İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) və ABŞ-ın Beynəlxalq İnkişaf Agentliyinin (USAID) təşkilatçılıği ilə “Alternativ maliyyə bazarlarının Azərbaycanda inkişaf perspektivləri” mövzusunda konfrans keçirilib.

Maliyyə və bank sahəsində fəaliyyət göstərən yerli və beynəlxalq qurumların, özəl sektor nümayəndələrinin, ümumi­likdə, 200-ə yaxın şəxsin iştirakı ilə ke­çirilən tədbirdə kiçik və orta biznes sub­yektlərinin (KOB) maliyyələşdirilməsi, bu sahədə alternativ maliyyə alətləri və bey­nəlxalq təcrübə, alternativ maliyyələşmə mexanizmlərinin Azərbaycanda tətbiqi imkanları müzakirə edilib.

KOBİA-nın İdarə Heyətinin sədri Orxan Məmmədov açılış nitqi ilə çıxış edərək bildirib ki, KOB subyektləri inkişaf etmiş iqtisadiyyatlarda ümumi daxili məh­sulun təxminən 50 faizini, inkişaf etmək­də olan iqtisadiyyatlarda isə 35 faizini təşkil edir. Ümumi məşğulluğun isə 60-70 faizi KOB-ların payına düşür. 

Qeyd olunub ki, Azərbaycanda fəa­liyyət göstərən biznes qurumlarının 99 faizindən çoxu məhz KOB subyektləridir. Bütün dünyada olduğu kimi, Azərbay­canda da sahibkarların maliyyələşmə mənbəyi kimi banklara üstünlük verdi­yini vurğulayan agentlik sədri bildirib ki, KOB-ların maliyyələşmə imkanlarının genişləndirilməsi və bu sahədə alterna­tiv maliyyə alətlərinin tətbiqi KOBIA-nın fəaliyyətinin prioritetlərindəndir. “USAID ilə birgə təşkil edilmiş bugünkü tədbirin məqsədi də məhz KOB-ların maliyyə əl­çatanlığının genişləndirilməsi sahəsində beynəlxalq təcrübə və alternativ maliyyə alətlərinin ölkəmizdə tətbiqi imkanlarını müzakirə etməkdir”, – deyə o əlavə edib.

USAID-in Azərbaycan üzrə missiya direktoru Maykl Nirbas çıxış edərək kon­fransın yeni tərəfdaşlıqlar üçün əlaqələr qurmağa imkan yaratmaq, yeni texniki biliklər qazanmaq, eləcə də digər ölkələ­rin borc və kapital maliyyələşməsini necə təşkil etdiyi barədə birbaşa məlumat əldə etmək baxımından vacib bir platforma olacağına əminliyini bildirib. O deyib ki, ekspertlərin iştirakı ilə reallaşacaq pa­nellər layihə maliyyələşdirilməsi üçün müxtəlif seçimlərin aydınlaşdırılmasına da imkan yaradacaq.

Forum çərçivəsində “İslam bankçılığı və mikromaliyyəsinin inkişaf perspektiv­ləri”, “KOB dəstək alətləri: zəmanət, ak­tivlərə əsaslanan maliyyələşmə və lizinq” və “Startap ekosisteminin inkişafının əhəmiyyəti” mövzuları üzrə panel müza­kirələr təşkil edilib. Panel iclaslarda qeyd olunan mövzular üzrə yerli və beynəlxalq təcrübə, gələcək inkişaf perspektivlərinə dair fikir mübadiləsi aparılıb.

“Xalq qəzeti”