2022-ci ildə Azərbaycanın ticarət dövriyyəsi 55,4 faiz artaraq 52,69 milyard ABŞ dolları təşkil edib. Ötən il ölkənin ümumi ticarət dövriyyəsində qeyri-neft ixracının payı ilk dəfə olaraq 12,3 faiz artaraq 3 milyard ABŞ dollarını keçib. Cari ildə isə bu rəqəmin 3,4-3,5 milyard dollara çatacağı gözlənilir.
Yeri gəlmişkən, Azərbaycanda 2026-cı ilə qədər olan dövrü əhatə edən yeni milli ixrac strategiyasına əsasən, ixrac potensialı olan 100-dən çox məhsul müəyyən edilib. Onların yeni və mövcud bazarlara çıxarılması üçün müvafiq tədbirlər həyata keçiriləcək.
Qeyri-neft sektorunda artım, əsasən, turizm, nəqliyyat, kompüter və informasiya xidmətlərinin ixracı hesabına baş verib. Bununla belə, COVID-19 pandemiyasının təsirinin davam etməsi bütün dünya ölkələrində olduğu kimi, Azərbaycana da həssas sektorlardan biri olan turizmin inkişafına mənfi təsir göstərir. Belə ki, əgər pandemiyadan əvvəlki 2019-cu ildə Azərbaycana 3 milyon nəfərdən çox turist gəlmişdisə, 2020-ci ildə bu axın 4-5 dəfə azalıb. Bu sahədə əvvəlki göstəriciyə çatmaq üçün turizm sektorunun qarşısında ciddi vəzifələr durur. Postpandemiya dövründə aviareyslərin sayının artırılması, sərnişin daşınması üçün məhdudiyyətlərin aradan qaldırılması və sərhədlərin açılması isə turizm sektorunda canlanmaya səbəb olacaq.
“Xalq qəzeti”