycana rəsmi səfərinin məhsuldar olduğunu, bunun nəticəsində 11 birgə sənədin imzalandığını vurğulayıb.
Qazaxıstan, Azərbaycan və Gürcüstan dəmir yolları administrasiyaları tərəfindən birgə müəssisənin yaradılmasına, Xəzər dənizinin dibi ilə fiber-optik xəttin çəkilməsi üzrə birgə müəssisənin yaradılmasına dair, eləcə də Qazaxıstan neftinin Azərbaycan ərazisindən nəqlinin həcminin artması ilə bağlı sənədlərə xüsusi əhəmiyyət verilir.
Qeyd edək ki, Qazaxıstan Azərbaycana dəyəri 300 milyon ABŞ dollarından çox olan 100 adda əmtəə ixracını artırmağa və ikitərəfli ticarət dövriyyəsinin həcmini 1 milyard ABŞ dollarına çatdırmağa hazırdır. 2023-cü ilin yanvar-may aylarında Qazaxıstanla Azərbaycan arasında ticarət dövriyyəsi 2022-ci ilin eyni dövrü ilə müqayisədə 50 faiz– 162,5 milyon ABŞ dollarından 243,6 milyon ABŞ dollarına qədər artıb. Cari ilin əvvəlindən Orta Dəhliz üzrə ticarət dövriyyəsi 64 faiz artaraq 1 milyon tonu ötüb.
“Xalq qəzeti”